Jelemiya 34 - Baibo Busansulushi Bwa Libuku Ili

Mwaami Lesa mbwaakacenjesha Sedekiya

¹ Ono Nebukadinesa abashilumamba bakwe pantu pomwi abashilumamba ba mumishobo imwi abashikanda shimwi abo bakalinga kweendeleshekwa anguwe, ndibakalinga kulwana ndabala ya Jelusalemu alimwi amandabala akalinga kushingulukite, Mwaami Lesa wakaamba kuli ndime.

² Mwaami Lesa, Lesa wa bene Isilaeli wakandwiita ayi nje nkalwiite Sedekiya mwaami wa bene Juda ayi, “Nebo, neMwaami Lesa, ndaakwaaba ndabala inene iyi kumwaami wa kuBabiloni uyo weshi akeeteente.

³ Teshi ukalobokeemo, sobwe. Sombi ulaakucatwa akwaabwa mumaansaakwe alimwi ulaakulanganaakwe akubandikaakwe mulomo amulomo. Pesule ndyeshi ukaye kuBabiloni.

⁴ “Ono webo Sedekiya nyumfwa nshentokwaamba pali ndiwe. Webo teshi ukacaikweewo munkondo.

⁵ Sombi webo ulaakufwabo muluumuno. Bweenka bantu mbobakalinga kunootenta tununkila kabotu pakufukila bamashali banu bakulukulu abo bakalinga bamaami webo kootana kulela, mbweeke ubo mbweshi bakakutentele awebo. Balaakulila pali ndiwe akwaamba ayi, ‘Maawe, mwaami wesu wafwa!’ Nebo neMwaami Lesa ndaamba.”

⁶ Mpeeke ndakaya mukulwiita mwaami Sedekiya muJelusalemu makani aya.

⁷ Paciindi ico bashilumamba ba mwaami wa bene Babiloni bakalinga kulwana ndabala inene ya Jelusalemu. Paciindi ceenka ico bakalinga kulwana andabala ya Lakishi aya Aseka, mandabala acite malinga ayo akalinga acaalamobo mucishi ca Juda.

Basha mbobakacenjeekwa kwaangululwa

⁸ Mwaami Sedekiya abantu ba muJelusalemu bakasuminishanya kwaangulula

⁹ basha babo baEbulu basankwa alimwi abanakashi. Bakacita boobo kwaamba ayi kubule nabi womwi weshi anoocicite musha mwine Isilaelinyina.

¹⁰ Bamatanjilili boonse alimwi abantubo bakasumina kwaangulula basha babo akutabacatawo busha tubili. Lyalo bakasuminishanya akubaangulula.

¹¹ Sombi pesule bakasandula miyeeyo yabo, babacata akubakakatisha kuba basha alimwi.

¹² Mpomunyaawo Mwaami Lesa,

¹³ Lesa wa bene Isilaeli wakandwiita kwaambila bantu ayi, “Ndakapanga cipangano abamashali banu bakulukulu ndindakabakusha mubusha mucishi ca Ijipiti. Paciindi ico ndakabalwiita ayi

¹⁴ lyoonse mumwaaka wasanu ayobilo balyeelete kwaangulula basha boonse bene Ebulu abo babasebensela myaaka yosanwe awomwi. Sombi balo bamashali banu bakulukulu tabakwe kunyumfwila nabi kubikako maano kusheesho nshendakaamba.

¹⁵ Amwebo nshiku shiniini sheenda, mwakasandula miyeeyo yanu akucita cakansangalasha. Noonse mwakasuminishanya kwaangulula basha bene Isilaelinyinaanu akupanga cipangano kunembo lyangu muŊanda yangu umo moonambililwa.

¹⁶ Sombi bulya mwasandula miyeeyo yanu akucobola liina lyangu. Noonse mwakaboosha basha abo mbomwakaangulula kweelana ambobakalinga kulila. Ncakwiila mwakabakakatisha kuba basha alimwi.”

¹⁷ Paceebo ceeco nebo neMwaami Lesa ntokwaamba ayi, “Mwebo tamukwe kunyumfwila maswi angu pakukaka kwaangulula bakwabanu baEbulu. Aboobo ntoomwaangulula ayi mukafwe kunkondo, mwaalu alimwi akunsala. Ndaakumulengesha kulensha bunya kubwaami boonse bwa pacishi ca panshi.

¹⁸ Bantu abo bakapwaya cipangano cangu akwaalilwa kucita kweelana nshebakashomesha mucipangano ncebakapanga pameenso angu. Aboobo bantu abo ndaakubacita bweenka mbobacita moombe ngobapasula mushipansha shobilo akwiinda pakati.

¹⁹ Bamatanjilili ba bene Juda aba bene Jelusalemu, bacinenenene, bapailishi alimwi abantu boonse ba mucishi bakeenda pakati ka shipansha sha moombe uyo.

²⁰ Ono bantu abo boonse ndaakubaaba kubalwani baabo abo bafwima buumi bwabo. Mituntu yabo ilaakuba shakulya sha bayuni alimwi abanyama ba muluundu.

²¹ “Lyalo ndakwaaba Sedekiya mwaami wa bene Juda abacinenenene bakwe mumaansa a balwani babo abo bafwima buumi bwabo. Ndaakubaaba kubashilumamba bene Babiloni abo bakacileka kumulwana.

²² Ndaakubaambila ayi baboolele mundabala inene ino. Balaakwiilwana, kwiikoma akwiitenta. Kuswawaawo mandabala a muJuda ndaakwaalengesha kuba anga nduyanga umo mutekaali bantu. Nebo neMwaami Lesa ndaamba.”