Jelemiya 21 - Baibo Busansulushi Bwa Libuku Ili

Kukomwa kwa ndabala ya Jelusalemu mbokwakaambilishikwa

¹ Sedekiya mwaami wa bene Juda wakatuma Pasha mwanaakwe Malukiya aSefaniya mupailishi mwanaakwe Maseiya kuli ndime mukusenga ayi,

² “Twaambilileko kuMwaami Lesa ceebo Nebukadinesa mwaami wa kuBabiloni utootulwana. Mpashi Mwaami Lesa inga watucitilawo shaankamiko mbuli mbwaakalinga kucita kale kale kwaamba ayi Nebukadinesa atuleeke.”

³ Sombi Jelemiya wakakumbula ayi, “Kamuya mwaambile Sedekiya ayi

⁴ Mwaami Lesa, Lesa wa bene Isilaeli waamba ayi, ‘Ndaakukoma likoto lyanu lya bashilumamba litoolwana mwaami wa kuBabiloni abashilumamba bakwe abo bamushingulukite pansengwe lya lubumbu. Ndaakubunganya shilwanisho shanu mukati ka ndabala ino.

⁵ Lyalo ndaakumulwana nebo nemwiine alyaansa litandabikitwe licite nkusu shiinji mubukali bwangu buyoosha amubukali bwangu bwa mishobo umwi bwiindaawo.

⁶ Ndaakucaya bekala mundabala iyi. Ncakwiila ndaakucaya bantu abanyama boonse kumwaalu uyoosha.

⁷ Kuswawaawo ndaakwaaba ndiwe Sedekiya omwaami wa bene Juda, bacinenenene bako abantu bamundabala ino abo beshi bakapuluke kumwaalu, nkondo alimwi ansala kuli Nebukadinesa mwaami wa kuBabiloni akubalwani banu basuni kumucaya. Nebukadinesa ulaakubacaya munkondo, teshi akabafwitewo luse nabi nkumbu.’ Nebo neMwaami Lesa ndaamba.”

⁸ Lyalo Mwaami Lesa wakaŋambila kulwiita bantu ayi, “Amubone, ntoomubikila kunembo lyanu nshila ya buumi anshila ya lufu.

⁹ Anu uyo woonse weshi akekale mundabala ino ulaakufwa kunkondo, nsala nabi mwaalu. Sombi uyo woonse weshi akaye mukulyaaba mumaansa a bene Babiloni abo batooshinguluka ndabala yanu inene, ulaakuba abuumi. Ulaakucatwa, sombi teshi akacaikwe.

¹⁰ Ndabala iyi ndiipingite kwiinyonyoola kuteshi kwiicitila shibotu. Ilaakupekwa mumaansa a mwaami wa kuBabiloni uyo weshi akeenyonyoole amulilo. Nebo neMwaami Lesa ndaamba.”

Bene Juda bamulunyungu lwakwe Defedi mbobakoomboloshekwa

¹¹ Mwaami Lesa wakandwiita kwaambila mukowa wa bwaami bwa bene Juda, ee, kulwiita bamulunyungu lwakwe Defedi ayi,

¹² “Amunyumfwe maswi angu neMwaami Lesa akwaamba ayi, ‘Amoomboloshe bweelete nshiku shoonse. Amufune bantu batokwiipilwa mumaansa a baabo batoobapensha. Na mubule kucita boobo, bukali bwangu bulaakunyaka anga ngumulilo ceebo ca shibiibi nshemwakacita. Bulaakunyaka anga ngumulilo uyo muntu ngwaatakoonshi kushimya.’ ”

¹³ Mwaami Lesa waamba ayi, “Ntoolwana amwebo nobene Jelusalemu, mwebo nomwikala petala lya cinyika ee, mwebo nomwikala peculu lya kalundu ka mabwe akwaamba ayi, ‘Anu ngani weenga watulwana? Anu ngani weenga wakonsha kwinjila mushiyubilo shesu?’

¹⁴ Ndaakumupa mulandu kweelana abweelete micito yanu. Ndaakukumika mulilo muŋanda yanu ya bwaami uyo weshi ukateente shintu shoonse nshimushingulukite. Nebo neMwaami Lesa ndaamba.”