Jelemiya 44 - Baibo Busansulushi Bwa Libuku Ili

Maswi a Mwaami Lesa kubaJuda bakalinga muIjipiti

¹ Mwaami Lesa wakaŋambila nebo neJelemiya pabaJuda boonse bakalinga kwikala kuIjipiti mundabala inene ya Migidolu, Taapanesi aya Memfisi alimwi akucishi ca Patulosi.

² Mwaami Lesa Shinkusu shoonse, Lesa wa bene Isilaeli waamba ayi, “Mwakalibonena mapensho oonse ayo ngondakaletela ndabala ya Jelusalemu apamandabala oonse a muJuda. Asunu acili matongo. Taaku muntu wikalaamo

³ ceebo ca shibiibi nshebakacita. Bakasonkomona bukali bwangu mukwiinga bakalinga kutentela balesa bamwi tununkila kabotu akubalambila, ee, balesa abo, balo, webo nabi bamashali bako bakulukulu mbobatakalinga kwishi.

⁴ Mankanda aanji ndakalinga kutuma basebenshi bangu balaluki mukubaambila ayi, ‘Mutanoocita shintu ishi shilensha bunya isho nshempatite!’

⁵ Sombi tabakwe kunyumfwila nabi kubikako maano. Tabakwe kuswa kushibiibi shabo nabi kucileka kutentela balesa babo tununkila kabotu.

⁶ Paceebo ceeco ndakatila bukali bwangu bwiindaawo pamandabala a muJuda amumikwakwa ya muJelusalemu akwiinyonyoola cakuba matongo mbuli mboibete bulya.

⁷ “Ono nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Ceebonshi mutooliletela mapensho a mushobo uyo pamibili yanu? Sa mutooyanda kuleta kunyonyooka pabene Juda basankwa, banakashi, banike abakateta kwaamba ayi kubule aucaala?

⁸ Ino ceebonshi mutoosonkomona bukali bwangu ceebo cakulambila shibumbwabumbwa akunootenta tununkila kabotu kubalesa bamwi ba muIjipiti umo momwakesa mukwikala? Mutoolinyonyweshabo nobeene akulilengesha kuba cintu ceelete kushinganwa akusekwa pakati ka mishobo yoonse ya mucishi ca panshi.

⁹ Sa mwaluba shibiibi shakacita bamashali banu bakulukulu, bamaami abamakaabo, mwebo abamakaanu mucishi ca Juda amumikwakwa ya muJelusalemu?

¹⁰ Ono kushikila asunu tamuna kulibombyaawo, sobwe. Ncakwiila tamuna kundemekaawo nabi kukonkela milawo amilasho iyo njendakapa ndimwe alimwi abamashali banu bakulukulu.’

¹¹ “Paceebo ceeco nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Nebo ndishinishite kumuletela mapensho akunyonyoola cishi ca Juda coonse.

¹² Ndaakunyonyoola bene Juda bakacaalaawo abo bakalinga kushinishite kuya mukwikala kuIjipiti. Boonse balaakulobelaamo. Balaakufwita munkondo nabi kufwa kunsala kutalikilabo kubantu bataaku mbobabete kushikila akubaabo balemekwa. Balaakuba cintu ceelete kushinganwa, kuloondwa, kushibulukwa akusekwa.

¹³ Ndaakupa mulandu abo bekala muIjipiti wakubacaya kunkondo, kunsala alimwi akumwaalu bweenka mbondakapa mulandu bene Jelusalemu.

¹⁴ Taaku nabi womwi pabene Juda bakacaala abo bakaya mukwikala kuIjipiti weshi akaloboke nabi kupuluka kwaamba ayi aboolele kucishi ca Juda uko nkobasuni ayi bakaboolele akuya mukwikala. Taaku beshi bakaboolele, sombibo baniini beshi bakacice nkondo.’ ”

¹⁵ Mpomunyaawo basankwa boonse abo bakalinga kwishi ayi bamakaabo bakalinga kutentela balesa bamwi tununkila kabotu kubikaawo abanakashi boonse bakalingaawo, nkokwaamba ayi lyakalinga likoto lya bantu baanji abantu boonse abo bakalinga kwikala kuIjipiti alimwi akuPatilosi bakaŋambila nebo neJelemiya ayi,

¹⁶ “Teshi tunyumfwewo maswi ayo ngowatwaambila muliina lya Mwaami Lesa!

¹⁷ Sombi ndushinisho swebo tunanoocita shoonse nshetwakaamba. Tunanootentela Mwaami mwanakashi Wakwiculu tununkila kabotu akumupa shipo sha shakunwa bweenka swebo abamashali besu bakulukulu, bamaami abacinenenene besu mbobakalinga kunoocita mumandabala a kuJuda amumikwakwa ya muJelusalemu. Paciindi ico twakalinga kucite shakulya shiinji alimwi katushiite kabotu. Taaku acakalinga kutupensha.

¹⁸ Ono kuswabo mpotwakacilekela kutenta tununkila kabotu kuMwaami mwanakashi Wakwiculu akumupa shipo sha shakunwa, taaku nshetubonaawo shibotu, sombi tutooya cimanabo kunkondo alimwi akunsala.”

¹⁹ Abalo banakashi bakanungaawo ayi, “Nditwakalinga kutentela Mwaami mwanakashi Wakwiculu tununkila kabotu akumupa shipo sha shakunwa, sa te bameebeesu bakalinga kwishiba ayi twakalinga kupanga shinkwa wamise uli anga ncikoshanyo cakwe akumupa shipo sha shakunwa?”

²⁰ Mpomunyaawo bantu boonse, basankwa abanakashi abo bakankumbula, nebo neJelemiya ndakabaambila ayi,

²¹ “Sa Mwaami Lesa taakwe kwiibaluka akuyeeya tununkila kabotu uto ntomwakalinga kutenta mumandabala a kuJuda amumikwakwa ya muJelusalemu, ee, mwebo, bamashali banu bakulukulu, bamaami, bacinenenene banu alimwi abantu ba mucishi?

²² Ono Mwaami Lesa ndyaakacileka kunoolangilishabo pamicito yanu ibiibi alimwi ashintu shilensha bunya nshemwakalinga kucita, cishi canu cakaba cintu ceelete kushinganwa, kuba matongo alimwi kwakubula amuntu wikalaamo bweenka mbocibete sunu.

²³ Ceebo mwakatenta tununkila kabotu kubalesa bamwi akubishisha Mwaami Lesa, kutamunyumfwila nabi kukonkela milawo amilasho yakwe, nceceeco mapensho aya nceesita pali ndimwe kweelana ambomubwene bulya.”

²⁴ Kuswawaawo nebo neJelemiya ndakaambila bantu boonse, kubikaawo abanakashi ayi, “Amukutike liswi lya Mwaami Lesa mwebo noonse nobene Juda nomuli muIjipiti.

²⁵ Mwaami Lesa Shinkusu shoonse, Lesa wa bene Isilaeli waamba ayi mwebo abamakaanu mwatondesha kale kumicito yanu nshemwakashomesha ndimwakaamba ayi, ‘Ndushinisho tulaakunoocita kweelana ambotwakashomesha cakulumbila ayi tulaakunootenta tununkila kabotu akupa shipo sha shakunwa kuMwaami mwanakashi Wakwiculu.’ Anu amutolelele! Kamucita nshemwakashomesha! Kamucita kweelana ambomwakashomesha cakulumbila!

²⁶ Ono amukutike liswi lya Mwaami Lesa, mwebo nobaJuda noonse nomuli muIjipiti. Waamba ayi, ‘Ndashomesha cakulumbila muliina lyangu linene ayi taaku nabi womwi wakaswa kuJuda ushiite kuli koonse muIjipiti weshi akasebenseshe tubili liina lyangu mukushomesha cakulumbila ayi, Bweenka mbocibete lushinisho ayi Mwaami Lesa Shinkusu shoonse ngumuumi.

²⁷ Nebo ndimulabilite kumucitila shintu shibiibi kuteshi shibotu, sobwe. Mwebo nobaJuda nomuli muIjipiti mulaakuloba kunkondo akunsala kushikila noonse mukanyonyooke.

²⁸ Sombi baniini pakati kanu balaakuloboka nkondo akuboolela kucishi ca Juda kuswa kuIjipiti. Lyalo baJuda abo beshi bakacaaleewo pabaabo bakesa mukwikala muIjipiti ndyeshi bakeshibe ayi ngamaswi akwe ni alushinisho. Sa ngaangu na ngabo?

²⁹ “ ‘Ici cilaakuba ncitondesho cakwaamba ayi ndaakumupa mulandu kumusena uno alimwi ayi kushomesha kwangu kwakumunyonyoola, ncakwiila kulaakucitika.’

³⁰ Mwaami Lesa waamba ayi, ‘Ndaakwaaba Falawo Ofula mwaami wa bene Ijipiti mumaansa a balwani bakwe abo bafwima buumi bwakwe bweenka mbuli mbondakaaba Sedekiya mwaami wa bene Juda kuli Nebukadinesa mwaami wa bene Babiloni, mulwani wakwe uyo wakalinga kumufwima.’ ”