Jelemiya 23 - Baibo Busansulushi Bwa Libuku Ili

Kulangila sha kunembo

¹ Mwaami Lesa waamba ayi, “Mapensho kubeembeshi abo batoonyonyoola akupalanganya mbelele sha mumafulo angu!”

² Paceebo ceeco Mwaami Lesa, Lesa wa bene Isilaeli utookwaambila beembeshi abo beembela bantu bakwe ayi, “Ceebo mwakapalanganya litanga lyangu akulitanda, tamukwe kulilama, ndaakumupa mulandu ceebo ca bubi ubo mbomwakacita.

³ Nebo nemwiine ndaakuyobolola litanga ilyo lyakacaalawo kuswa mushishi shoonse nshendakashipalanganishishaamo akushiboosha kumafulo a nshisho uko nkweshi shikashalane akufula.

⁴ Kuswawaawo ndaakubikawo beembeshi pakati ka nshisho abo beshi bakanooshilama cakwaamba ayi teshi shikaloondewo tubili nabi kuba aboowa alimwi taaku nabi yomwi yeshi ikasowekeewo. Nebo neMwaami Lesa ndaamba.”

⁵ Mwaami Lesa waamba ayi, “Ciindi cilaakushika ndyeshi nkasale wamulunyungu lwakwe Defedi ululeme kuba mwaami. Mwaami uyo ulaakulela cabusongo akucita shintu shiluleme akoombolosha cakutanyengelela mucishi.

⁶ Munshiku sha bweendeleshi bwakwe, bene Juda balaakupuluka abene Isilaeli balaakunookala kwakubula cakulisukama. Lyalo ulaakunokwiitwa liina lyakwaamba ayi, ‘Mwaami Lesa nkoKululama kwesu.’ ”

⁷ Mwaami Lesa utokwaamba ayi, “Ciindi cilaakushikila bantu ndyeshi bakacileeke kulumbila ayi, ‘Bweenka mbocibete lushinisho ayi Mwaami Lesa, uyo wakakusha bene Isilaeli muIjipiti ngumuumi.’

⁸ Sombi balaakunoolumbila ayi, ‘Bweenka mbocibete lushinisho ayi Mwaami Lesa, uyo wakakusha bene Isilaeli kuswa kucishi ca kumatwa amushishi shimwi shoonse nshaakabatandilaamo.’ Lyalo balaakwikala mucishi cabo beene.”

Maswi akwe Jelemiya pabalaluki

⁹ Pabalaluki, nebo neJelemiya ndaamba ayi, “Moyo wangu woongumana abuumbi, amumafuwa angu moonse mutootutuma. Ceebobo ca Mwaami Lesa alimwi amaswi akwe asalalite, ndababo anga ngumuntu ukoletwe, ncakwiila anga ngumuntu wanwa bunene waini.

¹⁰ Cishi ciliswitebo bantu bafuule. Ono ceebo ca mashingo a Mwaami Lesa, cishi cayuma alimwi amafulo ali muluyanga amana kuyuma. Balaluki batookonkela nshila shibiibi akusebensesha nkusu shabo cakutalulama.”

¹¹ Mwaami Lesa waamba ayi, “Balaluki alimwi abapailishi tabakonkeli nebo neLesa. Ncakwiila nabibo muŊanda yangu ndabacanikisha kabacita bubi.

¹² Paceebo ceeco nshila shabo shilaakuba abuteshi. Ndaakubatandila mumunshinshe umo mweshi bakawiite. Ndaakubaletela mapensho mumwaaka uyo ngweshi bakapetweemo mulandu. Nebo neMwaami Lesa ndaamba.”

¹³ “Pakati ka balaluki ba kuSamaliya ndakabonawo cintu cimwi cilensha bunya. Bakalinga kulalukila muliina lyakwe Baali akulengesha bantu bangu bene Isilaeli kusoweka.

¹⁴ Pakati ka balaluki bene Jelusalemu apalo ndakabonaawo kubisha kwiinditewo, Balacita bulale alimwi mbabeshi. Balayuminisha bamucita shibi, cakwaamba ayi taaku nabi womwi ucileka kucita bubi. Boonse mbabiibibo anga mbene Sodoma kuli ndime. Ndushinisho bene Jelusalemu balibo anga mbene Gomola.”

¹⁵ Paceebo ceeco, pabalaluki Mwaami Lesa Shinkusu shoonse waamba ayi, “Ndaakubalengesha kulya shakulya shilula akunwa maanshi acite shikola ceebo kuswa kubalaluki bene Jelusalemu, kutalemeka Lesa kwayambukila bantu mucishi coonse.”

¹⁶ Mwaami Lesa Shinkusu shoonse waambila bene Jelusalemu ayi, “Mutanookutika sheesho shimulalukila balaluki mukwiinga balamulengesha kuba akulangila kwa bubeshi. Balaambabo sha mumitwi yabo beene kuteshi shiswa mumulomo wangu neMwaami Lesa.

¹⁷ Balaambila bantu banyansha ayi, ‘Mwaami Lesa waamba ayi mulaakunooshiite muluumuno.’ Balaambila baabo bakonkela bushicimpamya bwa myoyo yabo ayi, ‘Taaku cibiibi ceshi cikamubonekeleewo.’

¹⁸ “Sombi ngani pakati ka balaluki wakeemikanawo kale munkuta yangu neMwaami Lesa ayi akutike nabi kunyumfwisha liswi lyangu? Ngani wakanyumfwilawo kale akukonkela liswi ilyo?

¹⁹ Amubone, bukali bwangu bulibo anga ncipuupu ciyoosha, ee, bulibo anga nkapupuulwa ako katooshingulukabo pamitwi ya bamucita shibi.

²⁰ Bukali bwangu teshi bukamaneewo kushikila bukacite shoonse nsheensuni. Munshiku shitoosa, bantu bangu balaakunyumfwisha cikani ici.

²¹ Nebo nshikwe kutumaawo balaluki aba, nakubi boobo bakalitumabo beene beenka. Nshikwe kubandikaabo, nakubi boobo balo bakalaluka.

²² Nibakeemikanaawo munkuta yangu, naakwiinga bakaambilisha maswi angu kubantu bangu. Munshila iyi naakwiinga bakabasandula kuswa kunshila shabo shibiibi alimwi akumicito yabo ibiibi.”

²³ Mwaami Lesa waamba ayi, “Sa nebo ndi Lesa ucanikabo pomwi? Sa nshibete Lesa ucanika koonse koonse?

²⁴ Sa kuli muntu weenga wayuba cakwaamba ayi nebo ndabula kumubona? Sa tamwishi kwaamba ayi nebo ndibo poonse poonse, kwiculu amucishi ca panshi. Nebo neMwaami Lesa ndaamba.

²⁵ “Ndanyumfwa balaluki nshebaamba abo balaluka shabubeshi muliina lyangu. Balaamba ayi, ‘Ndaloota! Ndaloota!’

²⁶ Anu camushobo uyu citootola ciindi cilaamfu buyani mumyoyo ya balaluki babeshi abo beshi kulalukabo shakulibumbila?

²⁷ Balo balayeeya ayi maloto abo ngobalwiitana alaakulengesha bantu bangu kuluba liina lyangu bweenka bamashali babo bakulukulu mbobakandubaako ceebo cakulambila Baali.

²⁸ Mulaluki uyo ucite ciloto, aacipandulule, sombi uyo ucite maswi angu, aambe maswi ayo cakushomeka. Sa shibuba inga sheelana amancebele?

²⁹ Maswi angu ali anga ngumulilo nabi ninsando yakupwaishako mabwe. Nebo neMwaami Lesa ndaamba.”

³⁰ Mwaami Lesa waamba ayi, “Ndipatite balaluki balya beepa makani ababyaabo akwaamba ayi aswa kuli ndime neMwaami Lesa.

³¹ Ee, ndipatite abalaluki baamba sha mumitwi yabo beene akwaamba ayi shaswa kuli ndime neMwaami Lesa.

³² Ndushinisho ndibapatite balaluka shabubeshi. Balalwiita bantu bangu shiloto isho akubasowa kububeshi bwabo butacite ncito. Sombi nshikwe kubatuma, sobwe. Nebo neMwaami Lesa ndaamba.”

Mukuli wa Mwaami Lesa

³³ Mpomunyaawo Mwaami Lesa wakaambila ndime neJelemiya ayi, “Na bantu aba, balaluki nabi bapailishi bakwiipushe ayi, ‘Ino ngumukulinshi ngoocite wa Mwaami Lesa?’ Ukabaambile ayi, ‘Mwebo nweenka ndimwe mukuli wakwe. Sombi Mwaami Lesa waamba ayi ulaakumusowa.’

³⁴ Na mulaluki, mupailishi nabi muntu umwi uli woonse akaambe maswi akwaamba ayi, ‘Mukuli wa Mwaami Lesa,’ ndaakupa mulandu muntu uyo abamuŋanda yakwe.

³⁵ Sombi womwi awomwi ulyeelete kwiipusha mubye nabi mukwabo ayi, ‘Ino Mwaami Lesa wakakumbula ayinshi?’ nabi ayi, ‘Ino Mwaami Lesa waamba ayinshi?’

³⁶ Nkokwaamba ayi tamweelete kwaamba maswi akwaamba ayi, ‘Mukuli wa Mwaami Lesa’ ceebo na umwi wacita boobo, ndaakulengesha maswi angu kuba mukuli kuli nguwe. Bantu bakasandula maswi angu neLesa wabo, neLesa muumi, neMwaami Lesa Shinkusu shoonse.

³⁷ Webo Jelemiya ulyeelete kwiipusha mulaluki ayi, ‘Ino Mwaami Lesa wakakukumbula ayinshi?’ nabi ayi, ‘Mwaami Lesa wakaamba ayinshi?’

³⁸ Na bakakake kukonkela mulawo wangu mukwaamba maswi akwaamba ayi, ‘Ngumukuli wa Mwaami Lesa,’ lyalo ukabalwiite ayi

³⁹ ncakwiila ndaakubanyamuna akubawaala kulaale andime. Nkokwaamba ayi balo andabala iyo njendakapa bamashali babo bakulukulu.

⁴⁰ Lyalo ndaakubalensha nsoni akubalengesha kusebaana kwalyoonse alyoonse.”