Jelemiya 41 - Baibo Busansulushi Bwa Libuku Ili

¹ Lyalo mumweenshi wasanu ayobilo mumwaaka uyo, Ishimaeli mwanaakwe Netaniya mwishikulu wakwe Elishama wakalinga wa mulifumo lya bwaami alimwi wakalinga womwi wa bacinenenene ba mwaami, wakaya kuMisipa abantu likumi mukubona Gedaliya mwanaakwe Aikamu. Ono kabacilya pantu pomwi uko,

² Ishimaeli abantu abo bali likumi bakanyamuka akucaya Gedaliya kumipeeni. Bakacaya wooyo mwaami wa bene Babiloni ngwaakasala kuba mweendeleshi mucishi ca Juda.

³ Ishimaeli wakacaya abaJuda boonse abo bakalinga aGedaliya kuMisipa pantu pomwi abashilumamba bene Babiloni abo bakalinga kooko.

⁴ Bushiku bwakaboolaawo bantu boonse kabatana kwishiba shalufu lwakwe Gedaliya,

⁵ kwakesa bantu makumi osanwe aotatwe bakalinga kukulwite ndesu, kukwamwite shakufwala shabo alimwi bakalinga kulinengweete abo bakaswa kuShekemu, Shilo akuSamaliya. Bantu bakaleta shipo sha fulaulo atununkila kabotu kuŊanda ya Mwaami Lesa.

⁶ Ishimaeli mwanaakwe Netaniya wakaswa kuMisipa mukubakumanya kaaya bulila. Ndyaakabacana wakabaambila ayi, “Katiya mukabone Gedaliya mwanaakwe Aikamu.”

⁷ Ono ndibakenjila mundabala, Ishimaeli abasankwa abo mbwaakalingaabo bakacaya bantu abo akubawaala mumukalo.

⁸ Sombi bali likumi bakaambila Ishimaeli ayi, “Utatucaayi swebo! Tulicite witi, bale, mafuta a olifi alimwi abuuci shishisitwe mumuunda.” Aboobo balo wakabaleka taakwe kubacaila pantu pomwi ababyaabo, sobwe.

⁹ Mukalo uyo ngwaakawaalamo mituntu ya bantu abo boonse mbwaakacaya pantu pomwi aGedaliya, ngooyo mwaami Asa ngwaakakaba ndyaakalinga kulwanikwa kuli Baasha mwaami wa bene Isilaeli. Lakwe Ishimaeli wakoosusha bafu.

¹⁰ Kuswawaawo Ishimaeli wakacata busha bantu boonse abo bakalinga kuMisipa. Nkokwaamba ayi banaamwaami banakashi pantu pomwi aboonse abo bakalinga bacaala kooko abo Nebusaladani mutanjilili wa beshikulindilila mbwaakasalila Gedaliya mwanaakwe Aikamu ayi kaabeendelesha. Ishimaeli wakabacata busha akululama kucishi ca bene Amoni.

¹¹ Ono Joanani mwanaakwe Kaleya abamatanjilili ba bashilumamba mbwaakalingaabo bakanyumfwa shilubo shoonse shakacita Ishimaeli mwanaakwe Netaniya.

¹² Paceebo ceeco bakabwesa bashilumamba babo boonse akuya mukulwana Ishimaeli. Bakaya mukumweenshesha kufwaafwi acishiba cinene ca kuGibyoni.

¹³ Mpeeke bantu boonse bakacatwa busha aIshimaeli ndibakabona Joanani mwanaakwe Kaleya abamatanjilili ba bashilumamba mbwaakalingaabo, bakakondwa abuumbi.

¹⁴ Lyalo bantu boonse abo Ishimaeli mbwaakatola busha kuMisipa bakacicila kulubasu lwakwe Joanani.

¹⁵ Sombi Ishimaeli abasankwa bakwe bali bosanwe abotatwe bakacica Joanani akucicila kubene Amoni.

¹⁶ Lyalo Joanani abamatanjilili ba bashilumamba boonse mbwaakalingaabo bakeendelesha bantu abo Ishimaeli mbwaakacata kuswa kuMisipa pakumana kucaya Gedaliya. Nkokwaamba ayi bakeendelesha bashilumamba, banakashi, baana abacinenenene ba kubwalo abo mbwaakakusha kuGibyoni.

¹⁷ Bakeenda akuya mukupumunina kuGeluti Kimuamu kufwaafwi aBetileemu kabaya kuIjipiti,

¹⁸ kucica bene Babiloni. Bakalinga kubaloonda ceebo Ishimaeli mwanaakwe Netaniya wakacaya Gedaliya mwanaakwe Aikamu, uyo mwaami wa bene Babiloni ngwaakasala kuba mweendeleshi wa mucishi ca Juda.