Jelemiya 27 - Baibo Busansulushi Bwa Libuku Ili

Jelemiya mbwaakalyaanga lijoko

¹ Kumatalikilobo a bwaami bwakwe Sedekiya mwanaakwe Josiya mwaami wa bene Juda, Mwaami Lesa wakandwiita nebo neJelemiya ayi,

² “Bwesa shitolopo ashiceyi upange lijoko akulyaanga munshingo.

³ Kuswawaawo utume maswi kubamaami ba kuEdomu, Moabu, Amoni, Taya aba kuSidoni kwiindila mubatumwi abo bakesa kuJelusalemu ayi babonane aSedekiya mwaami wa bene Juda.”

⁴ Lyalo Mwaami Lesa Shinkusu shoonse, Lesa wa bene Isilaeli wakaŋambila kulwiita bantu abo ayi abalo balwiite bamaami babo inkombe yakaswa kuli nguwe ayi,

⁵ “Ndakalenga cishi ca panshi, bantu abanyama bekalaamo kwiinda munkusu shangu shinene abuumbi alimwi alyaansa lyangu lifungulukite. Cishi ici ndakonsha kucipa kumuntu uli woonse ngondasala.

⁶ Ono ntokwaaba shishi shanu shoonse kumusebenshi wangu Nebukadinesa mwaami wa bene Babiloni. Ndaakulengesha kwaamba ayi abanyama bamuluundu boonse akabaleele.

⁷ Mishobo ya bantu yoonse ilaakumusebensela akusebensela mwanaakwe amwishikulu wakwe kushikila ciindi cakukomwa kwa cishi cakwe. Paciindi ico mushobo wakwe ulaakunoosebensela mishobo iinji abamaami banene.

⁸ “Ono na umwi mushobo nabi bwaami bukabule kusebensela Nebukadinesa mwaami wa bene Babiloni nabi kusumina bweendeleshi bwakwe, mushobo uyo ndaakuupa mulandu wa nkondo, nsala amwaalu kushikila Nebukadinesa akanyonyoole mushobo uyo cakumaninina.

⁹ Aboobo mutanoonyumfwila balaluki banu, bamukamwaami, beshikupandulula shiloto nabi beshikwaamba amishimu alimwi abaloshi abo bamwaambila ayi, ‘Teshi mukasebenselewo mwaami wa bene Babiloni.’

¹⁰ Balamulalukila shabubeshi isho sheshi shikamulengeshebo kutolwa kulaamfu kuswa mucishi cine mishaanu. Nebo ndaakumutanda, mukaloobe.

¹¹ Sombi na mushobo umwi wasumina bweendeleshi bwa mwaami wa bene Babiloni akumusebensela, walo ndaakuuleka ayi kooshiite mucishi ca nguwo akunoolima mumo. Nebo neMwaami Lesa ndaamba.”

¹² Ndakaambilako aSedekiya mwaami wa bene Juda ayi, “Amusumine bweendeleshi bwa mwaami wa bene Babiloni. Kamumusebensela pantu pomwi abantu bakwe, ingaawo mukabe abuumi.

¹³ Ono mwebo abantu banu mutooyanda kufwitanshi kunkondo, kunsala akumwaalu? Ishi nsheshintu isho Mwaami Lesa nshaapingite kucitila mushobo uli woonse uyo weshi ukabule kusebensela mwaami wa bene Babiloni.

¹⁴ Mutakutiki shitokwaamba balaluki abo batoomwaambila ayi, ‘Teshi mukasebenselewo mwaami wa bene Babiloni.’ Batoomulalukilabo shabubeshi.

¹⁵ Mwaami Lesa wakaamba ayi, ‘Nshikwe kubatuma, sobwe. Batoolaluka shabubeshi muliina lyangu. Paceebo ceeco, ndaakumutanda, mukaloobe mwebo pantu pomwi abalaluki abo bamulalukila shabubeshi.’ ”

¹⁶ Mpomunyaawo ndakaambila bapailishi abantu boonse ayi Mwaami Lesa waamba ayi, “Mutakutiki balaluki abo baamba ayi, ‘Onoonobo shisebensesho sha muŊanda ya Mwaami Lesa shilaakuletwa kuswa kuBabiloni.’ Aba bantu batoomulalukilabo shabubeshi.

¹⁷ Mutabakutiki. Amusebenselebo mwaami wa bene Babiloni ndyeshi mube abuumi. Ceebonshi ndabala iyi nceshi ibete matongo?

¹⁸ Na mbalaluki abo bacite maswi angu neMwaami Lesa, abakombelele kuli ndime neMwaami Lesa Shinkusu shoonse ayi shisebensesho isho shakacaala muŊanda yangu, muŋanda ya mwaami wa bene Juda amuJelusalemu shitatolwi kuBabiloni.

¹⁹ Nebo neMwaami Lesa Shinkusu shoonse ndakaamba pamacinko, cingomo ca bulonse, shikoci ashisebensesho shimwi isho shakacaala mundabala inene ino.

²⁰ Isho nsheshintu Nebukadinesa mwaami wa bene Babiloni nshaatakwe kubwesa ndyaakatola busha Jeoiyakini mwanaakwe Jeoiyakimu mwaami wa bene Juda kuswa kuJelusalemu kuya kuBabiloni pantu pomwi abacinenenene ba bene Juda aba bene Jelusalemu.

²¹ Ono amukutike nsheentokwaamba nebo neMwaami Lesa Shinkusu shoonse, Lesa wa bene Isilaeli pashintu isho shakacaala muŊanda ya Mwaami Lesa, muŋanda ya mwaami wa bene Juda amuJelusalemu.

²² Shintu isho shilaakutolwa kuBabiloni uko nkweshi bakanoobete kushikila bushiku mbweshi nkashiyeeye. Lyalo ndaakushileta akushiboosha mumusena uno. Nebo neMwaami Lesa ndaamba.”