Jelemiya 48 - Baibo Busansulushi Bwa Libuku Ili

Kunyonyoolwa kwa cishi ca Moabu

¹ Pacishi ca Moabu Mwaami Lesa Shinkusu shoonse, Lesa wa bene Isilaeli waamba ayi, “Mapensho kundabala ya Nebo ceebo ilaakunyonyoolwa. Ndabala ya Kilyataimu ilaakulenshekwa nsoni akukomwa. Shiyubilo sha njiyo shilaakupwayoolwa.

² Cishi ca Moabu teshi cikalumbaishikweewo tubili. Mundabala ya Eshiboni bantu balaakupinga kubukila cishi ico. Balaakwaamba ayi, ‘Kamwisa tulobye mushobo uyu!’ Awebo ondabala ya Madimeni ulaakutontoshekwa, Makoto a bashilumamba alaakwisa mukukulwana.

³ Amunyumfwe kulila kutooswa kuOlonaimu, kulila kwa mapensho aanji akunyonyoolwa.

⁴ “Cishi ca Moabu cilaakupwayoolwa, abana ba ncico balaakulila.

⁵ Balaakululama nshila iya kuLuwiti, kabaya bushinshimukaako pakulila, mumukwakwa uya kuOlonaimu mibila yakunyonyookelwa ilaakunyumfwika.

⁶ Balaakoolobesha ayi, ‘Amucice, mupulushe buumi bwanu. Amucicishe anga nimbongolo ya muluyanga!’

⁷ “Nobene Moabu, ceebo cakwaamba ayi mulicinkite manungo mumicito yanu amububoni bwanu, amwebo noonse mulaakutolwa busha. Alakwe lesa wanu Kemoshi ulaakutolwa busha pantu pomwi abapailishi bakwe alimwi abacinenenene bakwe.

⁸ Shikunyonyoola ulaakunyonyoola mandabala oonse, cakutacaalaawo nabibo yomwi. Acalo cinyika cilaakunyonyoolwa pantu pomwi acitunta ceelene. Nebo neMwaami Lesa ndaamba.

⁹ Amusanseele mwiinyo mucishi coonse ca Moabu ayi myuunda ya ncico ifwe. Mandabala a ncico alaakuba matongo. Ncakwiila kulaakubula amuntu weshi akekaleemo.

¹⁰ “Aashinganishikwe uyo utasuni kusebensa ankusu ncito yangu neMwaami Lesa! Aashinganishikwe uyo utasuni kucaya amupeeni wakwe.”

Mandabala anene a mucishi ca Moabu mbwaakanyonyoolwa

¹¹ Mwaami Lesa waamba ayi, “Bene Moabu balishiite cakuliiba kuswabo kukale kale. Tabana kutolwaawo kale mubusha. Balibo anga nguwaini wabikwa ayi ukalile, kutalonshekwa kuswa munongo imwi akutilwa munongo imwi. Mise ya nguwo ilibo mushobo womwi, ee, kununkila kwa nguwo takukwe kusandulwaawo.

¹² Sombi ciindi cilaakushika, ndyeshi nkatume bantu kwisa mukupuumuna bene Moabu mbuli waini munongo. Balaakutila waini munongo isho akushipwayoola mutupanshapansha.

¹³ Lyalo bene Moabu balaakulisenda kuli Kemoshi lesa wabo bweenka mbuli bene Isilaeli mbobakalisenda ndibakalinga kucinkite manungo muli Betelo.

¹⁴ “Ino inga mwaamba buyani ayi, ‘Swebo tuli bashilumamba beshinkusu bacibwene kulwana?’

¹⁵ Cishi ca Moabu cilaakunyonyoolwa amandabala anene a mumo alaakusaalwa. Bacikula bwangu ba ncico babotu balaakucaikwa. Nebo neMwaami wiitwa ayi Mwaami Lesa Shinkusu shoonse ndaamba.

¹⁶ Kuwa kwa cishi ca Moabu kulibo muliimfwa. Kunyonyoolwa kwa ncico kulaakwisabo onoono.

¹⁷ “Amulilileko mushobo uyo noonse nomuushingulukite. Amuulilileeko mwebo noonse nomwishi mpuwo ya nguwo. Amwaambe ayi, ‘Nkooli ya bwaami bucite nkusu yanyonyooka buyani? Bwaami bwa bulemu bwanyonyoolwa buyani?’

¹⁸ Mwebo nomwikala kuDiboni amuseluke muswe pashuuna shanu sha bulemu akwikala panshi payumu nta. Uyo weshi akanyonyoole Moabu ulaakwisa mukumulwana amwebo akunyonyoola mandabala anu acite malinga.

¹⁹ Amwiimikane kweela nshila mweebele mwebo nomwikala muAlowa. Amwiipushe musankwa utoocica amwanakashi waloboka ayi, ‘Nciinshi anu cacitika?’

²⁰ Balaakukumbula ayi, ‘Cishi ca Moabu casebaana ceebo capwayoolwa. Amoolome akulila! Amwaambilishe muya Mulonga wa Anoni ayi cishi ca Moabu canyonyoolwa.’

²¹ “Koombolosha kwesa kucitunta ceelene, nkokwaamba ayi kuOloni, Jaasa, Mefaati,

²² Diboni, Nebo, Beti Dibulataimu,

²³ Kilyataimu, Beti Gamulu, Beti Meyoni,

²⁴ Kelyoti, Bosila, akumandabala oonse a kuMoabu, ee, kumandabala ali kulaamfu aali pafwaafwi.

²⁵ Nkusu sha mucishi ca Moabu shatimbulwako, lyaansa lyankusu lya Moabu lyanyonyoolwa. Nebo neMwaami Lesa ndaamba.”

Bene Moabu balaakulengeshekwa kuliceesha

²⁶ Mwaami Lesa waamba ayi, “Amulengeshe bene Moabu ayi bakolwe ceebo cakukaka nebo neMwaami Lesa. Abaalabangane mumalushi abo akusekwa.

²⁷ Sa mwebo nobene Moabu teshi ndimwe mwakalinga kuseka bene Isilaeli? Sa bakacatwa pakati ka bapambi ico cimulengesha kunoopukumunabo mitwi mukubashibuluka kulilabo na mwaamba pali mbabo?

²⁸ “Mwebo nomwikala mucishi ca Moabu, amuswe mumandabalaanu. Kamuya mwikale mutulundu tulaamfu twa mabwe. Amube anga nimpolobe ipanga ciinswa ca njiyo kumwinjililo wa cimfwengo.

²⁹ “Ndakanyumfwa bene Moabu mbobalisumpula. Ncakwiila balalisumpula akulyuuma mushaamba. Ee, balalisumpula alimwi mbeshi kulinaamuna. Balilisuni abuumbi mumyoyo yabo.

³⁰ Kanyansho kabo nebo neMwaami Lesa ndikeshi, sombi taaku mbokabete. Kulilumbaisha kwabo takucite mpindu.”

³¹ Paceebo ceeco ndalilila bene Moabu, ncakwiila ndalilila bene Moabu boonse. Ndalilila bantu bene Kili Aleseti.

³² Ndamulilila bweenka butoolila bantu ba kuJasa, kulila minyansa ya kuSibuma. Misampi ya njiyo ilasotoka Lweenge lwa Mwiinyo akuya mukushika kuJasa. Amubone shikunyonyoola wanyonyoola shisepo shimwi sha cilimo aminyansa isho shapya kale.

³³ Kusangalala akukondwa kwakushikwaamo mucishi cicite bulongo bubotu ca Moabu. Ndakakasha waini kuswa mushilindi shakutyaninamo minyansa. Taaku nabi womwi ushikutyana minyansa woolobesha cakusangalala. Nakubi kwaamba ayi kuli koolobesha, teshi koolobesha kwakusangalala, sobwe.

³⁴ “Mibila yabo itoonyumfwika kuswa kuEshiboni kuya mukushika kuEleyale akuJaasi, kuswa kuSowa kuya mukweela akuOlonaimu aEgilati Shelishiya ceebo maanshi amuKalonga ka Nimulimu oonse ayuma.

³⁵ Mucishi ca Moabu ndaakukasha baabo babenga milambu kumisena yabo yakulambililaako ya patulundu akutenta tununkila kabotu kubalesa babo. Nebo neMwaami Lesa ndaamba.

³⁶ “Paceebo ceeco moyo wangu utoolilila bene Moabu ee, utoolilila bantu ba kuKili Aleseti bweenka mbuli muntu utoolisha lwiimbo lwa malilo mumutoolilo ceebo buboni bwabo bwaloba.

³⁷ Mitwi yoonse ilicesetwe, andesu shoonse shakakululwa. Boonse bakalinengoola kumaansa akufwala masaka mumakome abo.

³⁸ Pashiluli shoonse sha mucishi ca Moabu amumisena icanika bantu baanji taamu shimwi shitoonyumfwika, sombibo kulila. Batoolila ceebo ndapwaya Moabu anga ninongo itacite wiisuni.

³⁹ Amubone mbocapwayoolwa! Amunyumfwe mbobatokooloma! Amubone mbocafutata ceebo ca nsoni. Cishi ca Moabu casekwa akuba ciloondesha kubaabo bacishingulukite. Nebo neMwaami Lesa ndaamba.”

Kubula kwakucicila kwa bene Moabu

⁴⁰ Mwaami Lesa waamba ayi, “Amubone! Mushobo umwi ulaakufupula Moabu anga ngumumbankwashi ufungulwite mapapaminwa akwe pacishi ico.

⁴¹ Mandabala anene amandabala acite malinga alaakukomwa. Bushiku ubo myoyo ya bashilumamba bene Moabu ilaakubabo anga ngumoyo wa mwanakashi uli pankata.

⁴² Mushobo wa bene Moabu ulaakunyonyoolwa cakwaamba ayi teshi ukabewo tubili mushobo ceebo wakakaka ndime neMwaami Lesa.

⁴³ Ncakwiila shiyoosha, shilindi alimwi atoose shitoomulindila nobene Moabu.

⁴⁴ Uyo woonse weshi akaloboke shiyoosha ulaakuwita mucilindi. Uyo woonse weshi akasubuke mucilindi ulaakucatwa mutoose ceebo ngumwaaka wakupa mulandu bene Moabu. Nebo neMwaami Lesa ndaamba.

⁴⁵ “Bantu abo beshi bakacice nkondo kucishi cine mishaabo, balaakweenkemanabo kuEshiboni ceebo mulilo ulaakunyaka mundabala iyo. Ulaakunyakila mukati mwiine muSiyoni akunyaka muya nyinsa alimwi apatulundu twa bene Moabu beshikulisumpula abo basuni kulwana.

⁴⁶ Mapensho kuli ndimwe nobene Moabu! Bantu abo bakalinga kulambila Kemoshi bamana kunyonyoolwa. Abalo bana banu basankwa abanakashi batolwa busha.

⁴⁷ “Nakubi boobo ndaakulengesha bene Moabu kuswitilila alimwi munshiku shitoosa. Nebo neMwaami Lesa ndaamba.” Anu peenka apa mpopeela makani akoomboloshekwa kwa cishi ca Moabu.