Jelemiya 26 - Baibo Busansulushi Bwa Libuku Ili

Jelemiya mbwaakoomboloshekwa

¹ Kumatalikilobo a bwaami bwakwe Jeoiyakimu mwanaakwe Josiya mwaami wa bene Juda, Mwaami Lesa wakandwiita ayi,

² “Imikana mulubansa lwa Ŋanda yangu neMwaami Lesa akwaambila bantu boonse ba mumandabala a muJuda abo besa mukulambila muŊanda yangu. Ubalwiite shoonse nshendakwaambila cakutashiyawo liswi nabi lyomwi.

³ Mpashi inga banyumfwa basanduka kuswa kunshila shabo shibiibi. Na bacita boobo, inga ndasandula miyeeyo yangu akutabaletela mapensho ayo ngondalinga kuyeeyela kubacita ceebo ca micito yabo ibiibi.”

⁴ Mwaami Lesa wakandwiita kwaambila bantu ayi, “Nebo neMwaami Lesa ndaamba ayi, ‘Mulyeelete kunyumfwila ndime mukukonkela milawo yangu iyo njendakamupa

⁵ alimwi akunyumfwa maswi a balaluki basebenshi bangu abo mbondakalinga kumutumina ciindi coonse. Mwebo tamukwe kukonkelawo kale nshebakaamba.

⁶ Ono na mutolelele kutanyumfwila, ndaakucita Ŋanda yangu ino bweenka mbondakacita musena wa Shilo. Lyalo liina lya ndabala ino lilaakunoosebenseshekwa mukushingana pakati ka mishobo yoonse ya mucishi ca panshi.’ ”

⁷ Bapailishi, balaluki abantu boonse bakanyumfwa nebo neJelemiya kaaŋamba maswi ayo muŊanda ya Mwaami Lesa.

⁸ Sombi ndindakamanishabo kwaambila bantu shoonse shakaŋambila Mwaami Lesa, balaluki, bapailishi abantu boonse bakancata akwaamba ayi, “Webo ulyeelete kucaikwa!

⁹ Ceebonshi utoolalukila muliina lya Mwaami Lesa ayi Ŋanda yakwe Lesa ino ilaakubabo bweenka mbuli musena wa Shilo andabala ino kunyonyoolwa akuba matongo?” Mpeeke bantu boonse bakanshinguluka muŊanda ya Mwaami Lesa.

¹⁰ Ono bacinenenene ba bene Juda ndibakanyumfwa cikani ico bakaswa kuŋanda ya bwaami akuya kuŊanda ya Mwaami Lesa. Lyalo bakekala mumisena yabo kumulyango wa Mwinjililo Upya.

¹¹ Mpeeke bapailishi abalaluki bakaambila bacinenenene abantu boonse ayi, “Muntu uyu ulyeelete kucaikwa ceebo walaluka shakunyonyoolwa kwa ndabala ino. Mwalinyumfwila amatwi anu nobeene!”

¹² Mpomunyaawo nebo neJelemiya ndakaambila bacinenenene boonse alimwi abantu boonse ayi, “Mwaami Lesa ngowakantuma ayi nse ndaluke shoonse nshemwanyumfwa paŊanda yakwe ino alimwi apandabala ino.

¹³ Ono amusandule nshila shanu amicito yanu akunyumfwila Mwaami Lesa, Lesa wanu. Lyalo Mwaami Lesa ndyeshi abule kumuletela mapensho ayo ngwaakaamba ayi ulaakumuletela.

¹⁴ Ono nebo ndi mumaansaanu. Amunciite cili coonse ncemutooyeeya ayi ncibotu alimwi cililuleme.

¹⁵ Sombi ncemweelete kwishiba ncakwaamba ayi na muncaaye, ingayi mutooliletela mulandu wakucaya muntu utacite mulandu akuuleta pandabala ino apabantu bekalaamo. Ceebo kwaambabo lushinisho, Mwaami Lesa ngowantuma ayi nse ŋambe maswi aya oonse kamunyumfwite.”

¹⁶ Mpomunyaawo bacinenenene abantu boonse bakaambila bapailishi abalaluki ayi, “Muntu uyu taaelete kucaikwa mukwiinga watwaambila muliina lya Mwaami Lesa, Lesa wesu.”

¹⁷ Kuswawaawo bamaloba bamwi ba mucishi bakaya kunembo akwaambila likoto lya bantu lyoonse ayi,

¹⁸ “Mika wa kuMolesheshi wakalinga kulaluka munshiku shakwe Esekiya mwaami wa bene Juda. Wakaambila bene Juda boonse ayi Mwaami Lesa Shinkusu shoonse waamba ayi, ‘Siyoni ulaakushabwa anga ngumuunda, Jelusalemu ulaakuba matongo. Kalundu ka Ŋanda yakwe Lesa kalaakuba musaansa.’

¹⁹ “Sa Esekiya mwaami wa bene Juda nabi umwi uli woonse wa muJuda wakamucaya? Sa Esekiya taakwe kuloonda Mwaami Lesa akusenga ayi abamunyumfwile nkumbu? Sa Mwaami Lesa taakwe kusandula miyeeyo yakwe akutabaletela mapensho ayo ngaakaamba kubapa? Bulya tutooliletelabo mapensho ayoosha.”

²⁰ Uliya mwanaakwe Shemaya wa kuKilyati Jeyalimu alakwe wakalaluka muliina lya Mwaami Lesa. Wakalaluka shintu shomwi sheenka shalaluka Jelemiya pandabala ino apacishi cino.

²¹ Ono mwaami Jeoiyakimu, bacinenenene bakwe boonse alimwi abamatanjilili ndibakanyumfwa maswi akwe, mwaami wakalinga kusuni ayi amucaaye. Sombi Uliya wakanyumfwa cikani ico, aboobo wakaloonda akucicila kuIjipiti.

²² Nakubi boobo mwaami Jeoiyakimu wakatuma Elinatani mwanaakwe Akibo kuIjipiti pantu pomwi abantu bamwi.

²³ Uliya bakamuleta kuswa kuIjipiti akumutola kumwaami Jeoiyakimu uyo wakamucaisha amupeeni akusowa mutuntu wakwe kushuumbwe sha bantu boonse.

²⁴ Sombi Aikamu mwanaakwe Shafani wakalinga kulubasu lwangu, aboobo nshikwe kupekwa mumaansa a bantu ayi ncaikwe.