Jelemiya 47 - Baibo Busansulushi Bwa Libuku Ili

Makani a Mwaami Lesa pabene Filisiti

¹ Mwaami Lesa wakaŋambila nebo neJelemiya maswi aya pabene Filisiti, Falawo kaatana kulwana bene Gasa.

² Mwaami Lesa waamba ayi, “Amubone maanshi mbwaatoonyamooka kumatwa. Alaakunookunkabo anga ngumulonga wasefuka. Ncakwiila alaakufwekelesha cishi ashintu shoonse shiliimo, mandabala abantu abo bekalaamo. Bantu balaakulila, boonse bekala mucishi ico balaakulila cakoolobesha.

³ Balaakunyumfwa minkiti ya shoondo sha maaki, coongo ca shikoci sha balwani babo akuyobeka kwa mawilo a nshisho. Bamashali basankwa teshi bakaboole kwisule mukufuna bana babo. Maansaabo alaakunooloketebo.

⁴ Ee, bushiku bwashikila bwa kunyonyoola bene Filisiti boonse akucaya boonse bakacaalaawo abo beenga bacafwa Taya aSidoni. Nebo neMwaami Lesa ndaakunyonyoola bene Filisiti abo boonse bakaswa kuloombe lwa lweenge lwa kuKileti.

⁵ Bene Gasa balaakukulula misusu mumitwi yabo mukulila cabuumba. Bene Ashikeloni balaakuumunabo tontolo. Mwebo nomwakacaala muliwesa, citooba ciindi cilaamfu buyani kamulinengoola?

⁶ Mutootama ayi, ‘Maawe omupeeni wa Mwaami Lesa, citooba ciindi cilaamfu buyani koocayabo kwakutookesha? Boolela mucipokolo cako, wikale mumo kwaamba ayi wookeshe.’

⁷ Ino inga wookesha buyani ceebo nebo neMwaami Lesa ndootuma kuncitila mulimo. Ee, ndootuma kulwana Ashikeloni abantu boonse bekala kuloombe lwa lweenge.”