Jelemiya 29 - Baibo Busansulushi Bwa Libuku Ili

Nkalata Jelemiya njaakalembela bene Juda bakalinga muBabiloni

¹ Aya ngamaswi akalinga munkalata iyo nebo neJelemiya njendakatuma kuswa kuJelusalemu kuya kubacinenenene, bapailishi, balaluki abantu boonse abo Nebukadinesa mbwaakatola busha kuBabiloni kuswa kuJelusalemu.

² Ici cakacitika mwaami Jeoiyakini, banyina, bacinenenene bakwe, bamatanjilili bene Juda aba bene Jelusalemu, beshikubesa shintu alimwi abacibwene shakupangapanga ndibakamana kutolwa busha kuBabiloni kuswa kuJelusalemu.

³ Nkalata iyi ndakapa Elasa mwanaakwe Shafani aGemaliya mwanaakwe Ilikiya abo Sedekiya mwaami wa bene Juda mbwaakatuma kuBabiloni kumwaami Nebukadinesa. Nkalata iyo yakalinga kwaamba ayi,

⁴ “Mwaami Lesa Shinkusu shoonse, Lesa wa bene Isilaeli utookwaamba kuli baabo boonse bakatolwa busha kuBabiloni kuswa kuJelusalemu ayi,

⁵ ‘Amuyake maanda munookalaamo. Amulime myuunda akulya nshemwacanaamo.

⁶ Amweebe mukashale baana basankwa abanakashi. Mukeebele bana banu basankwa akweebesha bana banu banakashi kwaamba ayi abalo bakashalane. Amushalane mukafuule. Tamweelete kuceya.

⁷ Kuswawaawo muyandoole luumuno akuswitilila kwa ndabala iyo njendakamutolaako busha. Amumpaile kuli ndime neMwaami Lesa pandabala iyo ceebo na ikaswitilile, amwebo mulaakuswitilila.’

⁸ Ee, Mwaami Lesa Shinkusu shoonse, Lesa wa bene Isilaeli waamba ayi, ‘Mutasuminishi balaluki nabi bamukamwaami bali pakati kanu kumubeca. Mutakutiki kumaloto abo ayo ngomubayuminisha ayi kababaawo.

⁹ Batoomulalukilabo shabubeshi muliina lyangu. Nshikwe kubatumawo. Nebo neMwaami Lesa Shinkusu shoonse ndaamba.’

¹⁰ “Mwaami Lesa utookwaamba ayi, ‘Myaaka makumi osanwe aobilo yaakukumana, mwebo kamuli kuBabiloni, ndaakwisa kuli ndimwe akucita kweelana ambondakamushomesha kwaamba ayi ndaakumuboosha kumusena uno.

¹¹ Mukwiinga nemwiine ndishi kale miyeeyo njeencite pali ndimwe. Ndicite miyeeyo yakulengesha kuswitilila kuteshi yakumucisa, sobwe. Ncakwiila njimiyeeyo yakumupa kulangila abuumi kuya kunembo.

¹² Lyalo mulaakunjita akupaila kuli ndime, anebo ndaakumunyumfwa.

¹³ Mulaakunyandoola akuncana ceebo mulaakunyandoola camoyo woonse.

¹⁴ Ncakwiila mulaakuncana alimwi ndaakumuboosha mucishi canu. Ndaakumubunganya kuswa kumishobo yoonse akumisena uko nkondakamupalanganishisha akumuboosha kucishi uko nkondakamukusha akumutuma mubusha. Nebo neMwaami Lesa ndaamba.’

¹⁵ “Ono mwebo inga mwaamba ayi, ‘Mwaami Lesa watupa balaluki muno muBabiloni.’

¹⁶ Sombi lakwe Mwaami Lesa utookwaamba makani aya pamwaami uyo ushiite pacuuna ca bwaami cakwe Defedi akubantu boonse abo bakacaala mundabala ino, nkokwaamba ayi bene mishaanu abo batakwe kutolwaanu mubusha.

¹⁷ Ee, Mwaami Lesa Shinkusu shoonse waamba ayi, ‘Ndaakubatumina nkondo, nsala amwaalu alimwi ndaakubalengesha kuba anga ninkuyu shibiibi cakutalikwa.

¹⁸ Ndaakubatandaanya kunkondo, nsala amwaalu akubalengesha kupatwa kubwaami boonse bwa pacishi ca panshi. Lyalo balaakuba cintu ceelete kushinganwa, kuloondwa, kushibulukwa akusekwa pakati ka mishobo iyo njendakabatandilaako.

¹⁹ Ndaakucita boobo ceebo cakwaamba ayi tabakwe kunyumfwa maswi ayo ngondakabatumina tubili tubili kwiinda mubasebenshi bangu balaluki. Nabi ndimwe nomwakaya mubusha tamukwe kunyumfwaawo, sobwe. Nebo neMwaami Lesa ndaamba.’

²⁰ “Paceebo ceeco, amunyumfwe maswi a Mwaami Lesa, noonse mwebo nomwakaswa kuJelusalemu akutolwa busha kuBabiloni.

²¹ Mwaami Lesa Shinkusu shoonse utokwaamba makani aya pali Aabu mwanaakwe Kolaya aSedekiya mwanaakwe Maseiya abo batoomulalukila shabubeshi muliina lyangu. Waamba ayi, ‘Ndaakubaaba mumaansaakwe Nebukadinesa mwaami wa bene Babiloni uyo eshi akabacaaye kamubweneeko.’

²² Lyalo bantu boonse abo bakatolwa busha kuBabiloni kuswa kuJuda pakushingana, balaakunokwaamba ayi, ‘Mwaami Lesa aakuciite bweenka mbwaakacita Sedekiya aAabu abo bakatentwa mumulilo kumwaami wa bene Babiloni.’

²³ Ico cilaakucitika ceebo bakacita shintu shibiibi abuumbi muIsilaeli. Bakalinga kucita bulale abamuka shikamukobonyinaabo akwaamba shabubeshi muliina lya Mwaami Lesa. Bakaamba shintu isho Mwaami Lesa nshaatakwe kwaamba. Ulishishi alimwi ngukamboni pali nshisho. Mwaami Lesa mbwaamba ubo.”

Nkalata yakwe Shemaya

^24-25 Mwaami Lesa Shinkusu shoonse, Lesa wa bene Isilaeli wakampa maswi akulwiita Shemaya mwine Neelamu. Shemaya wakalinga watuma nkalata muliina lyakwe mwiine kubantu boonse ba muJelusalemu, kuli Sefaniya mwanaakwe Maseiya mupailishi akubapailishi bamwi boonse. Wakaambila Sefaniya ayi,

²⁶ “Mwaami Lesa ngowakakusala kuba mupailishi pamusena wakwe Jeoiyada ayi unokweendelesha Ŋanda ya Mwaami Lesa. Aboobo ulyeelete kwaanga ncetani akufwalika nteneshi ya nshimbi muntu uli woonse ucinkukite utoolibecesha kuba mulaluki.

²⁷ Ono ceebonshi tookwe kucita boobo kuli Jelemiya wa kuAnatoti uyo utoolyaamba bulaluki pakati kanu?

²⁸ Lakwe wakatutumina makani kuBabiloni ayi, ‘Mulaakwikalaako ciindi cilaamfu. Amuyake maanda munookalaamo. Amulime myuunda akulya nshemwacanaamo.’ ”

²⁹ Sombi Sefaniya mupailishi wakambelengela nkalata iyi nebo neJelemiya.

³⁰ Kuswawaawo Mwaami Lesa wakaŋambila ayi,

³¹ “Tuma makani kubantu boonse bali mubusha akwaamba ayi nebo neMwaami Lesa pali Shemaya mwine Neelamu ndaamba ayi, ‘Ono ceebo cakwaamba ayi Shemaya wakamulalukila nakubi kwaamba ayi nshikwe kumutuma akumulengesha kushoma shabubeshi,

³² ncakwiila ndaakumupa mulandu pantu pomwi abamulunyungu lwakwe. Taaku shikamukowa nabibo womwi weshi akacaale alimwi teshi akabonewo shintu shibotu nsheshi nkacitile bantu bangu ceebo wakaambila bantu kubukila ndime neMwaami Lesa. Nebo neMwaami Lesa ndaamba.’ ”