Jelemiya 50 - Baibo Busansulushi Bwa Libuku Ili

Cishi ca Babiloni mbocakakomwa

¹ Pacishi ca Babiloni abantu bekalaamo, Mwaami Lesa wakaamba maswi aya kwiinda muli ndime neJelemiya ayi,

² “Amwaambilishe akoolobesha pakati ka mishobo ya bantu, amwiimike mbembela akoolobesha, mutafunkili nabi comwi, sombi mwaambe ayi, ‘Babiloni ulaakukomwa, Belo ulaakulenshekwa nsoni, Maduki ulaakunyumfwa boowa. Shikoshanyo shakwe shilaakulenshekwa nsoni ashibumbwabumbwa shakwe shilaakupwayoolwa.’

³ “Mushobo wa kumatwa ulaakubalwana akunyonyoola cishi cabo. Taaku muntu weshi akekaleemo, bantu alimwi abanyama boonse balaakucicaamo.”

Kuboola kwa bene Isilaeli

⁴ Mwaami Lesa waamba ayi, “Munshiku isho, bene Isilaeli abene Juda boonse, balaakunyamuka kabaya bulila kuyandoola ndime neMwaami Lesa, Lesa wabo.

⁵ Balaakwiipusha nshila iya kuSiyoni akululama nkuko. Lyalo balaakupanga cipangano anebo neMwaami Lesa camuyayaya ico ceshi cikabule kulubwaawo.

⁶ “Bantu bangu balibo anga nimbelele shisowekete. Beembeshi babo bakabasowa akubalengesha kwiingooka mutulundu. Bakalinga kuswa mutulundu akunooya mutulundu cakwaamba ayi bakaluba kumishaabo.

⁷ Ncakwiila uyo woonse wakabacana wakabanyonyoola. Balwani babo bakalinga kwaamba ayi, ‘Swebo tatucitewo mulandu ceebo bakabishisha Mwaami Lesa uyo wakalinga kubalama, ee, Mwaami Lesa uyo bamashali babo bakulukulu, ngobakalinga kucinkitemo manungo.’

⁸ “Amucice, amuswe muBabiloni, ee, amushiye cishi ca bene Babiloni. Amube bataanshi kucica!

⁹ Ndaakumusonkomweta likoto lya mishobo iyumu yakumatwa akulengesha bashilumamba ba ndilyo kulwana cishi ca Babiloni. Bashilumamba ba ndilyo balaakwiimikana mumisena yabo akucilwana. Balaakucilwana akucikoma. Mifwi yabo ilaakunoolibo anga mbapalu abo batabooli maansabo.

¹⁰ Aboobo bene Babiloni balaakusaalwa. Boonse abo beshi bakabasaale balaakubwesa mbuli mbobasuni. Nebo neMwaami Lesa ndaamba.”

Cishi ca Babiloni mbocakakomwa

¹¹ Mwaami Lesa waamba ayi, “Nobene Babiloni mulikondetwe akusangalala, mwebo nomwakasaala mushobo wangu. Mwakatambala anga niŋombe itoolyatoola shili anga ngamaila akulila bweenka bulila maaki.

¹² Paceebo ceeco ndabala yanu inene ilaakunyumfwa nsoni. Musena uyo momwakashalilwa ulaakusebaanishikwa. Bene Babiloni balaakuba mushobo uniini kwiinda imwi yoonse. Cishi cabo cilaakuba luyanga, ee, cishi ciyumu alimwi citacite acimenaamo.

¹³ Ceebo ca bukali bwangu nebo neMwaami Lesa, taaku weshi akekale mundabala ya Babiloni tubili. Sombi ndabala ilaakubeta limwi matongo. Boonse abo beshi bakanokwiindaamo balaakuloonda akuseka pamapensho oonse eshi akacitikeemo.

¹⁴ “Amwiimikane mumisena yanu ya nkondo mushinguluke Babiloni noonse nobeshimata. Amuwaale mifwi yanu yoonse! Kutabi mifwi njeshi mushiyewo, ceebo bakabishisha nebo neMwaami Lesa.

¹⁵ Amucite ciyobeyobe ca nkondo kumbasu shoonse! Bene Babiloni balyaaba mumaansa a balwani, maandaabo alaamfu awa amalinga abo amwayoolwa. Mukwiinga uku nkuboosha cishole kwangu nebo neMwaami Lesa, amubabooshele cishole. Amubacitile bweenka mbobakacitila babyaabo.

¹⁶ Amulengeshe ayi muBabiloni mubule shikushanga nabi shikutebula ashicekeshi. Ceebo ca mupeeni wa shikulyatilila bantu, muntu womwi awomwi aaboolele kubene mishaabo, ee, boonse abacicile kucishi cine mishaabo.”

Kuboola kwa bene Isilaeli

¹⁷ Mwaami Lesa waamba ayi, “Bene Isilaeli balipalangenebo anga nimbelele shatandaanishikwa kunkalamu. Mutaanshi kubanyonyoola ngumwaami wa bene Asilya. Pesule wakapwayoola mafuwa abo nguNebukadinesa mwaami wa bene Babiloni.

¹⁸ Paceebo ceeco nebo neMwaami Lesa Shinkusu shoonse, Lesa wa bene Isilaeli, ndaakupa mulandu mwaami wa bene Babiloni acishi cakwe bweenka mbondakapa mulandu mwaami wa bene Asilya.

¹⁹ Sombi ndaakuboosha bene Isilaeli kucishi cabo. Lyalo balaakunoolya sha paKalundu ka Kamelo asha mucishi ca Bashani. Balaakunoolya kweelana ambobasuni shakulya isho sheshi shikanooswa patulundu twa Efuleemu alimwi aGilyadi.

²⁰ Ciindi ico caakushikila, milandu ilaakuyandoolwa kubene Isilaeli, sombi teshi ikacanikeewo. Shibiibi shilaakuyandoolwa kubene Juda, sombi taaku nabi comwi ceshi cikacanikeewo ceebo ndaakulekelela baabo mbweshi nkashiyeewo kutabacaya. Nebo neMwaami Lesa ndaamba.”

Koombolosha kwa Mwaami Lesa pabene Babiloni

²¹ Mwaami Lesa waamba ayi, “Amulwane bene Melataimu abaabo bekala kuPekodi. Amubatandaanye, mubacaaye akubanyonyoola cakumaninina. Mucite shoonse nshendamwaambila kucita.

²² Ciyobeyobe ca nkondo canyumfwika mucishi, ee, ciyobeyobe cakunyonyoola kunene.

²³ Babiloni wakapwayoola cishi coonse ca panshi anga ninsando. Ono nsando iyo yapwayoolwa njiyo cakumaninina! Mishobo imwi yoonse yakankamana kuceeco cacitika kucishi ca Babiloni.

²⁴ Ndakakuteya koose webo ocishi ca Babiloni, awebo wakacatwa kootana kwishiba. Wakacanwa akucatwa ceebo wakalwana ndime neMwaami Lesa.

²⁵ Ndacalula ŋanda ya shakulwanisha shangu. Mubukali bwangu ndashikusha ceebo nebo neMwaami Lesa Shinkusu shoonse ndicite ncito njeensuni kusebensa mucishi ca bene Babiloni.

²⁶ Amwise mubalwaane kuswa kulaamfu. Amupwaye maandaabo akusungilamo shakulya akubunjika shakusaala mumilwi milwi mbuli shili anga ngamaila. Mubanyonyoole cakumaninina kubule aucaalaawo.

²⁷ Amucaye bashilumamba babo boonse! Ee, boonse amubacaaye cakumaninina! Mapensho kuli mbabo mukwiinga bushiku bwabo bwashikila. Ncakwiila ciindi cabo cakupekwa mulandu cashikila.

²⁸ “Amunyumfwe kubaabo bakacica nkondo kuBabiloni mbobatokwaambilisha kuSiyoni ayi nebo neMwaami Lesa, Lesa wabo ndaboosha cishole ee, kuboosha cishole ceebo ca Ŋanda yangu.

²⁹ “Amwiite beshimata ayi balwane Babiloni, ee, boonse abo bawaala mifwi. Mushinguluke ndabala iyo. Mutaleeki nabi womwi ayi aloboke. Amwiilambule pamicito ya njiyo. Amwiicitile bweenka mboyakacitila bamwi mukwiinga wateteesha ndime neMwaami Lesa, Usalalite wa bene Isilaeli.

³⁰ Aboobo bacikula bwangu bamumo balaakukungubala mumikwakwa ya ndabala iyo. Bashilumamba boonse bekalaamo balaakunyonyoolwa pabushiku ubo. Nebo neMwaami Lesa ndaamba.”

³¹ Mwaami Lesa Shinkusu shoonse waamba ayi, “Bona, ntookulwana webo ocishi cilisumpula ceebo bushiku bwako bwakupekwa mulandu bwashikila.

³² Mushobo wako ulisumpula ulaakulisuntula akuwa. Taaku weshi akoobuushe. Ndaakutenta mandabala ako shintu shoonse shishingulukite shilaakunyonyoolwa.”

³³ Mwaami Lesa Shinkusu shoonse waamba ayi, “Bene Isilaeli abene Juda balyatililwa. Abo bakabatola busha batoobalama cakutabashiila musena, ee, cakutabalekaawo ayi baloboke, sobwe.

³⁴ Nakubi boobo nebo neShikubalubula ndicite nkusu. Mwaami Lesa Shinkusu shoonse ndyeliina lyangu. Ndushinisho ndaakubafuna akuleta luumuno mucishi cabo. Sombi ndaakumana luumuno pabaabo bekala muBabiloni.”

³⁵ Mwaami Lesa waamba ayi, “Bene Babiloni abacaikwe amupeeni! Abacaikwe abo bekala muBabiloni pantu pomwi abacinenenene alimwi abasankwa basongo!

³⁶ Bacaikwe amupeeni balaluki bamumo babeshi! Baba baluya! Bacaikwe amupeeni bashilumamba ba mumo! Ncakwiila baliloondete abuumbi.

³⁷ Maaki a mumo ashikoci ashinyonyoolwe pantu pomwi abashilumamba boonse baswamashi! Nkusu shabo shamana. Aapwaikwe maandaabo akusungilamo buboni! Ndushinisho buboni bwa ngawo bulaakusaalwa.

³⁸ Cilanga acibe kumilonga ya mumo! Ayalo itooyuminwa! Cilaakucitika ceebo ncishi ca shibumbwabumbwa shiyoosha. Shibumbwabumbwa isho shakalengesha bantu kuba baluya.

³⁹ “Paceebo ceeco banyama ba muluyanga abasuntwe mbweshi bakanookalaamo, abalo bamwiina mweshi bakanookala. Mumashalane atoosa, bantu teshi bakekaleemo tubili.

⁴⁰ Bweenka nebo neLesa mbondakanyonyoola Sodoma aGomola pantu pomwi amandabala akalinga kushingulukite cakwaamba ayi taaku muntu wakekalaamo tubili, mbweeke ubo taaku weshi akekale muBabiloni tubili. Nebo neMwaami Lesa ndaamba.”

⁴¹ “Amubone! Likoto lya bashilumamba lyaashika kuswa kumatwa. Mushobo unene abamaami baanji bacite nkusu basonkomonwa kweela cishi ca panshi.

⁴² Banyamuna mata amasumo, mbantu beshilunkutwe alimwi batacite nkumbu. Batooyoomabo anga ngamaaba apalweenge mbuli mbobatoosa kabatantite pamaaki. Balilibambite kale kwisa mukukulwana webo ondabala ya Babiloni.

⁴³ Mwaami wa bene Babiloni wanyumfwa makani apali mbabo, aboobo maansaakwe atontola. Buumba bwamucata, utoonyumfwabo anga ngumwanakashi uli pankata.

⁴⁴ “Bweenka mbuli nkalamu itooswa mumasaka a kuJoodani akuya kumafulo abotu, mbweshi nkatandaanye abene Babiloni kuswa kucishi cabo cakufwambaana. Lyalo mutanjilili uyo ngweshi nkasaale, ulaakweendelesha mushobo uyo. Ino ngani weelene andime uyo ukonsha kumpikisha? Anu ngumweembeshinshi uyo ukonsha kwiimikana kunembo lyangu?

⁴⁵ Paceebo ceeco amunyumfwe isho nebo neMwaami Lesa nshendakapinga pabene Babiloni, munyumfwe sheesho nsheensuni kucita kubantu abo. Bana babo boonse balaakukwelanishikwa akutolwa. Ndaakunyonyoola cishi cabo.

⁴⁶ Cishi coonse ca panshi cilaakutenkaana ceebo ca coongo ca kukomwa kwa cishi ca Babiloni. Kulila kwabo kulaakunyumfwika pakati ka mishobo imwi yoonse.”