Jelemiya 32 - Baibo Busansulushi Bwa Libuku Ili

Jelemiya mbwaakoola muunda

¹ Mumwaaka wa likumi wa bwaami bwakwe Sedekiya mwaami wa bene Juda alimwi uyo wakalinga mwaaka walikumi amyaaka yosanwe ayotatwe wa bwaami bwakwe Nebukadinesa mwaami wa bene Babiloni, Mwaami Lesa wakaamba kuli ndime neJelemiya.

² Paciindi ico bashilumamba ba mwaami wa bene Babiloni bakalinga kulwana ndabala ya Jelusalemu. Ciindi ico nebo ndakalinga kwaangitwe kulubansa lwa kuŋanda ya bwaami ya kuJuda.

³ Mwaami Sedekiya wakambika muntolongo uko ceebo wakampa mulandu. Wakaamba ayi ndakaambilisha ayi, “Mwaami Lesa wakaamba ayi, ‘Ndaakulengesha mwaami wa bene Babiloni kukoma ndabala inene iyo.

⁴ Mwaami Sedekiya teshi akapulukewo. Ulaakwaabwa mumaansa a mwaami wa bene Babiloni alimwi ulaakulanganaakwe akubandikaakwe mulomo amulomo.

⁵ Sedekiya ulaakutolwa kubabiloni uko nkweshi akanooshiite kushikila nkamoomboloshe. Nabi akalwane abene Babiloni, teshi akabakomeewo, sobwe. Nebo neMwaami Lesa ndaamba.’ ”

⁶ Mpeeke Mwaami Lesa wakandwiita ayi,

⁷ “Anamelo, mwanaabo bashimishaanu baShalumu, ulaakwisa mukukubona akwaamba ayi, ‘Ula muunda wangu uli kuAnatoti mucishi ca Benjameni ceebo ndiwe shikamukowa wangu uli pafwaafwi nooelete kuwuula kweelana amulawo wesu.’ ”

⁸ Ono bweenka bwakaamba Mwaami Lesa, Anamelo wakesa mukumbona kulubansa lwa ŋanda ya bwaami akunsenga ayi ngule muunda wakwe. Paceebo ceeco ndakeshiba ayi maswi alya ncakwiila akaswa kuMwaami Lesa.

⁹ Aboobo ndakoola muunda uyo wakwe Anamelo mupyala wangu uyo wakalinga kuAnatoti. Ndakapima maali pacakupimishaako akumupa. Maali a silifa ayo ngondakamupa akalinga likumi amaali osanwe aobilo.

¹⁰ Kuswawaawo ndakalemba liina lyangu akubika kalamatila wakeshibilo pankalata itondesha bwiine pamuunda uyo pameenso abakamboni. Lyalo ndakapima maali eelete akumupa.

¹¹ Pesule, ndakakabwesa nkalata shitondesha bwiine shobilo. Nkokwaamba ayi nkalata yomwi yakalamatikwa aitakwe kulamatikwa.

¹² Nkalata isho ndakashipa Baluki, mwanaakwe Neliya, mwishikulu wakwe Maaseiya. Ndakamupa nkalata isho pameenso akwe Anamelo alimwi abakamboni abo bakalembawo meenaabo apameenso a bantu boonse bakalinga kushiite mulubansa.

¹³ Lyalo ndakaambila Baluki bantu aba boonse kabanyumfwite ayi,

¹⁴ “Mwaami Lesa Shinkusu shoonse, Lesa wa bene Isilaeli waamba ayi, ‘Bwesa nkalata ishi shitondesha bwiine, yakalamatikwa aitakwe kulamatikwa akushibika munongo ayi shikalaminwe mumo kwamyaaka iinji itoosa.’

¹⁵ Ncakwiila Mwaami Lesa Shinkusu shoonse, Lesa wa bene Isilaeli waamba ayi, ‘Maanda, myuunda imwi amyuunda ya minyansa ilaakuulwa alimwi mucishi cino.’ ”

Jelemiya mbwaakapaila

¹⁶ Ndindakamana kupa Baluki makalata atondesha bwiine, ndakapaila ayi,

¹⁷ “NoBaami baLesa, mwakalenga cishi ca panshi aliculu munkusu shanu shinene. Ncakwiila taaku cintu ciyumu kuli ndimwe.

¹⁸ Mulatondesha lusuno lwanu kushuulu sha bantu, sombi mulapa milandu baana ceebo cakubisha kwa bamashali babo. Mwebo ndimwe baLesa bacite nkusu shinene abuumbi. Liina lyanu ndimwe Baami baLesa Beshinkusu shoonse.

¹⁹ Miyeeyo yanu njabusongo alimwi mulacita shintu shikankamika abuumbi. Mwebo mulabona shintu shoonse shicita bantu akubalambula kweelana amicito yabo.

²⁰ Mwakacita shitondesho sha nkusu sha kwiculu ashaankamiko mucishi ca Ijipiti isho nshemucicita abobulya muIsilaeli alimwi apakati ka mishobo imwi. Paceebo ceeco mulicite mpuwo kuli koonse.

²¹ Mwakaloondesha balwani besu kwiinda mukucita shitondesho sha nkusu sha kwiculu ashaankamiko. Munshila iyo mwakasebensesha nkusu shanu kukusha bene Isilaeli bantu banu muIjipiti.

²² Kuswawaawo mwakabapa cishi ici muli bubile abulongo bubotu kweelana ambomwakashomesha bamashali babo bakulukulu.

²³ Sombi balo ndibakesa mucishi ico akucibwesa ayi ncabo, tabakwe kukonkela milawo yanu nabi kwikala kweelana akwiisha kwanu. Taaku nabi comwi ncebakacitaawo pasheesho nshemwaakabaambila ayi banoocita. Paceebo ceeco, mwakaleta mapensho a mushobo uyu pakati kabo.

²⁴ “Bene Babiloni bapanga shitunta shakutantilaawo pakulwana kushingulusha ndabala inene ayi beekoome. Ono kwiinda munkondo, nsala amwaalu, ndabala inene iyi ilaakwaabwa mumaansaabo. Nkokwaamba ayi makani oonse ngomwakaamba nobaLesa ngalushinisho.

²⁵ Nakubi boobo noBaami baLesa ndimwe mwakantuma ayi ngule muunda amaali a silifa pameenso abakamboni nakubi kwaamba ayi ndabala inene iyi itooyanda kunyonyoolwa kubene Babiloni.”

²⁶ Mpomunyaawo Mwaami Lesa wakandwiita ayi,

²⁷ “Nebo ndime Mwaami Lesa, Lesa wa bantu boonse. Taaku cintu cinjumina kucicita.

²⁸ Aboobo ndaakwaaba ndabala inene iyi kuli Nebukadinesa mwaami wa bene Babiloni abashilumamba bakwe abo beshi bakeekoome

²⁹ akwiitenta mumulilo. Balaakwiitenta pantu pomwi amaanda ayo bantu ngobakalinga kusonkomwetawo bukali bwangu kwiinda mukutenta tununkila kabotu kuli Baali peculu lya shiluli alimwi akutilila balesa bamwi shipo sha shakunwa.

³⁰ Kuswabo kale kale kushikila asunu bantu bene Isilaeli alimwi abene Juda tabankondeleshiwo, sobwe. Ncakwiila balasonkomona bukali bwangu kwiinda mushintu nshebacita.

³¹ Bantu bamundabala inene ino bakasonkomona bukali bwangu akunkalasha kuswabo bushiku mbobakeeyaka. Aboobo ndipingite kwiinyonyoola

³² ceebo ca shibiibi shoonse isho shakacita bene Juda abene Jelusalemu pantu pomwi abamaami babo alimwi abamatanjilili babo, bapailishi babo alimwi abalaluki.

³³ Bakamfutatila nakubi kwaamba ayi ndakalinga kucitekobo kubeeisha, balo tebakalinga kunyumfwa nabi kwiiya, sobwe.

³⁴ Bakabika shibumbwabumbwa shilensha bunya muŊanda yangu iyo yakayakwa ayi noolambililwaamo, akwiilengesha kutanoosalalite.

³⁵ Bakayakila Baali shipaililo muCinyika ca Inomu pakunootentela lesa Moleki bana babo basankwa abanakashi. Ico ncintu nceentakwe kubaambila nabi kuciyeeyaawo kwaamba ayi inga bacita cintu cilensha bunya ca mushobo uyo akulengesha bene Juda kubisha.”

Kushomesha kulangila

³⁶ Mwaami Lesa, Lesa wa bene Isilaeli wakandwiita ayi, “Jelemiya, bantu batokwaamba ayi, ‘Kwiinda munkondo, nsala amwaalu, ndabala inene iyi ilaakwaabwa mumaansa a bene Babiloni.’ Ono kutika ashimwi nsheentooyanda kwaamba.

³⁷ Ndaakubunganya bantu kuswa mushishi shoonse isho nsheshi nkabapalanganishisheemo mubukali bwangu buyoosha abuumbi. Lyalo ndaakubaboosha kumusena uno ayi banookala cakubula kulisukama.

³⁸ Lyalo balaakuba bantu bangu, anebo ndaakuba Lesa wabo.

³⁹ Kuswawaawo ndaakubapa cintu comwi cakucita mubuumi bwabo. Cintu ico nkundemeka ciindi coonse kwaamba ayi shintu shikabeendele kabotu, balo abamulunyungu lwabo.

⁴⁰ Ndaakupanga cipangano ambabo calyoonse alyoonse. Ee, teshi nkacileeke kubacitila shibotu nabi kucileka kubalengesha kunoonda amyoyo yabo yoonse kwaamba ayi batakamfutatili tubili.

⁴¹ Anebo ndaakunoosangalete amoyo wangu woonse pakubacitila shintu shibotu akubekalika mucishi cino kwanshiku shoonse.”

⁴² “Bweenka mbondakaleta mapensho aya pabantu aba, mbweeke ubo mbweshi nkabape ashintu shibotu shoonse isho nshendakabashomesha.

⁴³ Bantu batokwaamba ayi cishi cino cilaakubabo anga nduyanga umo mutekaali bantu nabi banyama alimwi ayi cilaakupekwa kubene Babiloni. Sombi bantu balaakunokuula myuunda mucishi cino alimwi.

⁴⁴ Ndushinisho bantu balaakuula myuunda iyo amaali asilifa. Balaakulemba meenaabo pamakalata atondesha bwiine akubikawo kalamatila wakeshibilo pameenso a bakamboni. Ici cilaakucitika mucishi cakwe Benjameni, mumishi ishingulukite Jelusalemu, mumandabala a mucishi ca Juda, mumandabala ali kutulundu, mishi ili mutulundu tuniini aya muNegefu. Ndaakuboosha bantu aba mucishi cabo. Nebo neMwaami Lesa ndaamba.”