Jelemiya 49 - Baibo Busansulushi Bwa Libuku Ili

Koombolosha kwa Mwaami Lesa pabene Amoni

¹ Pabene Amoni Mwaami Lesa wakaamba ayi, “Ino bali kuli baana basankwa bene Isilaeli? Sa taaku nabi womwi weenga wafuna cishi cabo? Ceebonshi balambila Moleki ncebabwesela cishi ca Gadi? Ceebonshi bantu bakwe ncebekalila mumandabala a ncico?

² Sombi ciindi cilaakushikila ndyeshi nkalishe lupeenga lwa nkondo kulwana Laba ndabala inene ya bene Amoni. Ndabala iyo ilaakuba matongo amandabala aishingulukite alaakutentwa. Kuswawaawo bene Isilaeli balaakutandaamo baabo bakalinga babatandaamo. Nebo neMwaami Lesa ndaamba.

³ “Amoolome, mwebo nobene Eshiboni ceebo ndabala yanu ya Ai yanyonyoolwa. Amwebo nomwikala mucishi ca Laba amufwale masaka mulile cabuumba. Amucice cakupilingana mumalinga anu ceebo lesa wanu Moleki ulaakutolwa mubusha pantu pomwi abapailishi alimwi abacinenenene bakwe.

⁴ Mwebo nobantu batashomeki, ceebonshi mulalilumbaisha? Mwebo nkusu shanu shamana. Ceebonshi mulicinkite manungo mububoni bwanu akwaamba ayi, ‘Anu ngani weenga watulwana?’

⁵ Nebo neMwaami Lesa Shinkusu shoonse ndaakumuletela shiyoosha kuswa kumbasu shoonse. Noonsebo mulaakutandaanishikwa, cakwaamba ayi taakuuwo aweshi akabunganye tubili abo beshi bakacice.

⁶ Nakubi boobo ndaakulengesha bene Amoni kuswitilila alimwi munshiku shitoosa. Nebo neMwaami Lesa ndaamba.”

Koombolosha kwa Mwaami Lesa pabene Edomu

⁷ Pabene Edomu Mwaami Lesa Shinkusu shoonse wakaamba ayi, “Sa busongo bwakamana muEdomu? Sa beshikupandaako maano bakamana? Sa busongo bwabo bwakashimingana?

⁸ Amusanduluke mucice, muye muyube mushimfwengo shilaamfu mwebo nomwikala kuDedani. Nebo ndaakuleta mapensho pabamulunyungu lwakwe Esau ciindi ndaakubapa mulandu.

⁹ Bantu ndibayapa minyansa balashiyaako iniini. Na beepi bamupolela mashiku balabwesabo nshebasuni.

¹⁰ Sombi nebo ndaakubwesa shintu shoonse sha bamulunyungu lwakwe Esau akumushiya maansabo. Ndaakuyubulula misena yabo iyo njebayubamo kwaamba ayi bakabule kwakuyuba. Bene Edomu boonse balaakuloba, taaku nabi womwi weshi akacaaleewo.

¹¹ Amushiye banabanshiwa banu, ndaakubalama. Bamukalubinje banu abalo balakonsha kucinka manungo muli ndime.”

¹² Mwaami Lesa waamba ayi, “Na bantu abo batakalinga kweelete kunwa munkomeshi ya bukali bwangu, bakanwa, ceebonshi mutooyeeya ayi mwebo teshi mukapekwewo mulandu? Teshi mukalekwebo, sombi mulyeelete kunwaamo.

¹³ Ndashomesha cakulumbila muliina lyangu ayi, ‘Ndabala inene ya Bosila ilaakunyonyoolwa akuba matongo, cintu ceelete kuloondwa, kusekwa alimwi akushinganwa. Ncakwiila mandabala oonse ashingulukite alaakuba matongo kwalyoonse alyoonse.’ Nebo neMwaami Lesa ndaamba.”

¹⁴ Ndakanyumfwa nkombe yakaswa kuMwaami Lesa yakwaamba ayi, “Shikumwiimikaninako wakatumwa kumishobo ya bantu mukwaamba ayi, ‘Amulibungebunge mulwane bene Edomu! Amunyamuke muye kunkondo!’

¹⁵ Ndaakumulengesha kuceya pamishobo yoonse. Bantu boonse balaakumunyansha.

¹⁶ “Nobene Edomu kulisumpula kwa myoyo yanu, kwamubeca. Boowa mbomulengesha bamwi, bwamucenjeeka mukwiinga mulekala mulilinga lya myaandami. Ee, mukwiinga mulekala peculu lya tulundu tulaamfu. Ono nabi mulekala peculu peene anga nciinswa ca mumbankwashi, nebo ndaakumuboosha panshi. Nebo neMwaami Lesa ndaamba.

¹⁷ “Cishi ca Edomu cilaakuba cintu ceelete kuloondwa. Boonse abo beshi bakanokwiindaamo balaakucatabo pamilomo akuseka ceebo cakunyonyoolwa uko kweshi kukacitike.

¹⁸ Bweenka ndabala inene ya Sodoma aya Gomola mbwaakanyonyoolwa pantu pomwi amandabala akalinga kwaashingulukite, mbweeke ubo cishi ca Edomu mbweshi cikacitwe. Taaku muntu nabi womwi weshi akekaleemo tubili. Nebo neMwaami Lesa ndaamba.

¹⁹ “Bweenka mbuli nkalamu itooswa mumasaka a kuJoodani akuya kumafulo abotu, mbweshi nkatandaanye abene Edomu kuswa kucishi cabo cakufwambaana. Lyalo mutanjilili uyo ngweshi nkasaale, ulaakweendelesha mushobo uyo. Ino ngani weelene andime uyo ukonsha kumpikisha? Anu ngumweembeshinshi uyo ukonsha kwiimikana kunembo lyangu?

²⁰ Paceebo ceeco amunyumfwe isho nebo neMwaami Lesa nshendakapinga pabene Edomu, munyumfwe sheesho nsheensuni kucita kubaabo bekala kundabala ya Temani. Bana babo boonse balaakukwelanishikwa akutolwa. Ndaakunyonyoola cishi cabo.

²¹ Cishi coonse ca panshi cilaakutenkaana ceebo ca coongo ca mishinga yabo. Kulila kwabo kulaakunyumfwika akuLweenge Lusalala.

²² Amubone! Balwani babo balaakufupula Bosila anga ngumumbankwashi ufungulwite mapapaminwa akwe pacishi ico. Bushiku ubo myoyo ya bashilumamba bene Moabu ilaakubabo anga ngumoyo wa mwanakashi uli pankata.”

Koombolosha kwa Mwaami Lesa pabene Damasikasi

²³ Mwaami Lesa utokwaamba pandabala ya Damasikasi ayi, “Bene Amati abene Apadi bapenshekwa mumyoyo yabo ceebo banyumfwa makani abiibi. Balityongookite akupenga mumyoyo yabo bweenka mbuli maanshi a mulweenge atoomunibo.

²⁴ Bene Damasikasi banyumfwa mumanungo mwatontola, basanduluka ayi bacice ceebo banyumfwa boowa. Myoyo yabo yacisa alimwi banyonwa mumala, ee, banyonwabo anga ngumwanakashi uli pankata.

²⁵ Ndabala yanu inene icite mpuwo yakalinga kunkondelesha abuumbi kale kale. Sombi bulya ntoomucenjesha ayi, ‘Amuloboke kamucicite ciindi.’

²⁶ Pabushiku ubo ndushinisho bacikula bwangu ba mumo balaakucaikwa mumikwakwa. Bashilumamba ba ndabala iyi balaakunyonyoolwa.

²⁷ Ndaakutenta lubumbu lwa Damasikasi ashiyubilo shakayaka mwaami Beni Adadi. Nebo neMwaami Lesa Shinkusu shoonse ndaamba.”

Koombolosha kwa Mwaami Lesa pamukowa wakwe Keda acishi cakwe Asoli

²⁸ Pamukowa wakwe Keda ashipansha sha cishi cakalinga kweendeleshekwa aAsoli, isho Nebukadinesa mwaami wa bene Babiloni nshaakalwana, Mwaami Lesa utokwaamba ayi, “Amunyamuke, mulwane mukowa wakwe Keda akunyonyoola bantu bakwicwe.

²⁹ Matente amatanga ashifubwa abo shilaakutolwa, shisani shakushitilishisha matente shabo shilaakutolelwa pantu pomwi abuboni bwabo boonse alimwi angamela. Bantu balaakuboolobesha ayi, ‘Shiloondesha shilibo kumbasu shoonse!’ ”

³⁰ Mwaami Lesa waamba ayi, “Mwebo nobene Asoli amucice cakufwambaana! Kamuya mukekale mushimfwengo shilaamfu ceebo Nebukadinesa mwaami wa bene Babiloni utoomupinga. Kuli muyeeyo ngwaamupangila.

³¹ “Amunyamuke mukalwane mushobo wa bantu uliibite. Toolisukami nabi comwi. Mushobo uyo toocite ndabala icite mwinjililo nabi mpingilo. Ulilishiitilebo kwakubula akwakucicila.

³² “Ngamela shabo shilaakusaalwa, matanga oonse a shifubwa shabo alaakutolwa. Bantu abo bacesa mitwi palubasu ndaakubapalanganishisha kumbasu shoonse akubaletela mapensho kuswa kumbasu shoonse.

³³ Asoli ulaakuba musena wa bamwaaba. Ulaakuba matongo kwalyoonse alyoonse. Taaku muntu weshi akekaaleko tubili. Nebo neMwaami Lesa ndaamba.”

Koombolosha kwa Mwaami Lesa pabene Elamu

³⁴ Kumatalikilo a bwaami bwakwe Sedekiya mwaami wa bene Juda, Mwaami Lesa Shinkusu shoonse wakaŋambila pacishi ca Elamu nebo neJelemiya ayi,

³⁵ “Ndaakucaya beshimata boonse bene Elamu abo balengesha cishi ca Edomu kuyuma abuumbi.

³⁶ Ndaakulengesha muuwo kupuupa pacishi ca Elamu kuswa kumbasu shoonse shone. Ndaakupalanganya bantu bekalaamo kumbasu shoonse kushikila kukabule acishi nabi comwi uko bene Elamu beshi bakacice nkondo nkweshi bakabule kuya.

³⁷ Ndaakusansoola bene Elamu kunembo lya balwani babo, ee, kunembo lya baabo bafwima buumi bwabo. Ndaakubaletela mapensho, ee, bukali bwangu buyoosha. Ndaakubatandaanya amupeeni kushikila bakaloobe.

³⁸ Kuswawaawo ndaakwiimika cuuna cangu ca bwaami kuElamu akunyonyoola mwaami wa nkuko abacinenenene bakwe.

³⁹ Nakubi boobo ndaakulengesha bene Alamu kuswitilila alimwi munshiku shitoosa. Nebo neMwaami Lesa ndaamba.”