Jelemiya 19 - Baibo Busansulushi Bwa Libuku Ili

Nongo yakapwaikwa

¹ Mpomunyaawo Mwaami Lesa wakaŋambila ayi, “Koya ukoole nongo kumubumbi. Ukatolele bamaloba bamwi ba bantu alimwi abapailishi.

² Lyalo muye kuCinyika ca Inomu kufwaafwi aMwinjililo wa Shikaye. Uko ukaambilishe maswi ngweshi nkulwiite.

³ Ukaambe ayi, ‘Nobamaami ba bene Juda anobantu ba kuJelusalemu, amukutike maswi a Mwaami Lesa Shinkusu shoonse, Lesa wa bene Isilaeli. Amukutike! Ndaakuleta mapensho kumusena uno ayo eshi akalengeshe matwi a wooyo woonse weshi akaanyuumfwe kutilimuka.

⁴ Ndaakucita boobo mukwiinga bakansuula akulengesha musena uyu kuba wa balesa beensu. Bakatentelamo milambu kubalesa abo balo, bamashali babo bakulukulu nabi bamaami bene Juda mbobatakalinga kwishi. Musena uno bausushabo bulowa bwa bantu batacite milandu.

⁵ Bakayaka ashipaililo shakwe Baali shakutentelawo bana babo basankwa ayi njimilambu kuli nguwe. Cintu ico nceentakwe kubaambila nabi kuciyeeyaawo.

⁶ Aboobo amucenjele, nshiku shilaakushikila bantu ndyeshi bakacileeke kwiita musena uno ayi Tofeti nabi Cinyika ca Inomu, sombi balaakunoociita ayi Cinyika ca Kucailamo.

⁷ Mumusena uno ndaakunyonyoola miyeeyo ya bene Juda aya bene Jelusalemu. Ndaakulengesha balwani babo kubakoma akubacaya munkondo. Mituntu yabo ilaakuba shakulya sha bayuni abanyama bamuluundu.

⁸ Lyalo ndabala iyi ndakwiinyonweetabo limwi akwiilensha nsoni. Lyalo boonse abo beshi bakanokwiinda pafwaafwi balaakunookankamana akucobola ceebo ca mapensho oonse a njiyo.

⁹ Ndaakubalengesha kulya bana babo basankwa abanakashi akulyaana muciindi ca mapensho ayoosha balwani babo baakushinguluka ndabala yabo inene.’ ”

¹⁰ Kuswawaawo Mwaami Lesa wakaŋambila ayi, “Pwaya nongo iyo abo mbootooyaabo kababweneeko

¹¹ akubaambila ayi nebo neMwaami Lesa Shinkusu shoonse ndaamba ayi, ‘Ndaakupwayoola mushobo uyu andabala iyi bweenka bwapwayooka nongo iyi cakutakonsha kununganishikwa. Bafu balaakufukilwa kuTofeti kushikila kukabule amusena wakufukilaako.

¹² Anu ubo mbweshi nkacite kumusena uyu akubantu bekalaamo. Musena uno ndaakuucitabo bweenka mbondakacita musena wa Tofeti.

¹³ Lyalo maanda a muJelusalemu aayo a bamaami ba bene Juda alaakuba atasalalite bweenka mbuli musena uno wa Tofeti. Nkokwaamba ayi maanda oonse ayo acite shiluli shilya nshebakatentelelawo tununkila kabotu kunyenyeenshi akupa shipo sha shakunwa kubalesa bamwi.’ ”

¹⁴ Kuswawaawo nebo neJelemiya ndakaswaako kuTofeti uko Mwaami Lesa nkwakalinga wantuma kuya mukulaluka. Lyalo ndakeemikana mulubansa lwa Ŋanda ya Mwaami Lesa akwaambila bantu ayi,

¹⁵ “Mwaami Lesa, Shinkusu shoonse, Lesa wa bene Isilaeli waamba ayi, ‘Amunyumfwe! Ndaakuletela ndabala ino inene amandabala oonse ayo ashingulukite, mapensho ayo oonse ngondakashomesha kucita ceebo ca bushicimpamya bwabo aceebo cakukaka kunyumfwa kumaswi angu.’ ”