Jelemiya 36 - Baibo Busansulushi Bwa Libuku Ili

Baluki mbwaakabelenga pacakulembelaawo muŊanda yakwe Lesa

¹ Mumwaaka wane wa bwaami bwakwe Jeoiyakimu mwanaakwe Josiya mucishi ca Juda, Mwaami Lesa wakalwiita nebo neJelemiya ayi,

² “Bwesa cakulembelaawo, ulembewo shoonse isho nshendakakulwiita pabene Isilaeli, bene Juda alimwi amishobo imwi yoonse. Ulembe shoonse isho nshendakakulwiita kutalikilabo pabushiku ubo mbondakatalika kwaamba andiwe, ciindi Josiya ndyaakalinga mwaami, kushika abushiku bwa sunu.

³ Mpashi bene Juda baakunyumfwa shamapensho oonse ayo ngoontooyeeyela kubaletela, inga basanduka kuswa kunshila shabo shibiibi. Na bakacite boobo, ndyeshi nkabalekelele bubi bwabo alimwi ashibiibi shabo.”

⁴ Mpomunyaawo ndakeeta Baluki mwanaakwe Neliya akumwaambila maswi oonse akandwiita Mwaami Lesa. Lyalo Baluki wakaalemba oonse pacakulembelaawo.

⁵ Kuswawaawo ndakaambila Baluki ayi, “Nebo ono nshintoosuminishikwaawo kwinjila muŊanda yakwe Lesa.

⁶ Sombi webo ukenjileemo pabushiku ubo bantu ndyeshi bakatalike kulikasha kulya. Waakuya, ukabelenge cakoolobesha maswi ali pacakulembelaawo ico kwaamba ayi bakanyumfwe shoonse shakandwiita Mwaami Lesa isho nshendakakulwiita. Ukacitile boobo uko bantu boonse nkweshi bakanoonyumfwa kubikaawo abene Juda abo bakaswa mumandabala abo.

⁷ Mpashi inga bapaila kuMwaami Lesa akusanduka kuswa kunshila shabo shibiibi mukwiinga Mwaami Lesa wakaloondesha bantu aba kubukali bwakwe buyoosha abuumbi.”

⁸ Aboobo Baluki mwanaakwe Neliya wakabelenga maswi a Mwaami Lesa pacakulembelaawo muŊanda yakwe Lesa kweelana ambondakamwaambila ayi acite.

⁹ Ono mumweenshi wasanu ayone mumwaaka wasanu wa bwaami bwakwe Jeoiyakimu mwanaakwe Josiya mwaami wa bene Juda, bantu bakalikasha kulya kunembo lya Mwaami Lesa. Kulikasha kulya uku kwakacitwa abantu boonse bekala muJelusalemu alimwi aboonse abo bakaswa mumandabala a mucishi ca Juda.

¹⁰ Lyalo bantu boonse kabanyumfwite, Baluki wakabelenga pacakulembelaawo shoonse isho nshendakamulwiita. Maswi aya wakaabelengela muŊanda yakwe Lesa, kaali mucipinda cakwe Gemaliya mwanaakwe Shafani uyo wakalinga mulembi wa kubwalo. Cipinda cakwe ico cakalinga palubansa lwa peculu pafwaafwi akuMwinjililo Upya wa kuŊanda yakwe Lesa.

Baluki mbwaakabelenga pacakulembelaawo kubacinenenene

¹¹ Mpeeke Mikaya mwanaakwe Gemaliya mwishikulu wakwe Shafani wakanyumfwa Baluki kaabelenga isho shakaamba Mwaami Lesa shakalinga kulembetwe pacakulembelaawo.

¹² Lyalo wakaya kuŋanda ya bwaami, kucipinda ca mulembi wa kubwalo uko kwakalinga bacinenenene boonse. Nkokwaamba ayi Elishama mulembi wa kubwalo, Delaya mwanaakwe Shemaya, Elinatani mwanaakwe Akibo, Gemaliya mwanaakwe Shafani, Sedekiya mwanaakwe Ananiya abacinenenene bamwi boonse nkobakalinga.

¹³ Mpomunyaawo Mikaya wakabalwiita shoonse isho nshaakanyumfwa Baluki kaabelengela bantu pacakulembelaawo.

¹⁴ Kuswawaawo bacinenenene bakatuma Jeudi mwanaakwe Netaniya mwishikulu wakwe Shelemiya uyo wakalinga mwanaakwe Kushi kuya mukwaambila Baluki ayi alete cakulembelaawo ico ncaakabelengelawo bantu. Aboobo Baluki wakacileta.

¹⁵ Mpeeke bakamwaambila ayi “Kala panshi, utubelengele shili mucakulembelaawo.” Aboobo Baluki wakabelenga.

¹⁶ Ono ndyaakamanisha kubabelengela, bakalangana kumeenso cakuloonda akwaambila Baluki ayi, “Tulyeelete kuluula kumwaami maswi aya.”

¹⁷ Kuswawaawo bakamwiipusha ayi, “Tulwiiteeko ono. Ino wakashilemba buyani shoonse ishi? Sa nguJelemiya wakakulwiita maswi aya?”

¹⁸ Mpomunyaawo Baluki wakakumbula ayi, “Ee, nguJelemiya wakalinga kundwiita maswi aya oonse. Lyalo nebo kaanemba pacakulembelaawo ici.”

¹⁹ Lyalo bacinenenene bakaambila Baluki ayi, “Webo aJelemiya mulyeelete kuya mukuyuba. Kutabi muntu nabi womwi weshi eshibe nkomubete.”

Mwaami mbwaakatenta cakulembelaawo

²⁰ Mpeeke bacinenenene bakabika cakulembelaawo ico mucipinda cakwe Elishama mulembi wa kubwalo akuya kulubansa lwa mwaami uko nkobakaya mukuluula shintu shoonse.

²¹ Mpomunyaawo mwaami wakatuma Jeudi kuya mukuleta cakulembelaawo ico. Alakwe wakacileta kuswa mucipinda cakwe Elishama akwisa mukucibelengela mwaami abacinenenene boonse bakalinga kumushingulukite.

²² Ico cakalinga ciindi ca mupewo, mumweenshi wasanu ayone. Aboobo mwaami wakalinga kushiite muŋanda yakwe ya mupewo kaayota mulilo.

²³ Ono Jeudi na wabelengabo shipansha shotatwe nabi shone, mwaami wakalinga kushikwamunaako acibeshi ciniini akushisowela mumulilo kushikila cakulembelaawo coonse camana.

²⁴ Nabi mwaami abacinenenene bakwe boonse abo bakanyumfwa maswi oonse aya tabakwe kuloondaawo nabi kukwamoona shakufwala shabo kutondesha ayi bali mubuumba, sobwe.

²⁵ Nakubi kwaamba ayi Elinatani, Delaya alimwi Gemaliya bakamukombelela mwaami ayi atatenti cakulembelaawo ico, lakwe taakwe kubanyumfwilaawo, sobwe.

²⁶ Mpomunyaawo mwaami wakaambila Jelamelo mwanaakwe, Selaya mwanaakwe Asilyelo aShelemiya mwanaakwe Abidelo kuya mukucata Baluki mulembi wangu anebo neJelemiya. Sombi Mwaami Lesa wakatushisa.

Jelemiya mbwaakalemba pacakulembelaawo acimwi

²⁷ Mpeeke mwaami Jeoiyakimu ndyaakamana kutenta cakulembelaawo ico Baluki ncaakalembawo maswi ngondakamwaambila nebo neJelemiya, Mwaami Lesa wakaŋambila ayi,

²⁸ “Bwesa cakulembelaawo cimwi, ulembewo maswi oonse ayo akalinga pacakulembelaawo citaanshi ico cakatentwa aJeoiyakimu mwaami wa bene Juda.

²⁹ Ulwiite amwaami Jeoiyakimu ayi, ‘Wakatenta cakulembelaawo ico akwiipusha ayi ino webo wakalembelawonshi ayi mwaami wa bene Babiloni ulaakwisa mukunyonyoola cishi ici akucaya bantu boonse alimwi abanyama bekalaamo?

³⁰ Paceebo ceeco, Mwaami Lesa utokwaamba kuli ndiwe Jeoiyakimu mwaami wa bene Juda ayi webo teshi ukabewo amuntu weshi akekale pacuuna ca bwaami bwakwe Defedi. Mutuntu wako ulaakusowekwa akunoobalilwa lumwi, acaandwa ciindi ca mashiku.

³¹ Ndaakukupa mulandu webo, bana bako abacinenenene bako ceebo ca shibiibi nshemwakacita. Bene Jelusalemu abene Juda ndaakubaletela mapensho oonse ngondakaamba kubaletela ceebo tabakwe kunyumfwila.’ ”

³² Mpomunyaawo ndakabwesa cakulembelaawo cimwi akucitambika mulembi wangu Baluki mwanaakwe Neliya. Baluki uyo wakalembawo shoonse nshendakamulwiita. Lyalo wakalemba maswi oonse akalinga pacakulembelaawo citaanshi ico Jeoiyakimu mwaami wa bene Juda ncaakatenta mumulilo. Maswi aanji eelenebo aayo ngondakamulwiita akeelikwaawo.