Jelemiya 37 - Baibo Busansulushi Bwa Libuku Ili

Sedekiya mbwaakasenga Jelemiya

¹ Ono Nebukadinesa mwaami wa bene Babiloni wakabika Sedekiya mwanaakwe Josiya pabwaami bwa bene Juda pamusena wakwe Jeoiyakini mwanaakwe Jeoiyakimu.

² Sombi Sedekiya, bacinenenene bakwe alimwi abantu bamwi boonse tabakwe kukonkela maswi Mwaami Lesa ngwaakabaambila kwiinda muli ndime neJelemiya.

³ Mpeeke mwaami Sedekiya wakatuma Jeukali mwanaakwe Shelemiya amupailishi Sefaniya mwanaakwe Maseiya kuli ndime neJelemiya mukwaamba ayi, “Amutupailileeko kuMwaami Lesa, Lesa wesu.”

⁴ Paciindi ico nebo neJelemiya ndakalinga kwaangulukite kweenda pakati ka bantu ceebo kaantana kubikwa muntolongo.

⁵ Bashilumamba ba bene Babiloni bakalinga baya mukushinguluka Jelusalemu, sombi ndibakanyumfwa ayi bashilumamba bene Ijipiti basubuka manyinsa a cishi ca Ijipiti, bakaloonda akuboolaamo kuswa kuJelusalemu.

⁶ Lyalo Mwaami Lesa, Lesa wa bene Isilaeli wakandwiita

⁷ kwaambila Sedekiya ayi, “Bashilumamba ba bene Ijipiti bali munshila kwisa mukukucafwa kulwana. Teshi bakashiike, sombi balaakuboolelaamo kumishaabo kuIjipiti.

⁸ Kuswawaawo bene Babiloni balaakwisa alimwi mukulwana ndabala inene ino. Balaakwiikoma alimwi akwiitenta.

⁹ Ono nebo neMwaami Lesa ntoomucenjesha ayi, ‘Mutalicenjeeki mukuyeeya ayi bene Babiloni teshi bakese tubili mukwiinga balaakwisa cancinencine.

¹⁰ Ncakwiila nabi mukakome likoto lyoonse lya bashilumamba bene Babiloni akushiyawobo balicisite mumatente, beenka abo balaakwisa mukutenta ndabala inene ino cakumaninina.’ ”

Jelemiya mbwaakacatwa akubikwa muntolongo

¹¹ Bashilumamba ba bene Babiloni bakaloonda akuboolaamo kuswa kuJelusalemu ceebo ca bashilumamba ba bene Ijipiti abo bakalinga kwisa.

¹² Lyalo nebo neJelemiya ndakatalika kuswa mundabala inene akuya kucishi cakwe Benjameni mukubwesa cipansha ca buboni bwangu pakati ka bantu bekalaako.

¹³ Sombi ndindakashika kumwinjililo wakwe Benjameni, munene wa beshikulindilila uyo wakalinga kwiitwa ayi Ilija mwanaakwe Shelemiya mwishikulu wakwe Ananiya wakancata akuŋambila ayi, “Webo wacicila kubene Babiloni kuya mukuba kulubasu lwabo!”

¹⁴ Mpeeke ndakamukumbula ayi, “Teshi mbocibete ubo, sobwe. Nebo nshintoocicila kubene Babiloni kuya mukuba kulubasu lwabo!” Sombi lakwe Ilija taakwe kunyumfwila. Aboobo wakancata akuntola kubacinenenene.

¹⁵ Bacinenenene abo bakankalalila abuumbi, banguma alimwi akuncalila muŋanda yakwe Jonasani mulembi wa kubwalo iyo njebakasandula kuba ntolongo.

¹⁶ Bakambika mucipinda ca ntolongo ca panshi umo mundakekala kwaciindi cilaamfu.

¹⁷ Mpeeke mwaami Sedekiya wakatuma bantu kwisa mukumbwesa ayi bantole kuŋanda yakwe ya bwaami. Lyalo mwaami wakanjipusha kweela ayi, “Sa kuliwo maswi aswa kuMwaami Lesa?” Nebo ndakamukumbula ayi, “Ee, nkwaali. Mwebo mulaakwaabwa mumaansa a mwaami wa bene Babiloni.”

¹⁸ Mpomunyaawo ndakeepusha mwaami ayi, “Ino ngumulandunshi ngondabishila ndimwe, bacinenenene banu nabi bantu aba ngomwambikila muntolongo?

¹⁹ Ino bali kuli balaluki banu abo bakalinga kumulalukila ayi, ‘Mwaami wa bene Babiloni teshi akamulwaneewo nabi kulwana cishi cino?’

²⁰ Ono nomulemekwa, ndamusenga ayi munkutike. Mutampilushi kuŋanda yakwe Jonasani mulembi. Na mucite boobo, ncakwiila ndaakufwita nkuko.”

²¹ Mpomunyaawo mwaami Sedekiya wakapa mulawo ayi mbikwe mulubansa lwa ŋanda ya bwaami alimwi akunoopekwa shinkwa womwi bushiku abushiku uswa kubeshikuupanga kushikila woonse ukamaane mundabala inene iyo. Aboobo nebo neJelemiya ndakekala kumusena uyo.