Jelemiya 43 - Baibo Busansulushi Bwa Libuku Ili

Jelemiya mbwaakatolwa kuIjipiti

¹ Mpeeke nebo neJelemiya ndakamanisha kwaambila bantu maswi oonse a Mwaami Lesa, Lesa wabo, nkokwaamba ayi shoonse Mwaami Lesa nshaakantuma ayi mbaambile.

² Lyalo Asaliya mwanaakwe Oshaya aJoanani mwanaakwe Kaleya abasankwa beshikulisumpula boonse bakaŋambila ayi “Mutoobecabo mwebo! Mwaami Lesa, Lesa wesu taakwe kumutumaawo kwisa mukwaamba ayi, ‘Tutakayi mukwikala mucishi ca Ijipiti.’

³ Sombi Baluki mwanaakwe Neliya ngwaamuyunga ayi mutwaabe mumaansa a bene Babiloni kwaamba ayi batucaaye nabi kututola busha kucishi cabo.”

⁴ Aboobo Joanani mwanaakwe Kaleya, bamatanjilili ba bashilumamba abantu bamwi boonse tabakwe kunyumfwila Mwaami Lesa ayi bekalebo muJuda.

⁵ Sombi Joanani mwanaakwe Kaleya abamatanjilili ba bashilumamba bakatola bantu boonse abo bakacaala muJuda abaabo bakaboolela kuswa mushishi shoonse isho nshebakalinga babapalanganishishaamo.

⁶ Nkokwaamba ayi bakatola basankwa, banakashi, baana alimwi abanaamwaami banakashi abo Nebusaladani mutanjilili wa beshikulindilila mbwaakalinga washiya mumaansaakwe Gedaliya mwanaakwe Aikamu mwishikulu wakwe Shafani kubikaawo aBaluki mwanaakwe Neliya alimwi anebo neJelemiya.

⁷ Aboobo bakenjila muIjipiti mukutanyumfwila Mwaami Lesa akuya mukushika kuTaapanesi.

⁸ Nditwakalinga kuTaapanesi Mwaami Lesa wakaŋambila ayi,

⁹ “BaJuda kababweneeko, bwesa mabwe anene waafukile mulubansa lwa ncelwa kumwinjililo wa ŋanda ya bwaami yakwe Falawo kuTaapanesi.

¹⁰ Kuswawaawo mubaambile ayi nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Ndaakwiita musebenshi wangu Nebukadinesa mwaami wa bene Babiloni alakwe ulaakubika cuuna cakwe ca bwaami pamabwe aya ngowafukila waawa. Lyalo ulaakwaafwekelesha atente yakwe ya bwaami.

¹¹ Ncakwiila Nebukadinesa ulaakwisa mukulwana Ijipiti. Abo beelete kufwa kumalwashi, balaakufwa kumalwashi. Abo beelete kutolwa mubusha, balaakuya mubusha. Abo beelete kufwa kunkondo, balaakufwa munkondo.

¹² Ulaakutenta maanda a balesa ba bene Ijipiti, ee, ulaakutenta maanda a balesa babo akubatola mubusha. Bweenka mweembeshi mbwaasala njina mucakufwala cakwe, mbweeke ubo mbweshi akacite kucishi ca Ijipiti akuswaako kaali wakoma.

¹³ Amwalo muŋanda ya bene Ijipiti yakulambililaamo lisuba ulaakumwaya macinko asalalite akutenta maanda a balesa ba bene Ijipiti.’ ”