Jelemiya 33 - Baibo Busansulushi Bwa Libuku Ili

Kushomesha kulangila kumwi

¹ Kaancili muntolongo kulubansa ulo, maswi a Mwaami Lesa akesa kuli ndime alimwi.

² Mwaami Lesa, uyo wakalenga cishi ca panshi, uyo wakacibumba alimwi akucibika pamusena wa ncico, ee, uyo ucite liina lya Mwaami Lesa wakaamba kuli ndime ayi,

³ “Ndilile, anebo ndaakukukumbula. Lyalo ndaakukulwiita shintu shibotu alimwi shikankamika isho nshooteshiiwo.

⁴ Ono pamaanda a muJelusalemu alimwi amaanda a bwaami a muJuda ayo akapwaikwa ayi bayake lubumbu lwakushinkila bene Babiloni abo bakapanga citunta cakutantaawo pakulwana, nebo neMwaami Lesa, Lesa wa bene Isilaeli ndaamba ayi,

⁵ ‘Maanda ayo alaakwisula mituntu ya basankwa abo mbweshi nkacaaye mubukali bwangu buyoosha abuumbi paciindi baakunoolwana abene Babiloni. Ndabala inene ino ndaakwiifutatila ceebo ca bubi bwa bantu bekalaamo.

⁶ “ ‘Nakubi boobo, ndaakushilika ndabala inene ino abantu bekalaamo akubalengesha kuba abuumi bubotu alimwi. Ndaakubatondesha luumuno luunji akubalengesha kwikala cakubula kulisukama.

⁷ Ndaakuboosha bene Juda abene Isilaeli kuswa mubusha akubayaka alimwi bweenka mbuli mbobakalinga kale kale.

⁸ Ndaakubasalasha kuswa kushibiibi isho nshebakambishila. Ncakwiila ndaakulekelela shibiibi shabo alimwi abwaashu bwabo.

⁹ Ndabala inene ya Jelusalemu ilaakundetela mpuwo, kusangalala, kulumbaishikwa alimwi abulemu kunembo lya mishobo yoonse ya pacishi ca panshi. Lyalo mishobo ilaakuloonda akututuma pakunyumfwa shintu shibotu nsheshi nkacitile bene Jelusalemu alimwi ambweshi nkabalengeshe kuswitilila akwikala muluumuno.’ ”

¹⁰ Mwaami Lesa waamba ayi, “Bantu batokwaamba ayi ndabala ino ilibo anga nduyanga. Taamu bantu bekalaamo nabi banyama. Ee, ndushinisho ndobatokwaamba. Mumandabala a muJuda amumikwakwa ya muJelusalemu taamu aciliimo. Taaku muntu nabi banyama bekalaamo. Sombi mumisena iyi mulaakunyumfwa

¹¹ ciyobeyobe cakusangalala akukondwa kwabo aciyobeyobe cakusangalalila bwiinga. Lyalo mulaakunyumfwa bantu kabeemba pakunooleta shipo shakulumba kuŊanda yangu neLesa. Balaakunokwaamba ayi, ‘Amulumbe Mwaami Lesa, Shinkusu shoonse mukwiinga uli kabotu ee, mukwiinga lusuno lwakwe ndwamuyayaya.’ Ncakwiila ndaakulengesha cishi ici kuswitilila bweenka mbocakalinga kale kale. Nebo neMwaami Lesa ndaamba.”

¹² Mwaami Lesa Shinkusu shoonse waamba ayi, “Mucishi cino ico cili anga nduyanga umo mutekaali bantu nabi banyama, cilaakuba amafulo abotu umo beembeshi mweshi bakanokweembelela alimwi.

¹³ Nkokwaamba ayi mandabala a mucishi ca tulundu, a mutulundu tuniini twa kumbo, a muNegefu, a mucishi cakwe Benjameni, mumishi ishingulukite Jelusalemu alimwi amumandabala a mucishi ca Juda, beembeshi balaakunoobelengelamo mbelele shabo alimwi. Nebo neMwaami Lesa ndaamba.”

¹⁴ Mwaami Lesa waamba ayi, “Ciindi cilaakushika ndyeshi nkacite kweelana ambondakashomesha bene Isilaeli abene Juda.

¹⁵ Paciindi ico ndaakusala wamulunyungu lwakwe Defedi ululeme kuba mwaami. Ulaakucita shintu shiluleme akoombolosha cakutanyengelela mucishi.

¹⁶ Munshiku sha bweendeleshi bwakwe bene Juda balaakupuluka abene Isilaeli balaakunookala kwakubula cakulisukama. Lyalo ulaakunokwiitwa liina lyakwaamba ayi, ‘Mwaami Lesa nkoKululama kwesu.’

¹⁷ Nebo, neMwaami Lesa ndashomesha kwaamba ayi kulaakunooba mwaami wamulunyungu lwakwe Defedi mucishi ca Isilaeli lyoonsebo.

¹⁸ Kulaakunooba abapailishi bene Lefi beshi banoonsebensela lyoonsebo mukunoobenga milambu yakutenta, shipo sha fulaulo amilambu imwi.”

¹⁹ Mwaami Lesa wakandwiita ayi,

²⁰ “Ndakapanga cipangano amalumwi alimwi amashiku kwaamba ayi kashisa paciindi ceelete lyoonsebo. Cipangano ici teshi cikapwaikweewo.

²¹ Mbweeke ubo nebo ndakapanga cipangano amusebenshi wangu Defedi kwaamba ayi mulunyungu lwakwe mulaakunooswa mwaami lyoonse. Ndakapanga cipangano abapailishi ba mumukowa wakwe Lefi ayi bananoonsebensela lyoonse. Shipangano ishi shoonse teshi shikapwaikweewo.

²² Ndaakufusha bamulunyungu lwa musebenshi wangu Defedi abapailishi ba mumukowa wakwe Lefi cakwaamba ayi balaakunokwaala akubelengekwa bweenka mbocaala kubelenga nyenyeenshi mwiculu nabi museese wa muloombe lwa lweenge.”

²³ Mwaami Lesa wakandwiita ayi,

²⁴ “Sa ulinyumfwite ayi bantu batokwaamba ayi ndisuulite bene Isilaeli alimwi abene Juda, mikowa yobilo iyo njendakasala? Paceebo ceeco bantu bangu balabalanga caminsuula alimwi tabababelengiiwo ayi ngumushobo, sobwe.

²⁵ Sombi nebo neMwaami Lesa ndakapanga cipangano amalumwi alimwi amashiku. Nebo ndime ndakapanga milawo iyo yeendelesha cishi ca panshi aliculu.

²⁶ Ono mbocibete lushinisho ayi ndakacita boobo, mbweeke ubo mbweshi nkacite kweelana acipangano cangu abamulunyungu lwakwe Jakobo alimwi amusebenshi wangu Defedi. Ndaakusalawo muntu womwi pabamulunyungu lwakwe Defedi ayi alele bamulunyungu lwakwe Abulaamu, Isaki aJakobo. Ndaakufwita nkumbu bantu bangu akubalengesha kuswitilila alimwi.”