Jelemiya 42 - Baibo Busansulushi Bwa Libuku Ili

Bantu mbobakasenga Jelemiya ayi abapailileeko

¹ Mpomunyaawo bamatanjilili ba makoto a bashilumamba boonse, kubikaawo aJoanani mwanaakwe Kaleya aJesaniya mwanaakwe Oshaya pantu pomwi abantu boonse, nkokwaamba ayi bantu bataaku mbobabete kuya mukushika akubaabo balemekwa bakanyendela nebo neJelemiya.

² Bakaŋambila ayi, “Twapapaata amunyumfwe kusenga kwesu. Amutupailileeko kuMwaami Lesa, Lesa wanu swebo soonse sotwakacaalaawo. Twakalinga baanji, sombi na mwalangilisha bulya, twacaalabo baniini.

³ Amupaile ayi Mwaami Lesa, Lesa wanu atulwiite nkotweelete kuya ancotweelete kucita.”

⁴ Nebo neJelemiya ndakakumbula ayi, “Ndanyuumfwa nshemwaamba. Ncakwiila ntoopaila kuMwaami Lesa, Lesa wanu kweelana ambomwasenga. Ntoomulwiita shoonse isho Mwaami Lesa nsheshi andwiite. Teshi mushiseewo nabi comwi.”

⁵ Mpeeke bakandwiita ayi, “Mwaami Lesa abe kamboni walushinisho alimwi ushomeka pali ndiswe na tukabule kucita kweelana ashoonse isho nsheshi amwaambile ayi mutulwiite.

⁶ Tacicite mulandu na ngamakani asangalasha nabi atasangalashi. Swebo tulaakunyumfwila Mwaami Lesa, Lesa wesu uyo ngotwamutumaako ayi mutupailileeko. Ceebo shintu shoonse shilaakutweendela kabotu na tukanyumfwile Mwaami Lesa, Lesa wesu.”

Mwaami Lesa mbwaakakumbula mupailo wakwe Jelemiya

⁷ Ndipakeenda nshiku shili likumi Liswi lya Mwaami Lesa lyakesa kuli ndime neJelemiya.

⁸ Mpeeke ndakeeta Joanani mwanaakwe Kaleya abamatanjilili ba bashilumamba boonse mbwaakalingaabo, pantu pomwi abantu boonse kutalikilabo kubantu bataaku mbobabete kuya mukushika akubaabo balemekwa.

⁹ Mpomunyaawo ndakabaambila ayi, “Mwaami Lesa, Lesa wa bene Isilaeli uyo ngomwakantumaako ayi nkamusengele waamba ayi,

¹⁰ ‘Na mukekaale mucishi cino, Ndaakumuyaka, teshi nkamumwaaye, ndaakumushanga, teshi nkamutumune, sobwe. Ndoongumana abuumbi ceebo ca mapensho ngondakamuletela.

¹¹ Mutaloondi mwaami wa bene Babiloni. Mutamuloondi ceebo nebo neMwaami Lesa ndanooli amwebo. Ndaakumufuna akumukusha mumaansaakwe.

¹² Ndaakumufwita nkumbu kwaamba ayi alakwe akamufwite nkumbu, akumuleka ayi muboolele mucishi canu. Nebo neMwaami Lesa ndaamba.’

¹³ “Ono na mwaambe ayi, ‘Teshi twikale mucishi cino,’ akukaka kunyumfwila nebo neMwaami Lesa, Lesa wanu,

¹⁴ na mwaambe ayi, ‘Sobwe, swebo tutooya kuIjipiti tuye tukekale uko nkweshi tukabule kubonawo nkondo, kunyumfwa lupeenga lwa nkondo nabi kufwa nsala,’

¹⁵ anu amunyumfwe maswi angu nebo neMwaami Lesa, mwebo nomwakacaala muJuda. Nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Na mulishinishite kuya mukwikala kuIjipiti,

¹⁶ ngayi nkondo iyo njemutooloonda, ilaakumweensha kweenka uko. Ayalo nsala njemutoolisukama, ilaakumucana nkomunya uko. Lyalo mulaakufwita kweenka kuIjipiti.

¹⁷ Ndushinisho, boonse abo bashinishitebo kuya mukwikala kuIjipiti, balaakufwa kunkondo, nsala alimwi akumwaalu. Taaku nabi womwi weshi akapuluke nabi kuloboka mapensho ayo ngweshi nkabaletele.’

¹⁸ “Nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Bweenka bukali bwangu bwiindaawo mbobwakapoomokela pali baabo bakalinga kwikala kuJelusalemu, mbweeke ubo mbweshi bukapoomokele ndimwe mwaakuya kuIjipiti. Lyalo mulaakuba cintu ceelete kushinganwa, kuloondwa, kushibulukwa akusekwa. Cishi cino teshi mukacibonewo tubili.’ ”

¹⁹ Kuswawaawo nebo neJelemiya ndakabaambila ayi, “Mwebo nobantu bakacaala mucishi ca Juda, Mwaami Lesa wamwaambila ayi, ‘Mutayi kuIjipiti.’ Amwishibe lushinisho kwaamba ayi ndamucenjesha sunu

²⁰ ayi mutoocita cilubo ceenga camucaisha. Mwebo mwakantuma kuMwaami Lesa, Lesa wanu akwaamba ayi, ‘Amutupailileeko kuli nguwe akutulwiita shoonse nsheshi aambe aswebo tulaakushicita.’

²¹ Ono sunu ndamulwiita, sombi tamutoonyumfwila Mwaami Lesa, Lesa wanu muli shoonse isho nshaakantuma ayi mwaambile.

²² Aboobo bulya amwishibe kwaamba ayi mulaakufwa kunkondo, kunsala akumwaalu kumusena uko nkomusuni kuya mukwikala.”