Jelemiya 46 - Baibo Busansulushi Bwa Libuku Ili

Bene Ijipiti mbobakakomwa kuKakemishi

¹ Mwaami Lesa wakaŋambila nebo neJelemiya maswi aya pamishobo ya bantu.

² Wakaamba palikoto lya bashilumamba bakwe Falawo Neko mwaami wa bene Ijipiti. Bashilumamba abo bakakomwa kuli Nebukadinesa mwaami wa bene Babiloni kuKakemishi kuMulonga wa Yufuletisi. Bakakomwa mumwaaka wane wa bwaami bwakwe Jeoiyakimu mwanaakwe Josiya mwaami wa bene Juda. Wakaamba ayi,

³ “Amubambe mayawo anu, anene aaniini oonse, muye kunkondo!

⁴ Amwaange maaki anu, mutantewo! Amwiimikane mumisena yanu! Amufwale shimpoompo shanu sha nkondo! Amunone masumo anu akufwala shakulwanisha shoonse!

⁵ “Ino ndabonanshi? Baloonda, batooboolela muunshi. Bashilumamba babo bakomwa. Bacica cakufwambaana kutacebuka amwisule. Shiyoosha shili kumbasu shoonse. Nebo neMwaami Lesa ndaamba.

⁶ “Balya boobu kumyeendo tabakoonshi kucica nabi beshinkusu tabakoonshi kubaloboka. Kumatwa kulubasu lwa Mulonga Yufuletisi balisuntula akuwa.

⁷ Ino mbaani aba batoonyamuka anga nguMulonga wa Nailo, ee, anga ngumulonga utoosefuka.

⁸ Mbene Ijipiti batoonyamuka anga nguMulonga wa Nailo ee, anga ngumulonga utoosefuka. Bene Ijipiti baamba ayi, ‘Tulaakunyamuka akufwekelesha cishi coonse ca panshi. Tulaakunyonyoola mandabala abantu bekalaamo.’

⁹ Akutumbe kasuko nomaaki! Amucaile cankusu mwebo nobeshishikoci! Kamuya kunembo mwebo nobashilumamba bacibwene kulwana, nobene Kushi anobene Libya nomunyamuna mayawo, ee, anobene Lidiya nomulwanisha mata.”

¹⁰ Sombi bushiku ubu mbwa Mwaami Lesa, Mwaami Lesa Shinkusu shoonse. Mbushiku bwakuboosha cishole, ee, cishole pabalwani bakwe. Mupeeni ulaakucaya tibili ukakute bulowa ee, kushikila nyotwa ya bulowa ikamaane. Mwaami Lesa Shinkusu shoonse ulaakubenga mulambu mucishi cakumatwa kulubasu lwa Mulonga wa Yufuletisi.

¹¹ “Kamuya kuGilyadi mukalete musamu, mwebo nobene Ijipiti Mutoobunjikabo misamu itacite ncito ceebo taaku ceshi cikamushilikeewo, sobwe.

¹² Mishobo ya bantu ilaakunyumfwa shakusebaana kwanu, Kulila kwanu kulaakunyumfwika mucishi coonse ca panshi. Bashilumamba banu balaakunoolimbana akuwita panshi boonse pantu pomwi.”

Kwisa kwakwe Nebukadinesa

¹³ Mwaami Lesa wakaŋambila nebo neJelemiya makani aya pakwisa kwakwe Nebukadinesa mwaami wa bene Babiloni mukulwana Ijipiti. Wakaamba ayi,

¹⁴ “Ambilisha muIjipiti, olobesha muMigidolu, ee, woolobeshe amuMemfisi alimwi amuTaapanesi ayi, ‘Amuye mumisena yanu akulibambila ceebo boonse abo mbomubambenaabo bamana kunkondo.’

¹⁵ Ceebonshi Apisi lesa wanu ncaakawita panshi? Mwaami Lesa ngowamuwisha panshi.

¹⁶ Bashilumamba banu balisuntula akuwa. Womwi awomwi utokwaambila mubye ayi, ‘Amunyamuke, katiya kubene misheesu kucishi cine misheesu, tucice mipeeni ya beshikutulyatilila.’

¹⁷ “Lyalo balaakwaamba ayi, ‘Falawo mwaami wa bene Ijipiti ngushikulisumpulabo uyo wakasowa ciindi cakwe.’

¹⁸ “Nebo neMwaami Lesa Shinkusu shoonse ndi Mwaami. Ncakwiila nebo ndi Lesa muumi. Kulaakwisa umwi uli anga nkalundu ka Tabo pakati ka tulundu, ee, anga nkalundu ka Kamelo kulubasu lwa lweenge.

¹⁹ Amulongele buboni bwanu ceebo mutooya mubusha, mwebo nomwikala muIjipiti. Ndabala ya Memfisi itoonyonyoolwa akuba matongo cakubula aukalaamo.

²⁰ “Cishi ca Ijipiti ncibotubo anga nimpwishi yaana, sombi mpobe shitoosa mukwiiluma kuswa kumatwa.

²¹ Bashilumamba baliimo abo bakoolwa balibo anga mboombe basaninwa kabotu. Nakubi boobo abalo balaakucica, teshi bakeemikaneewo, sobwe. Ee, bushiku bwakunyonyoolwa bwabapolela, ciindi cabo cakupekwa mulandu cashikila.

²² Lyalo Ijipiti ulaakulilabo anga ngulukonkola utoocica, bashilumamba ba balwani babo baakunoobasena pafwaafwi. Balaakumulwana atweembe anga mbantu beshikutema shisamu.

²³ Balaakutema misaansa yakwe, nabi ishinke buyani. Mbaanji abuumbi kwiinda cisoshi, ndushinisho tabakonsheki kubelengwa.

²⁴ Bene Ijipiti balaakulenshekwa nsoni. Balaakwaabwa kubantu bakumatwa. Nebo neMwaami Lesa ndaamba.”

²⁵ Mwaami Lesa Shinkusu shoonse, Lesa wa bene Isilaeli waamba ayi, “Ntooyanda kupa mulandu Amoni lesa wa bene Tebesi, Falawo, cishi ca Ijipiti, balesa abamaami ba ncico pantu pomwi abaabo bacinkite manungo muli Falawo.

²⁶ Ndaakubaaba mumaansa a baabo babafwima, ee, kuli Nebukadinesa mwaami wa bene Babiloni abamatanjilili ba bashilumamba bakwe. Pesule lya sheeshi, bantu balaakuboola alimwi muIjipiti akunookala bweenka mbuli kale kale. Nebo neMwaami Lesa ndaamba.”

Mwaami Lesa ulaakupulusha bantu bakwe

²⁷ “Mutaloondi nobamulunyungu lwakwe Jakobo, bantu bangu. Mutabi aboowa nobene Isilaeli. Ndushinisho ndaakumupulusha kuswa kucishi cakulaamfu, ee, bamulunyungu lwanu kuswa mucishi ca busha. Balaakucana luumuno akutabililwa cakwaamba ayi taakuuwo nabi womwi weshi akabaloondeshewo tubili.

²⁸ Ndi amwebo alimwi ndaakumupulusha, Nabi nkanyonyoole mishobo yoonse mulya mondakamupalanganishisha, mwebo teshi nkamunyonyoole cakumaninina, sobwe. Ndaakumupa mulandu, sombi ndaakumoombolosha cakutamunyengelela. Teshi nkamulekebo kwakutamupa mulandu, sobwe. Nebo neMwaami Lesa ndaamba.”