Jelemiya 22 - Baibo Busansulushi Bwa Libuku Ili

Maswi akwe Jelemiya kubene Juda bamulunyungu lwakwe Defedi

¹ Mpomunyaawo Mwaami Lesa wakaŋambila ayi, “Koya kuŋanda ya bwaami ya mwaami wa bene Juda ukaambilishe ayi,

² ‘Nyumfwa maswi a Mwaami Lesa webo omwaami wa bene Juda. Ee, webo nooshiite pacuuna ca bwaami bwakwe Defedi. Ncakwiila ukutike webo omwiine, bacinenenene bako abantu bako abo banjilila paminjililo iyi.

³ Ono bulya ndakwaambila ayi unoocita shintu shakutanyengelela akucita shiluleme. Kofuna muntu uyo utookwiipilwa kuswa mumaansa a wooyo utoomupensha. Mutaciti shibiibi akuba alunkutwe kumuswamashi, mwanaanshiwa amukalubinje. Utatiili bulowa bwa bantu batacite mulandu mucishi cino.

⁴ Na munoobika maano kukukonkela milawo iyi, bamaami bamulunyungu lwakwe Defedi balaakwinjila paminjililo ya ndabala ino kabatantite shikoci amaaki alimwi kabashindikilwa abacinenenene babo pantu pomwi abantu babo.

⁵ Sombi mutanookonkela milawo iyi nebo neMwaami Lesa ndalumbila ayi ŋanda ya bwaami iyi ilaakunyonyoolwa. Nebo neMwaami Lesa ndaamba.’

⁶ “Kuli ndime ŋanda ya bwaami ya muJuda njibotubo anga ngumusena wa Gilyadi. Ee, njibotubo anga ntulundu twa kuLebanoni, Nakubi boobo ndaakwiilengesha kuba anga nduyanga, ncakwiila anga ngamandabala umo mutekaali bantu.

⁷ Ndaakutuma beshi bakeenyonyoole. Womwi awomwi ulaakunoocite ashilwanisho shakwe. Balaakutema macinko ako a sida akwaasowela mumulilo.

⁸ “Lyalo bantu ba mumishobo imwi beshibakanokwiindaamo balaakunokwiipushanya ayi, ‘Ceebonshi Mwaami Lesa wakacita cintu ca mushobo uyu kundabala inene iyi?’

⁹ Kukumbula kulaakuba kwakwaamba ayi, ‘Nceebo cakusuula cipangano ca Mwaami Lesa, Lesa wabo akutalika kulambila balesa bamwi akunoobasebensela.’ ”

Maswi akwe Jelemiya pali Jeoyasi

¹⁰ Mutanoolila mwaami Josiya wakafwa kale. Kuteelesha kulila ayi wakanyonyooka. Sombi amulilile Jeoyasi uyo wakatolwa mucishi ca busha ceebo lakwe teshi akaboolelewo kumishaabo nabi kubona tubili cishi cine mishaabo.

¹¹ Mwaami Lesa waamba pali Jeoyasi mwanaakwe Josiya uyo wakapyana bwaami bwa baishi muJuda ayi, “Kuno teshi akabooleleko tubili.

¹² Ulaakufwita kooko nkobakamutola mubusha. Cishi cino teshi akacibone tubili, sobwe.”

Makani akwe Jelemiya pali Jeoiyakimu

¹³ Mapensho kuli wooyo uyaka ŋanda yakwe ya bwaami kwiinda mukutalulama. Mapensho kuli wooyo uyaka shipinda sha peculu kwiinda mukoombolosha cakunyengelela ee, kuli wooyo usebenseshabo bantunyina kwakubula kubafolesha.

¹⁴ Mapensho kuli wooyo waamba ayi, “Ndaakuliyakila ŋanda ya bwaami inene abuumbi, ŋanda icite shipinda sha peculu shinene shinene. Munshila iyo ulabikaamo mbwelyo shinene shinene, wayala tupulanga twa sida kulubumbu akwiibotesha ashisalala.

¹⁵ “Sa shisamu sha sida shiinji nsheenga shakulengesha kuba mwaami? Bona, iso wakalinga kutileelabo shakulya ashakunwa? Lakwe wakalinga kucita shintu shiluleme alimwi shakutanyengelela. Aboobo shintu shoonse shakalinga kumweendela kabotu.

¹⁶ Lakwe wakalinga kwiimikanina bapenshi abakandu mumilandu. Aboobo shintu shoonse shakalinga kumweendela kabotu. Sa te kucita boobo mbocaamba kwishiba ndime? Nebo neMwaami Lesa ndaamba.

¹⁷ Sombi mwebo meenso anu amyoyo yanu ilibo kumpindu yakucana kwiinda mubwiipi, kutila bulowa bwa bantu batacite mulandu, alimwi amukulyatilila akupensha bantu.”

¹⁸ Paceebo ceeco pali Jeoiyakimu mwanaakwe Josiya mwaami wa bene Juda, Mwaami Lesa waamba ayi, “Teshi akalilweewo ayi, ‘Maawe nandumi yangu! Maawe mukwesu!’ Teshi akalilweewo ayi, ‘Maawe mwaami wangu! Maawe bulemu bwakwe!’

¹⁹ Ulaakufukilwabo anga nimbongolo, nkokwaamba ayi ulaakukwelwa akusowelwa pansengwe lya minjililo ya Jelusalemu.”

Makani akwe Jelemiya pamapensho a ndabala ya Jelusalemu

²⁰ Ono nobene Jelusalemu kamuya kuLebanoni mukaliile. Ee, maswi anu aye anyumfwike kuBashani, mulilile kuAbalimu ceebo mbomwalinga kucafwanaabo bakomwa cakumaninina.

²¹ Ndakamucenjesha ndyemwatakalinga kucite cakulisukama, sombi mwebo mwakaamba ayi, “Swebo twakaaka.” Ubo mbobuumi bwanu kuswabo kale kale, ncakwiila tamunyumfwiliiwo napaceyi.

²² Bamatanjilili banu boonse balaakuululushikwa amuuwo. Abo mbomucafwanaabo munkondo balaakutolwa busha. Lyalo mulaakusebaana akulenshekwa nsoni ceebo ca bubi bwanu boonse mbomwakacita.

²³ Mwebo nomushiite muŋanda ya bwaami, nomwikala muŋanda iyakitwe ashisamu sha sida shakaswa kuLebanoni, mulaakutongela mapensho aakumupolela, acisa anga nkunyonwa kwa mwanakashi uyo uli pankata!

Mwaami Lesa mbwaakoombolosha Jeoiyakini

²⁴ Mwaami Lesa waamba ayi, “Bweenka mbocibete lushinisho ayi ndi muumi, webo Jeoiyakini omwanaakwe Jeoiyakimu mwaami wa bene Juda, nabi kooli ninga ya keshibilo kulyaansa lyangu lyalulyo, naakwiinga ndakukushaako.

²⁵ Ndaakukwaaba mumaansa abaabo mbooloonda abo basuni kukucaya. Nkokwaamba ayi ndaakukwaaba kuli Nebukadinesa mwaami wa kuBabiloni alimwi abashilumamba bakwe.

²⁶ Webo abanyoko bakakushala ndaakumuwaala mucishi cimwi umo mwebo noonse momutakwe kushalilwa. Ncakwiila umo mweshi mukafwite noonse.

²⁷ Teshi mukaboolelewo tubili kucishi ico ncemutoolilila kuboolelaako.”

²⁸ Nebo ndaamba ayi, “Sa muntu uyu Jeoiyakini waba nongo ipwaikite ee, cintu bantu ncebatasuni? Sa nceceeco lakwe abana bakwe nceshi bakawaalilwe mucishi ico ncebateshi?”

²⁹ Ocishi, ocishi, ocishi, nyumfwa maswi a Mwaami Lesa!

³⁰ Mwaami Lesa waamba ayi, “Lemba muntu uyu anga ngumuntu utacitewo mwaana, ee, anga ngumuntu uyo eshi akabule kuswitilila mubuumi bwakwe ceebo taaku wamulunyungu lwakwe weshi akaswitilile. Taaku nabi womwi pakati kabo weshi akekale pacuuna ca bwaami bwakwe Defedi nabi kulela tubili mucishi ca Juda.”