Jelemiya 28 - Baibo Busansulushi Bwa Libuku Ili

Jelemiya aAananiya mulaluki mubeshi

¹ Mumweenshi wasanu mumwaaka weenka uyo, mwaaka wane wa bwaami bwakwe Sedekiya mwaami wa bene Juda, Ananiya mulaluki mwanaakwe Asuwa wa kuGibyoni wakandwiita muŊanda ya Mwaami Lesa pameenso a bapailishi abantu boonse ayi,

² “Mwaami Lesa Shinkusu shoonse, Lesa wa bene Isilaeli waamba ayi, ‘Ndaakutyola lijoko lya mwaami wa bene Babiloni.

³ Myaaka yobilo keetana kumana, ndaakuboosha shisebensesho shoonse sha muŊanda ya Mwaami Lesa isho Nebukadinesa mwaami wa bene Babiloni nshaakabwesa akutola kuBabiloni.

⁴ Ndaakuboosha aJeoiyakini mwanaakwe Jeoiyakimu mwaami wa bene Juda aboonse abo bakatolwa busha kuBabiloni kuswa kuJuda ceebo ndaakutyola lijoko lya mwaami wa bene Babiloni. Nebo neMwaami Lesa ndaamba.’ ”

⁵ Mpomunyaawo nebo neJelemiya ndakakumbula mulaluki Ananiya pameenso a bapailishi abantu boonse abo bakalinga kwiimfwi muŊanda ya Mwaami Lesa.

⁶ Ndakaamba ayi, “Akube boobo! Mwaami Lesa aacite bweenka ubo! Mwaami Lesa aacite kweelana amaswi ngowaamba mukuboosha shisebensesho sha Ŋanda yakwe pantu pomwi abantu boonse abo bakatolwa busha kuBabiloni kumusena uno.

⁷ Nakubi boobo kutika nsheentooyanda kwaamba kuli ndiwe akubantu bamwi boonse.

⁸ Kuswabo kukale kale balaluki abo bataanshi pali ndiwe andime bakalaluka shankondo, mapensho amyaalu kucitikila shishi shiinji amalelo anene.

⁹ Sombi mulaluki ulaluka shaluumuno ulaakubonwa ayi ncakwiila wakatumwa kuMwaami Lesa na isho nshaakaamba shacitika cancinencine.”

¹⁰ Kuswawaawo Ananiya mulaluki wakakusha lijoko munshingo yangu nebo neJelemiya akulityoloola.

¹¹ Mpeeke wakaamba bantu boonse kabanyumfwite ayi, “Mwaami Lesa waamba ayi, ‘Bweenka bulya mbweshi nkatyole lijoko lyakwe Nebukadinesa mwaami wa bene Babiloni kuswa munshingo sha mishobo yoonse myaaka yobilo keetana kumana.’ ” Lyalo ndakakumbuluka.

¹² Ndipakeendabo ciindi ciniini kuswa pakatyolela Ananiya lijoko lyakalinga munshingo yangu, Mwaami Lesa wakaŋambila ayi,

¹³ “Koya ukaambile Ananiya ayi nebo neMwaami Lesa ndaamba ayi, ‘Wakonsha kutyola lijoko lya cisamu, sombi ndaakuboosheshaawo lya nshimbi.’

¹⁴ Nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Ndaakubika lijoko lya nshimbi munshingo sha mishobo ya bantu iyi mukwaamba ayi bakasebensele Nebukadinesa mwaami wa bene Babiloni. Ncakwiila abalo balaakunoomusebensela. Ndaakulengesha kwaamba ayi abanyama bamuluundu boonse akabaleele.’ ”

¹⁵ Mpomunyaawo nebo neJelemiya ndakaambila Ananiya mulaluki ulya ayi, “Nyumfwa webo Ananiya! Mwaami Lesa taakwe kukutumaawo, sobwe. Sombi webo walengesha bantu aba kushoma makani abubeshi.

¹⁶ Aboobo Mwaami Lesa waamba ayi, ‘Ntooyanda kukushaawo pacishi ca panshi. Utoofwa mwaaka weenka uno ceebo webo waambila bantu kubukila ndime neMwaami Lesa.’ ”

¹⁷ Mumweenshi wasanu ayobilo mumwaaka weenka uyo, Ananiya mulaluki wakafwa.