Jelemiya 20 - Baibo Busansulushi Bwa Libuku Ili

Jelemiya mbwaakapikishanya apasha mupailishi

¹ Mpeeke Pasha mupailishi mwanaakwe Ima uyo wakalinga munene wa muŊanda ya Mwaami Lesa ndyaakanyumfwa nebo kaandaluka makani aya,

² wakangumisha kubantu akuŋanga mancetani. Lyalo wambika kuMwinjililo wakwe Benjameni waPeculu wa kuŊanda ya Mwaami Lesa.

³ Ono ndibwakaca Pasha ndyaakaŋangulula, ndakamwaambila ayi, “Teshi ndiwe Pasha, sombi ndiwe Mago Misabibu nkokwaamba ayi shiyoosha kumbasu shoonse.

⁴ Ndacita boobo ceebo Mwaami Lesa waamba ayi, ‘Ndaakukulengesha kuba cintu cilensha boowa kuli ndiwe omwiine akubabyo boonse. Babyo balaakucaikwa munkondo kubalwani mumeenso ako. Ndaakwaaba bene Juda boonse mumaansa a mwaami wa kuBabiloni uyo weshi akabatole kuBabiloni nabi kubacaya munkondo.

⁵ Lyalo buboni boonse bwa mundabala iyi ndaakubwaaba kubalwani babo. Nkokwaamba ayi shoonse shiliimo kubikaawo ashintu sha makwebo shoonse abuboni boonse bwa bamaami ba bene Juda. Balaakushisaala akushitola kuBabiloni.

⁶ Ono webo Pasha alimwi abamuŋanda yako mulaakutolwa busha kuBabiloni. Uko ulaakufwa akubikwa pantu pomwi ababyo abo mbowakalalukila bubeshi.’ ”

Jelemiya mbwaakatongookila Mwaami Lesa

⁷ NoBaami baLesa, mwakancenjeeka anebo ndakacenjeekwa. Mwakanyinda nkusu akunkoma. Ndishikusekwa ciindi coonse alimwi akucelebulwa kubantu boonse.

⁸ Ciindi coonse na ndaamba, ndoolobesha kwaambilisha makani a kupenshekwa alimwi akunyonyoolwa. Aboobo maswi a Mwaami Lesa anengesha kucobolwa akusekwa lilaya mukwipila.

⁹ Ono na ndaamba ayi, “Teshi nkaambewo tubili sha pali nguwe nabi kwaamba tubili muliina lyakwe,” maswi akwe alababo anga ngumulilo mumoyo wangu, ee, anga ngumulilo utoonyaka wacalilwa mumafuwa angu. Ndaalilwa kwaasunga mumoyo wangu ncakwiila inga nshicikonshiiwo, sobwe.

¹⁰ Nebo ndanyumfwa maswi aanji kaatepeta ayi, “Kuli mapensho ayoosha kumbasu shoonse! Aaluulwe! Ee, atumuluule!” Beensuma boonse batoolindilila ayi ndubye akwaamba ayi, “Mpashi inga weendwa kumaano, lyalo inga twamucata akumubooshesha cishole.”

¹¹ Sombi mwebo noBaami baLesa muli kulubasu lwangu anga ngushilumamba wa nkusu ucibwene kulwana. Aboobo bantu aba batoompensha balaakulisuntula, teshi bakankomeewo, sobwe. Balaakwaalilwa akulenshekwa nsoni cakwaamba ayi nsoni shabo teshi shikalubweewo.

¹² NoBaami baLesa beShinkusu shoonse, mwebo nomweelesha kululama kwa muntu akucenceenta mumoyo amumiyeeyo, aambone kamubooshesha cishole pali mbabo ceebo mulandu wangu ndoobika mumaansaanu.

¹³ Amwiimbile Mwaami Lesa! Amulumbaishe Mwaami Lesa! Lakwe ulafuna bakandu mumaansa a bamucita shibi.

¹⁴ Ono abushinganwe bushiku mbondakashalwa! Butabi acoolwe bushiku ubo bama mbobakanshala!

¹⁵ Aashinganwe musankwa wakatola nkombe kuli bata, ndushinisho muntu uyo wakabasangalasha mukubalwiita ayi, “Kwashalwa mwaana musankwa!”

¹⁶ Muntu uyo aabe bweenka mbuli mandabala ayo Mwaami Lesa ngaakanyonyoola cakutaanyumfwila nkumbu. Aanyumfwe mibila macuunsacuunsa akooloma kwa nkondo lisuba ndyeliba pakati ka mutwi.

¹⁷ Ee, acicitike boobo ceebo taakwe kuncayabo kaancili mumala muli bama. Ncakwiila lifumo lya bama naakwiinga lyakaba ncecuumbwe cangu.

¹⁸ Ino ndakashalilwanshi? Sa ndakashalilwa kubona mapensho abuumba akweesha nshiku sha buumi bwangu munsoni?