Jelemiya 31 - Baibo Busansulushi Bwa Libuku Ili

Bene Isilaeli mbobakaboolela kumishaabo

¹ Mwaami Lesa waamba ayi, “Ndaakuba Lesa wa shipani shoonse sha mumikowa ya bene Isilaeli, abalo balaakuba bantu bangu.

² Ndaakufwita nkumbu bantu beshi bakapuluke munkondo muluyanga. Ndaakwisa mukupa kookesha kubene Isilaeli.”

³ Mwaami Lesa wakabonekela kuli ndiswe kale kale akwaamba ayi, “Ndakamusuna alusuno lutamaani paceebo ceeco ncitolelela kumunyumfwila nkumbu.

⁴ Ndaakumuyaka alimwi, ncakwiila mulaakuyakwa nobene Isilaeli. Mulaakubwesa misebe yanu alimwi akuya mukushana cakusangalala.

⁵ Mulaakushanga alimwi myuunda ya minyansa patulundu twa Samaliya. Balimi balaakwiishanga akulya shisepo sha njiyo.

⁶ Bushiku bulaakushikila beshikulindilila ndyeshi bakaliile patulundu twa kuEfuleemu ayi, ‘Kamwisa tuye kuSiyoni, ee, tuye kuMwaami Lesa, Lesa wesu.’ ”

⁷ Mwaami Lesa waamba ayi, “Amwiimbile Jakobo kamusangalete. Amulumbaishe cakoolobesha mushobo uyo wiindaawo. Kamulumbaisha cakunyumfwika akwaamba ayi, ‘NoBaami baLesa, amupulushe bantu banu, ee, bene Isilaeli bakacaalaawo.’

⁸ Amubone, ndaakubaleta kuswa kucishi ca kumatwa akubayobolola kuswa kweela cishi ca panshi. Pakati kabo palaakunooli boofu abalema, bali pakati abali pankata. Lilaakunooli likoto linene lyeshi likaboole.

⁹ Balaakunoosa bulila alimwi balaakunoosa bupaila ndaakunoobaboosha. Ndaakubatanjilila mweela milonga ya maanshi, munshila ibotu umo mobatakoonshi kulisuntula. Ndaakucita boobo ceebo ndi anga ngumushali musankwa kubene Isilaeli alimwi bene Efuleemu bali anga ngumwanaangu musankwa wakwiiya.

¹⁰ “Amunyumfwe maswi angu neMwaami Lesa, mwebo nomishobo ya bantu. Amwaambilishe maswi aya kushishi sha muloombe lwa lweenge ayi, ‘Ndakapalanganya bantu bangu, sombi ndaakubabunganya alimwi. Ndaakubalama bweenka mweembeshi mbwaalama litanga lyakwe lya mbelele.’

¹¹ Ceebo nebo neMwaami Lesa ndaakulubula bamulunyungu lwakwe Jakobo. Ncakwiila ndaakubalubula kuswa kubaabo babeendaawo nkusu.

¹² Balaakwisa akoolobesha cakusangalala peculu lya tulundu twa Siyoni. Balaakukondwa ceebo ca coolwe ncaakabapa Mwaami Lesa, nkokwaamba ayi shili anga ngamaila, waini, mafuta a olifi, bana ba mbelele alimwi aba ŋombe. Balaakubabo anga ngumuunda utililwa kabotu alimwi teshi bakabewo tubili mubuumba.

¹³ Bamyooye balaakushana akusangalala. Basankwa bacikula bwangu alimwi abamanene abalo balaakusangalala. Kulila kwabo ndaakukusandula kukabe kusangalala. Ndaakuboombulusha akubasangalasha mumusena wakubapa buumba.

¹⁴ Bapailishi ndaakubapa shakulya shiinji shibotu akupa bantu bangu shoonse shiyandika mubuumi bwabo. Nebo neMwaami Lesa ndaamba.”

Nkuumbu sha Mwaami Lesa pabene Isilaeli

¹⁵ Mwaami Lesa waamba ayi “Liswi lyanyumfwika muLama, kooloma kwa mibila. Lakelo utoolila bana bakwe wakaka akuumushikwa mukwiinga bafwa.”

¹⁶ Ono Mwaami Lesa waamba ayi, “Cileke kulila akukunkumuna minsonshi yako. Mulimo ngowakacita pabana bako ulaakulambulwa. Boonse balaakuboola kuswa kucishi ca balwani bako.

¹⁷ Aboobo kulangila buumi kuya kunembo nkokuli. Bana bako balaakuboola kucishi cine mishaabo. Nebo neMwaami Lesa ndaamba.

¹⁸ “Ndushinisho ndakanyumfwa kulila kwa bene Efuleemu ayi, ‘Mwakatutambisha anga ngumucongoshi mucende aswebo twakabomba. Amutubooshe, aswebo tulilibambite kuboola kuli ndimwe ceebo ndimwe Baami baLesa, baLesa besu.

¹⁹ Pesule lya kupambuka, twakaboola munshila alimwi. Nditwakeshiba ayi twaluba twakalyuuma mucaamba. Twakanyumfwa nsoni akulisenda ceebo cakubisha kwesu kwakuswabo kubwanike.’

²⁰ Sa Efuleemu teshi mwanaangu musankwa ngoonsuni abuumbi? Sa teshi ngomwaana unsangalasha? Nakubi kwaamba ayi ndamukalookila, sombi ndamuyeeya. Aboobo moyo wangu ulakumbwa kumubona. Ee, ndamwiibaluka akumufwita nkumbu abuumbi. Nebo neMwaami Lesa ndaamba.

²¹ “Amushimpike twishibilo munshila, mulabilile nshila njemutokwiindaamo. Amupiluke mwebo nobene Isilaeli, amupiluke kumandabalaanu ngomwakashiya.

²² Citooba ciindi cilaamfu buyani kamutonsha mwebo nobaana batashomeki? Nebo neMwaami Lesa ndaakulenga cintu cipya pacishi ca panshi, ee, cintu cipusenebo anga ngumwanakashi kutabilila musankwa.”

Kuswitilila kwa bantu bakwe Lesa kwa kunembo

²³ Mwaami Lesa Shinkusu shoonse, Lesa wa bene Isilaeli waamba ayi, “Ndaakumana kubaboosha kuswa mubusha, bantu ba mucishi ca Juda amumandabala a njiyo balaakutalika alimwi kusebensesha maswi akwaamba ayi, ‘Mwaami Lesa aakupe coolwe, webo Omusena ululeme wa Jelusalemu. Aape coolwe kuli ndiwe Okalundu kasalalite.’

²⁴ Lyalo bantu balaakwikala muJuda amumandabala amuumo oonse. Mulaakuba balimi alimwi abeembeshi ba mbelele.

²⁵ Ndaakubooshamo nkusu sha baabo balemete akupa shakulya batoowisooka kunsala.

²⁶ Lyalo bantu balaakunokwaamba ayi, ‘Ndalinga ndoona tulo tubotu, ncakwiila ndaboolelwaamo.’ ”

²⁷ Mwaami Lesa waamba ayi, “Ciindi cilaakushika ndyeshi nkasushe bantu abanyama mucishi ca Isilaeli coonse amucishi ca Juda.

²⁸ Bweenka mbuli mbondakabikako maano kubatumuna, kubapwayoola, kubakoma, kubanyonyoola akubapumununa, mbweeke ubo mbweshi nkabikeko maano kubashanga akubayaka alimwi.

²⁹ Ono ciindi ico cakushikila bantu teshi bakaambewo tubili ayi, ‘Bameeshiwesu bakalya shisepo shisakamwita, aboobo meeno a bana babo akaba abuwe.’

³⁰ Sombi uyo woonse weshi akalye shisepo shisakamwita ngweshi akanyumfwe buwe mwiine. Nkokwaamba ayi muntu ulaakufwita pacibiibi cakwe mwiine.”

³¹ Mwaami Lesa waamba ayi, “Inshiku shilaakwisa, ndyeshi nkapange cipangano cipya abene Isilaeli alimwi abene Juda.

³² Teshi cikabe mbuli ceeco cakalinga pakati ka bamashali babo bakulukulu ciindi ndindakabatanjilila kuswa muIjipiti. Nakubi kwaamba ayi nebo ndakalinga mbuli ibaabo, balo tabakwe kulama cipangano ici, sobwe.

³³ Ono nebo neMwaami Lesa mbulya mbweshi nkapangane abene Isilaeli munshiku shitoosa. Ndaakubika milawo yangu mumiyeeyo yabo alimwi akwiilemba mumyoyo yabo. Ndaakuba Lesa wabo abalo balaakuba bantu bangu.

³⁴ Taaku eshi akanokwiisha mubye nabi kwiisha mukwabo ayi eshibe ndime neMwaami Lesa mukwiinga boonse balaakushiba, kuswa kumuniini kushika akumunene. Ndaakulekelela bubi bwabo alimwi shibiibi shabo teshi nkashiibalukeewo. Nebo neMwaami Lesa ndaamba.”

³⁵ Mwaami Lesa wakalenga lisuba ayi kalipa mumuni malumwi. Wakalenga mweenshi anyenyeenshi ayi kashipa mumuni mashiku. Lakwe ulafundoola lweenge akulengesha maaba kuyooma. Liina lyakwe nguMwaami Lesa Shinkusu shoonse. Mwaami Lesa uyo waamba ayi,

³⁶ “Kulilabo shintu isho shakalengwa kashiliiwo amushobo wa Isilaeli ulaakunooliiwo.

³⁷ Na kukabe bushiku bantu mbweshi bakakonshe kupima liculu akukonsha kubona lwiimbi lwa cishi ca panshi akulwishiba, mbobushiku nebo neMwaami Lesa mbweshi nkakake bene Isilaeli ceebo ca shibiibi nshebakacita. Nebo neMwaami Lesa ndaamba.”

³⁸ Mwaami Lesa waamba ayi, “Ciindi cilaakushika ndabala inene ya Jelusalemu ndyeshi ikayakwe alimwi ayi nindabala yangu kuswa kuŊanda ilaamfu ya Ananelo kumbo kuya mukushika akuMwinjililo wa Likonko.

³⁹ Lyalo nyinsa ilaakuswa kumbo kuya mukushika akuKalundu ka Galebu kuya mukushinguluka akuGowa.

⁴⁰ Kuswawaawo cinyika coonse uko kufukilwa bantu alimwi kusowelwa matombe amyuunda yoonse ili petala lya Kalonga ka Kidiloni kuya mukushika akuMwinjililo wa Liaki nkoubetele kwicwe, ulaakuba musena wangu usalalite. Ndabala inene iyi teshi ikapwayoolwewo tubili nabi kunyonyoolwa.”