Jelemiya 18 - Baibo Busansulushi Bwa Libuku Ili

Jelemiya kuŋanda ya mubumbi

¹ Mwaami Lesa wakaŋambila ayi,

² “Koya kuŋanda ya mubumbi, uko nkweshi nkulwiitile makani angu.”

³ Aboobo ndakaya kuŋanda ya mubumbi akumucana kaabumba nongo pacakubumbishaako.

⁴ Sombi nongo iyo njaakalinga kubumba yakabica. Aboobo mubumbi uyo wakeebumba cipya kweelana ambwaakalinga kusuni ayi ibe.

⁵ Mpomunyaawo Mwaami Lesa wakaŋambila ayi,

⁶ “Mwebo nobene Isilaeli, sa inga nshimuciiti bweenka mbwaacita mubumbi uyu? Bweenka mbuli bulongo mumaansa a mubumbi amwebo mbomubete kuli ndime.

⁷ Na cimwi ciindi ndaambilisha ayi mushobo wa bantu nabi bwaami butumunwe, bupwayoolwe nabi ayi bunyonyoolwe,

⁸ sombi pesule mushobo uyo ngondakacenjesha wasanduka kuswa kushibiibi sha nguwo, teshi nkacite shintu shibiibi nshendakaamba kucita kuli nguwo.

⁹ Nakubi boobo na ndaambilisha ayi mushobo nabi bwaami bumwi buyakwe akwiimikwa,

¹⁰ sombi pesule bwalo bwatalika kunoocita shibiibi mumeenso angu akutanyumfwila, teshi nkacite shintu shibotu nshendakaamba kucita kuli mbubo.

¹¹ “Ono bulya lwiita bene Juda abantu abo bekala muJelusalemu ayi nebo neMwaami Lesa ntoobabambila mapensho akubayeeyela bwakubacita. Paceebo ceeco abaleke nshila shabo shibiibi. Womwi awomwi aasandule nshila shakwe alimwi amicito yakwe.

¹² Sombi balo balaakukumbula ayi, ‘Tacicite mulandu. Tutootolelela amiyeeyo yesu sobeene. Womwi awomwi unanookonkela bushicimpamya bwa moyo wakwe ubiibi.’ ”

Bantu mbobakakaka Mwaami Lesa

¹³ Paceebo ceeco Mwaami Lesa waamba ayi, “Amwiipusheepushe pakati ka mishobo imwi yoonse na kuli wakanyumfwaawo kale camushobo uyo? Bene Isilaeli bakacita cintu cibiibi abuumbi.

¹⁴ Sa tulundu twa myaandami twa kuLebanoni kuli ndyetubulawo caandwa? Sa maanshi atontola aswa kutulundu uto kuli ndyaacilekawo kukunka?

¹⁵ Nakubi boobo bantu bangu nebo banduba. Balatentela shibumbwabumbwa shitacite ncito tununkila kabotu. Shibumbwabumbwa isho shakabalengesha kulisuntula munshila shabo akuleka kweendela munshila shikulukulu. Shalo shakabalengesha kweendela mutushilambali amunshila shitana kweepwa.

¹⁶ Cishi cabo cilaakunyonyoolwa. Cilaakuba cintu ceshi cikanoosekwa kwalyoonse alyoonse. Boonse beshi bakanokwiindila nkuko, balaakunookankamana alimwi akunoopukumunabo mitwi.

¹⁷ Ndaakubapalanganishisha kunembo lya balwani babo bweenka mbuli muuwo wakwicwe. Lyalo ndaakubafutatila ncakwiila teshi nkabacafweewo baakupolelwa mapensho.”

Jelemiya mbwaakapingwa

¹⁸ Mpomunyaawo balo bakaamba ayi, “Kamwisa, tulifuuyefuye akubona mbweenga twacita Jelemiya. Bapailishi beshi banootwiisha milawo, basongo beshi bakanootupandako maano alimwi abalaluki beshi bakanootulwiitako maswi a Mwaami Lesa nkobali. Aboobo amwise, tumubekeshe milandu akutakutika sheesho nsheshi anokwaamba.”

¹⁹ Lyalo nebo neJelemiya ndakapaila ayi, “Nobaami baLesa amukutike nsheentokwaamba, munyumfwe shitokwaamba baabo batoombekesha!

²⁰ Sa cintu cibotu inga calambulwa ashibiibi? Nakubi boobo balo bankabila cilindi ayi ngwiteemo. Amuyeeye kwaamba ayi ndakeemikana kunembo lyanu akubaambililako ayi mukushe bukali bwanu pali mbabo.

²¹ Aboobo noBaami baLesa, amusuminishe bana babo kufwa kunsala. Amubaabe munkondo ayi bafwite mumo. Amulengeshe bamakaabo kubula baana alimwi akuba bamukalubinje. Amulengeshe bameebaabo kucaikwa kumalwashi akulengesha bacikula bwangu basankwa kucaikwa munkondo.

²² Mibila ainyumfwike mumaandaabo mwaakubatumina beshikubalwana cakuteengashila, mukwiinga balo bankabila cilindi ayi ngwiteemo. akuteya toose ayi bancatishe kumyeendo.

²³ Sombi mwebo noBaami baLesa mulishi mbobampingite kuncaya. Mutabalekeleli bubi bwabo, nabi kushiminganya shibiibi shabo pameenso anu. Abakakomwe kunembo lyanu alimwi mukabacitile shintu ishi kamukalalite.”