Jelemiya 40 - Baibo Busansulushi Bwa Libuku Ili

Jelemiya mbwaakaya mukwikala aGedaliya

¹ Liswi lya Mwaami Lesa lyakesa kuli ndime neJelemiya ciindi Nebusaladani mutanjilili wa beshikulindilila ndyaakaŋangulula kuLama. Wakancana kaaŋangitwe pantu pomwi abasha boonse bakaswa kuJelusalemu alimwi akuJuda abo bakatolwa busha kuBabiloni.

² Ono mutanjilili wa beshikulindilila ndyaakancana wakaŋambila ayi, “Mwaami Lesa, Lesa wako wakaamba ayi mapensho aya acitike kumusena uno.

³ Ono Mwaami Lesa wacita kweelana ambwaakaamba. Shintu shoonse ishi shacitika ceebo bene mishaanu bakabishisha Mwaami Lesa akutamunyumfwila.

⁴ Sombi sunu ntookwaangulula ncetani shili kumikono yako. Katiya soonse kuBabiloni na ulisuni. Ndaakukulama. Ono na kootasuni, cilibo kabotu. Bona, inga wasala musena uli woonse ngweenga koosuni mucishi cino akuya mukwikala.”

⁵ Ono kaantana kusanduluka ayi nooya, Nebusaladani wakeelikaawo ayi, “Boolela kuli Gedaliya mwanaakwe Aikamu, mwishikulu wakwe Shafani. Gedaliya uyo wakasalwa kumwaami wa bene Babiloni kuba mweendeleshi wa mandabala a muJuda. Koya ukekalaakwe pakati ka bantu uko nabi kuya kumwi kuli koonse nkoosuni.” Lyalo wakampa cipo, shakulya akundeka ayi nooya.

⁶ Aboobo nebo neJelemiya ndakaya kuli Gedaliya kuMisipa akwikalaakwe pantu pomwi abantu abo bakacaala mucishi.

Gedaliya mweendeleshi wa kuJuda

⁷ Mpeeke bamatanjilili ba bashilumamba abashilumamba babo bakalinga muluundu bakanyumfwa kwaamba ayi mwaami wa bene Babiloni wasala Gedaliya mwanaakwe Aikamu kuba mweendeleshi wa cishi ca Juda ayi anokweendelesha basankwa, banakashi abanike abo bakandu bunene mucishi batakwe kutolwa busha kuBabiloni.

⁸ Lyalo bakesa kuli Gedaliya kuMisipa. Kwakesa Ishimaeli mwanaakwe Netaniya, Joanani aJonasani bana bakwe Keleya, Selaya mwanaakwe Tanuumeti, bana bakwe Efayi basankwa bakaswa kundabala ya Netofa alimwi aJesaniya wakaswa kundabala ya Maaka. Boonse bakesa abashilumamba babo.

⁹ Mpomunyaawo Gedaliya wakabaambila ayi, “Nebo ntoomushomesha ayi taakuuwo nceenga mwaloonda bacinenenene bene Babiloni. Amwikale mucishi cino munoosebensela mwaami wa bene Babiloni, lyalo shoonse shintu shitoomweendela kabotu.”

¹⁰ Nebo ndanookala kuMisipa kwaamba ayi nomwiimikaninaako kubene Babiloni abo beshi banoosa kuli ndiswe. Sombi mwebo mukanoosunga waini, shisepo sha mainsa amafuta a olifi munongo shanu akwikala mumandabala ayo ngomwakakoma.

¹¹ Ono baJuda abo bakalinga kuMoabu, Amoni, Edomu amushishi shimwi shoonse, bakanyumfwa kwaamba ayi mwaami wa kuBabiloni wasuminisha baJuda bamwi kucaala mucishi ca Juda akusala Gedaliya kuba mweendeleshi wabo.

¹² Lyalo boonse bakaboola mucishi ca Juda kuli Gedaliya kuMisipa kuswa mushishi shoonse isho nshebakapalanganishilwaamo. Bakasunga waini uunji alimwi ashisepo shiinji sha mainsa.

Gedaliya mbwaakacaikwa

¹³ Mpomunyaawo Joanani mwanaakwe Kaleya abamatanjilili ba bashilumamba boonse bakalinga kucili muluundu, bakesa kuli Gedaliya mwanaakwe Aikamu kuMisipa

¹⁴ akumwaambila ayi, “Sa mwebo tamwishi kwaamba ayi Baalisi mwaami wa bene Amoni watuma Ishimaeli mwanaakwe Netaniya kwisa mukumucaya?” Sombi lakwe Gedaliya taakwe kubashoma, sobwe.

¹⁵ Lyalo Joanani mwanaakwe Kaleya wakaambila Gedaliya cabushishi kuMisipa ayi, “Amundeeke nje ncaye Ishimaeli mwanaakwe Netaniya. Taaku weshi akeshibeewo. Ceebonshi nceshi tumulekele ayi amucaaye akulengesha baJuda abo bamushingulukite kupalangana akulobeshesha baabo bakacaala?”

¹⁶ Sombi lakwe Gedaliya mwanaakwe Aikamu wakaambila Joanani mwanaakwe Kaleya ayi, “Kuteelesha kucita cintu ca mushobo uyo! Maswi aya ngootokwaamba pali Ishimaeli, teshi alushinisho.”