Jelemiya 38 - Baibo Busansulushi Bwa Libuku Ili

Jelemiya mbwaakawaalwa mumukalo utacite maanshi

¹ Mpeeke Shefatiya mwanaakwe Matani, Gedaliya mwanaakwe Pasha, Jeukali mwanaakwe Shelemiya aPasha mwanaakwe Malukiya bakanyumfwa nebo neJelemiya ndindakalinga kwaambila bantu ayi,

² “Mwaami Lesa utokwaamba ayi, ‘Uyo woonse weshi akekale mundabala ino ulaakufwa kunkondo, nsala nabi mwaalu. Sombi uyo woonse weshi akaye mukulyaaba mumaansa a bene Babiloni, ulaakuba abuumi. Ulaakucatwa, sombi teshi akacaikwe.’ ”

³ Ndakalinga kubaambila alimwi ayi, “Mwaami Lesa utokwaamba ayi, ‘Ncakwiila ndabala ino inene ilaakwaabwa mumaansa a mwaami wa bene Babiloni uyo weshi akeekoome.’ ”

⁴ Mpomunyaawo bacinenenene bakaambila mwaami ayi, “Muntu uyu ulyeelete kucaikwa ceebo utootyongosha bashilumamba abantu abo bakacaala mundabala inene ino kumakani ngaatoobalwiita. Muntu uyu taasuni kucafwa bantu, sombi uliimfwibo pakunyonyoola.”

⁵ Lyalo mwaami Sedekiya wakabaambila ayi, “Muntu uyu uli mumaansaanu. Nebo nshicite nkusu sha kumukasha.”

⁶ Aboobo bakambwesa akuya mukungwaala mumukalo wakwe Malukiya mwanaamwaami. Mukalo uyo wakalinga mulubansa lwa ŋanda ya bwaami. Bakasebensesha ntambo pakunkulukisha mumukalo uyo. Tewakalinga kucite maanshi, sombi mwakalingabo matipa ayo ngondakepilaamo.

⁷ Sombi Ebedimeleki mwiine Kushi wacinenenene wa kuŋanda ya bwaami wakanyumfwa ayi ndawaalwa mumukalo. Paciindi ico mwaami wakalinga kushiite kuMwinjililo wakwe Benjameni.

⁸ Ebedimeleki wakamweendela akuya mukumulwiita ayi,

⁹ “Nomulemekwa, cacita bantu aba kuli Jelemiya mulaluki cakumubika mumukalo ncilubo. Mumukalo mulya ulaakufwabo kunsala shakulya shoonse shikamaane mundabala inene ino.”

¹⁰ Mpomunyaawo mwaami wakapa mulawo kuli Ebedimeleki kwaamba ayi, “Bwesa basankwa makumi otatwe pabashilumamba bangu uyaabo mukukusha Jelemiya mumukalo kaatana kufwa.”

¹¹ Aboobo Ebedimeleki wakanyamuna bantu abo akuyaabo kucipinda cakalinga kunshi lya ŋanda yakusungilamo buboni kuŋanda ya bwaami. Lyalo wakabwesa shisani shikulukulu shifwitefwite akushiwaala kuli ndime mumukalo kashaangitwe kuntambo.

¹² Mpomunyaawo Ebedimeleki mwiine Kushi wakaŋambila ayi, “Bika shisani isho shikulukulu shifwitefwite mumaapaako ayi ntaambo shitakuciisi.” Aboobo ndakacita kweelana ambondakaambilwa,

¹³ Kuswawaawo bakankwela kuntambo akunkusha mumukalo. Lyalo ndakekala kulubansa lwa ŋanda ya bwaami.

Mwaami Sedekiya mbwaakeepusha Jelemiya alimwi

¹⁴ Mpeeke mwaami Sedekiya wakantumina beshinkombe ayi bantole kuli nguwe. Mpeeke bakantola akumbika kumwinjililo watatu uya kuŊanda ya Mwaami Lesa. Kuswawaawo mwaami wakaŋambila ayi, “Ntooyanda kukwiipusha cimwi cikani. Ono utanshisi nabi comwi.”

¹⁵ Mpomunyaawo ndakakumbula Sedekiya ayi, “Na mulwiite, mutooncaya. Na mupandeko maano teshi munkutikeewo, sobwe.”

¹⁶ Paceebo ceeco Sedekiya wakanshomesha cakulumbila mubushishi ayi, “Bweenka mbocibete lushinisho ayi Mwaami Lesa ngumuumi uyo wakatupa buumi ubo mbotucite, mbweeke ubo teshi nkakucayeewo nabi kukwaaba mumaansa a baabo batoofwima buumi bwako.”

¹⁷ Mpeeke ndakaambila Sedekiya ayi, “Mwaami Lesa Shinkusu shoonse, Lesa wa bene Isilaeli waamba ayi, ‘Na mwebo mukalyaabe mumaansa a bamatanjilili ba bashilumamba ba kuBabiloni teshi mukacaikwe alimwi andabala ino teshi ikatentweewo, sobwe. Lyalo mwebo abamuŋanda yanu teshi mukacaikwe.

¹⁸ Sombi na mubule kulyaaba mumaansa a bamatanjilili ba bashilumamba ba mwaami wa bene Babiloni, ndabala inene ino ilaakwaabwa kubene Babiloni abo beshi bakeeteente. Ncakwiila mwebo nobeene teshi mukalobokeewo kuswa mumaansaabo.’ ”

¹⁹ Mpeeke mwaami Sedekiya wakaŋambila ayi, “Nebo ntooloonda baJuda abo bakaya mukuba kulubasu lwa bene Babiloni ceebo bene Babiloni inga baakungaba kuli mbabo abalo inga bampensha abuumbi.”

²⁰ Mpomunyaawo nebo neJelemiya ndakakumbula ayi, “Teshi bakamwaabeewo mumaansaabo, sobwe. Mwebo amunyumfwilebo Mwaami Lesa mukucita nsheentoomulwiita. Lyalo shintu shilaakumweendela kabotu alimwi teshi mukacaikweewo.

²¹ Sombi na mukake kulyaaba mumaansaabo, Mwaami Lesa wantondesha ceshi cikacitike kuli ndimwe.

²² Banakashi boonse abo bakacaala kuŋanda ya mwaami wa bene Juda balaakuletwa kubamatanjilili ba bashilumamba ba mwaami wa bene Babiloni. Lyalo banakashi abo balaakumwaambila ayi, ‘Bakamupilinganya akumukoma babyaanu abo mbomushoma. Ono sunu myeendo yanu yepila mumatipa, babyaanu bamupalangana.’ ”

²³ Kuswawaawo ndakaamba ayi, “Bamakaanu boonse alimwi abana banu balaakutolwa busha kubene Babiloni. Mwebo nobeene teshi mukalobokeewo kuswa mumaansaabo. Sombi mulaakucatwa kumwaami wa bene Babiloni alimwi ndabala inene ino ilaakutentwa cakumaninina.”

²⁴ Mpomunyaawo Sedekiya wakaŋambila ayi, “Makani aya ngotwabandika, utalwiitiko nabi womwi ceebo na ucite boobo inga wafwa.

²⁵ Ono na bacinenenene bangu banyumfwe ayi ndalinga kubandika andiwe alimwi na bese kuli ndiwe akwaamba ayi, ‘Tulwiite makani ngowalinga kwaambila mwaami alimwi amwaami nshaakwaambila. Utashishi nabi comwi. Na ucite boobo tutookucaya.’

²⁶ Webo ubalwiitebo ayi, ‘Ndalinga kukombelela mwaami ayi atakampilushi kuŋanda yakwe Jonasani ayi nje mfwite nkuko.’ ”

²⁷ Pesule bacinenenene abo boonse bakesa kuli ndime akutalika kunjipusha. Lyalo ndakabalwiita kweelana abwakaŋambila mwaami. Paceebo ceeco bakandeka ceebo taaku wakanyumfwa nshetwakabandika amwaami.

²⁸ Lyalo nebo neJelemiya ndakalamwa kulubansa lwa ŋanda ya mwaami kushikila ndabala ya Jelusalemu ndiyakakomwa.