Jelemiya 24 - Baibo Busansulushi Bwa Libuku Ili

Mitaanga ya nkuyu yobilo

¹ Ono Jeoiyakini mwanaakwe Jeoiyakimu mwaami wa bene Juda, bacinenenene, beshikubesa shintu abacibwene shakupangapanga bakatolwa busha kuswa kuJelusalemu kuya kuBabiloni. Bakatolwa aNebukadinesa mwaami wa bene Babiloni. Pesule Mwaami Lesa wakantondesha mitaanga yobilo ya nkuyu keebikitwe kunembo lya Ŋanda yakwe.

² Umwi mutaanga wakalinga kucite nkuyu shibotu abuumbi, bweenka mbuli sheshilya shitaanguna kupya. Umwi wakalinga kucite shibiibi cakwaamba ayi inga tashilikwiiwo akulikwa.

³ Mpomunyaawo Mwaami Lesa wakanjipusha ayi, “Jelemiya, nshiinshi nshewabona?” Anebo ndakakumbula ayi, “Ndabona nkuyu shibotu abuumbi alimwi ashibiibi ciine cakwaamba ayi tashikoonshi kulikwa.”

⁴ Lyalo Mwaami Lesa wakandwiita ayi,

⁵ “Nebo neMwaami Lesa, Lesa wa bene Isilaeli ndayeeya ayi bantu bakatolwa mubusha kuBabiloni kuswa kuJuda bali anga ninkuyu ishi shibotu.

⁶ Ndaakubalama kwaamba ayi shintu shibeendele kabotu akubaboosha kucishi cino. Ndaakubayaka, teshi nkabamwaaye, ndaakubashanga, teshi nkabatumune, sobwe.

⁷ Kuswawaawo ndaakubapa moyo wakunshiba ayi ndi Mwaami Lesa. Balaakuba bantu bangu, anebo ndaakuba Lesa wabo, ceebo balaakupilukila kuli ndime amyoyo yabo yoonse.

⁸ “Sombi Sedekiya mwaami wa bene Juda, bacinenenene bakwe abaabo beshi bakacaaleewo muJelusalemu, bashiite mucishi cino nabi beshi bakaye kuIjipiti, nebo neMwaami Lesa ndaakubacita anga ninkuyu shibiibi cakutalikwa.

⁹ Ndaakubalengesha kuba bantu bapatitwe, batongoolwa kubamaami boonse ba mucishi. Balaakunoosekwa, kusebaanishikwa, kucobolwa akushinganwa kuli koonse uko nkweshi nkabatandile.

¹⁰ Ndaakubatumina nkondo, nsala amwaalu kushikila bakanyonyooke mucishi ico ncendakapa mbabo abamashali babo bakulukulu.”