Jelemiya 25 - Baibo Busansulushi Bwa Libuku Ili

Balwani kuswa kumatwa

¹ Mumwaaka wane wa bwaami bwakwe Jeoiyakimu mwanaakwe Josiya mwaami wa bene Juda, nkokwaamba ayi mumwaaka wakutaanguna wa bwaami bwakwe Nebukadinesa mucishi ca Babiloni, nebo neJelemiya ndakatambula maswi akumite pabene Juda boonse.

² Mpeeke nebo ndakaambila bene Juda abene Jelusalemu boonse ayi,

³ “Kwamyaaka makumi obilo amyaaka yotatwe, nkokwaamba ayi kuswa mumwaaka walikumi ayotatwe wa bwaami bwakwe Josiya mwanaakwe Amoni mwaami wa bene Juda kushikila sunu, ndalinga kutambula maswi a Mwaami Lesa alimwi ndalinga kumulwiita cakushomeka ciindi coonse maswi ayo, sombi mwebo temwalinga kukutikaawo, napaceyi.

⁴ “Nakubi kwaamba ayi Mwaami Lesa wakatuma basebenshi bakwe balaluki mankanda aanji aanji kuli ndimwe, mwebo tamukwe kunyumfwila nabi kubikako maano.

⁵ Balaluki abo bakalinga kumwaambila ayi, ‘Noonse amuswe kunshila shanu shibiibi amicito yanu ibiibi, ingaawo mukanookala mucishi ico Mwaami Lesa ncaakamupa mwebo abamashali banu bakulukulu ayi ncanu kwalyoonse alyoonse.

⁶ Mutakonkeli balesa bamwi mukubasebensela akubalambila. Mutasonkomoni bukali bwakwe kwiinda mukulambila shibumbwabumbwa nshemwakabumba amaansaanu. Lyalo Mwaami Lesa teshi akamupe mulandu.’

⁷ “Sombi Mwaami Lesa waamba ayi, ‘Mwebo tamukwe kunyumfwilaawo nebo. Mwakasonkomona bukali bwangu kwiinda mukulambila shibumbwabumbwa nshemwakabumba amaansaanu.’

⁸ “Paceebo ceeco Mwaami Lesa Shinkusu shoonse waamba ayi, ‘Ceebo tamukwe kunyumfwa maswi angu,

⁹ ndaakwiita bantu ba kumatwa amusebenshi wangu Nebukadinesa mwaami wa bene Babiloni. Ndaakubalengesha kulwana cishi ca Juda abantu boonse bekalaamo pantu pomwi amishobo yoonse ibashingulukite. Ndaakubanyonyoola cakumaninina akubalengesha kuba cintu ceelete kuloondwa, kushibulukwa alimwi akunyonyooka kwamuyayaya. Nebo neMwaami Lesa ndaamba.

¹⁰ Ndaakumanisha ciyobeyobe cakusangalala akukondwa kwabo aciyobeyobe cakusangalalila bwiinga, kulila kwa mpelo alimwi amumuni wa malampi.

¹¹ Cishi cino coonse cilaakuba matongo. Lyalo mishobo iyi ilaakunoosebensela mwaami wa bene Babiloni kwamyaaka makumi osanwe amakumi obilo.

¹² “ ‘Ono myaaka makumi osanwe aobilo yaakwiinda, ndaakupa mulandu mwaami wa bene Babiloni acishi ca Babiloni coonse ceebo ca kubisha kwabo. Ndaakunyonyoola cishi ico ayi cikabe matongo amuyayaya.

¹³ Ndaakuleta mapensho ayo oonse mucishi ico ngondakaambaawo, ee, oonse ayo alembetwe mulibuku ili akalalukwa aJelemiya pamishobo yoonse.

¹⁴ Balo beene balaakucatwa busha kumishobo iinji akubamaami banene. Ndaakubalambula kweelana amicito yabo alimwi amilimo njebacita amaansaabo.’ ”

Koombolosha kwakwe Lesa pamishobo ya bantu

¹⁵ Mwaami Lesa, Lesa wa bene Isilaeli wakandwiita ayi, “Bwesa nkomeshi iyi iyo iswite waini wa bukali bwangu akunwisha bantu ba mishobo yoonse iyo njendakakutumaako.

¹⁶ Baakumana kunwa, balaakutalantanta akucinkuka ceebo ca nkondo iyo njeshi nkatume pakati kabo.”

¹⁷ Aboobo ndakabwesa nkomeshi mumaansa a Mwaami Lesa akunwisha mishobo ya bantu yoonse iyo njaakantumaako.

¹⁸ Nkokwaamba ayi bantu ba muJelusalemu aba mumandabala a muJuda, bamaami ba mumo abacinenenene babo kwaamba ayi banyonyooke akuba cintu ceelete kuloondwa, kushibulukwa alimwi akushinganwa bweenka mbuli mbobabete sunu.

¹⁹ Ndakanwisha Falawo mwaami wa bene Ijipiti, bamatanjilili bakwe, bacinenenene bakwe abantu bakwe bamwi boonse

²⁰ pantu pomwi abaswamashi boonse bali kooko, bamaami boonse ba bene Usi, bamaami boonse ba bene Filisiti nkokwaamba ayi ba kuAshikeloni, Gasa, Ekiloni abantu bakacaala kuAshidodi,

²¹ bene Edomu, bene Moabu, bene Amoni,

²² bamaami boonse ba kuTaya akuSidoni, bamaami ba kumandabala ali kwitala lya Lweenge lwa Mediteleniyani.

²³ Ndakanwisha aba kuDedani, Tema, Busi aboonse abo bali mushishi sha kulaamfu,

²⁴ bamaami boonse ba kuAlebya aba baswamashi abo bekala muluyanga,

²⁵ bamaami boonse ba kuSimili, Elamu aMediya,

²⁶ bamaami boonse ba kumatwa abo bali pafwaafwi akulaamfu, womwi womwi, nkokwaamba ayi bwaami boonse bwa mucishi ca panshi. Pesule lya kunwa boonse alakwe mwaami wa kuBabiloni ulaakunwa.

²⁷ “Kuswawaawo ukabaambile ayi nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Amunwe, mukolwe, mulilukaanine akuwita limwi cakutabukawo ceebo ndaakutuma nkondo pakati kanu.’

²⁸ Ono na bakakake kutambula nkomeshi kumaansaako ayi banweemo, ukabalwiite ayi nebo neMwaami Lesa Shinkusu shoonse ndaamba ayi, ‘Mulyeelete kunwa!

²⁹ Amubone ntooyanda kutalika kuleta mapensho pandabala iyo iitwa liina lyangu. Sa ncakwiila mutooyeeya ayi nkamulekebo kutamupa mulandu? Sobwe, teshi nkamulangebo kwakutamupa mulandu ceebo ndaakuleta nkondo pali boonse abo bekala mucishi ca panshi. Nebo neMwaami Lesa Shinkusu shoonse ndaamba.’

³⁰ “Ono webo Jelemiya ubasansulwite makani aya woonse akwaamba ayi, ‘Mwaami Lesa ulaakululuma kwiculu, Ulaakukalooka kumusena wakwe usalalite. Ulaakubulumina bantu bakwe. Ulaakoolobesha cankusu anga mbantu abo batyana minyansa, ee, koolobeshesha boonse bekala mucishi ca panshi.

³¹ Ciyobeyobe ico cilaakunyumfwika akweela cishi ceebo Mwaami Lesa ulaakupa mulandu mishobo ya bantu. Ulaakoombolosha mishobo ya bantu yoonse akucaisha bamucita shibi munkondo. Mwaami Lesa waamba.’ ”

³² Mwaami Lesa Shinkusu shoonse waamba ayi, “Amulange! Mapensho atooya cimwaikabo kuswa kumushobo amushobo. Cipuupu cinene caswita kweela cishi ca panshi.”

³³ Ciindi ico abo boonse beshi bakacaikwe kuMwaami Lesa balaakunoolibo luundu loonse. Nkokwaamba ayi kuswa kweela cishi kuya mukushika ankoceela. Teshi bakabunjikweewo nabi kufukilwa. Sombi balaakubabo anga ngamatombe apantantaala peculu lya nshi.

³⁴ Amulile mibila akulila buumpute, mwebo nobeembeshi. Amwaalabangane mulusuko, mwebo nobamatanjilili ba litanga ceebo ciindi canu cakucaikwa cashikila. Mulaakuwa akupwayoolwa anga ninongo ibotu.

³⁵ Beembeshi balaakubula kwakulobokela, bamatanjilili teshi bakabonewo kwakucicila.

³⁶ Amunyumfwe kulila kwa beembeshi, amunyumfwe mibila ya bamatanjilili ba litanga mukwiinga Mwaami Lesa wanyonyoola mafulo abo.

³⁷ Cishi canu ca luumuno cilaakunyonyoolwa ceebo ca bukali buyoosha bwa Mwaami Lesa.

³⁸ Mwaami Lesa ulaakushiyabo bantu bakwe bweenka nkalamu mboishiya cimfwengo ca njiyo. Cishi cabo cilaakuba matongo ceebo cakulwanikwa abaabo beshi kubalyatilila alimwi abukali buyoosha bwa Mwaami Lesa.