Jelemiya 39 - Baibo Busansulushi Bwa Libuku Ili

Ndabala ya Jelusalemu mboyakakomwa

¹ Mumwaaka wasanu ayone wa bwaami bwakwe Sedekiya mwaami wa bene Juda, mumweenshi wa likumi, Nebukadinesa mwaami wa bene Babiloni wakanyamuka alikoto lyakwe lyoonse lya bashilumamba akushinguluka ndabala ya Jelusalemu ayi beelwaane.

² Ono pabushiku bwasanu ashone, mumweenshi wane mumwaaka walikumi awomwi wa bwaami bwakwe Sedekiya, lubumbu lwa ndabala lwakapwaikwa.

³ Lyalo bacinenenene ba mwaami wa bene Babiloni bakesa mukwikala pashuuna sha kuMwinjililo wa Pakati. Bacinenenene abo nguNegali Shalesa mwine Shamuga, Nebo Sasekimu mutanjilili wa bashilumamba, Negali Shalesa umwi munene wa bacinenenene alimwi abacinenenene ba mwaami wa bene Babiloni bamwi boonse.

⁴ Mpeeke Sedekiya mwaami wa bene Juda abashilumamba boonse ndibakababona bakacica. Bakaswa mundabala mashiku akwiinda mumuunda wa bwaami kuya mukuswita kumwinjililo apo pakalinga kukumanina lubumbu. Lyalo bakacica kululama kuCinyika ca Joodani.

⁵ Sombi bashilumamba bene Babiloni bakabakonkela akucata Sedekiya kumawesa a Jeliko. Mpomunyaawo Sedekiya bakamutola kumwaami Nebukadinesa uyo wakalinga mundabala inene ya Libula mucishi ca Amati. Uko Nebukadinesa wakamupa mulandu.

⁶ Kweenka kuLibula mwaami wa bene Babiloni wakacaya baana basankwa bakwe Sedekiya boonse kaalangilisha. Wakacaya abacinenenene boonse bene Juda.

⁷ Kuswawaawo Nebukadinesa wakaamba ayi Sedekiya akushikwe meenso. Lyalo bakamwaanga ncetani sha bulonse akumutola kuBabiloni.

⁸ Mpomunyaawo bene Babiloni bakatenta ŋanda ya bwaami amaanda a bantu akupwayoola lubumbu lwa Jelusalemu.

⁹ Lyalo Nebusaladani mutanjilili wa beshikulindilila wakatola bantu busha kuBabiloni abo bakacaala mundabala inene pantu pomwi abaabo bakalyaaba mumaansaakwe.

¹⁰ Sombi mucishi ca Juda wakashiyamo bakandu abo batakalinga kucitewo kantu akubapa myuunda ya minyansa amyuunda imwi.

Jelemiya mbwaakaangululwa

¹¹ Ono Nebukadinesa mwaami wa bene Babiloni wakaambila Nebusaladani mutanjilili wa beshikulindilila makani aya apali ndime neJelemiya ayi,

¹² “Mubwese ukamulaame. Utamuciisi, sombi unoomucitila kulilabo ncaasenga.”

¹³ Aboobo Nebusaladani, mutanjilili wa beshikulindilila, Nebushasibani mutanjilili wa bacinenenene, Negali Shalesa munene wa bacinenenene alimwi abacinenenene boonse ba mwaami wa bene Babiloni,

¹⁴ bakatumya nkombe ayi nebo neJelemiya nkushikwe mulubansa lwa ŋanda ya bwaami. Bakambika mumaansaakwe Gedaliya mwanaakwe Aikamu, mwishikulu wakwe Shafani kwaamba ayi ambooshe kumisheesu. Aboobo ndakekala pakati ka bene misheesu.

Kulangila kwakwe Ebedimeleki

¹⁵ Nebo neJelemiya kaancaangitwe kulubansa lwa ŋanda ya bwaami, liswi lya Mwaami Lesa lyakesa kuli ndime ayi,

¹⁶ “Koya waambile Ebedimeleki mwine Kushi ayi Mwaami Lesa Shinkusu shoonse, Lesa wa bene Isilaeli waamba ayi, ‘Ntooyanda kucita kweelana amaswi ngondakaamba kundabala iyi kwiinda mukuleta mapensho kuteshi kuswitilila, sobwe. Shintu ishi shilaakucitika mumeenso ako.

¹⁷ Sombi webo ndaakukupulusha bushiku ubo, teshi ukaabwe mumaansa a baabo mbooloonda. Nebo neMwaami Lesa ndaamba.

¹⁸ Ncakwiila ndaakukufuna. Teshi ukafwe kunkondo, sombi ulaakupuluka ceebo ulicinkite manungo muli ndime. Nebo neMwaami Lesa ndaamba.’ ”