Jelemiya 17 - Baibo Busansulushi Bwa Libuku Ili

Shibiibi amulandu wakapekwa bene Juda

¹ Mwaami Lesa waamba ayi, “Nobene Juda shibiibi shanu shakalembelwa acakulembesha ca nshimbi. Shakatalwa alibwe likolete pamyoyo yanu alimwi akumakonko oonse a shipaililo shanu.

² Bana banu abalo balayeeyabo shipaililo shanu alimwi ashikoshanyo shakwe Ashela lesa mwanakashi shili kulubasu lwa shisamu shicite shimfule shibotu alimwi apeculu lya tulundu tulaamfu.

³ Buboni bwanu abubile bwanu boonse ndaakubuleka ayi bukasaalwe. Bulaakusaalwa pantu pomwi amisena yanu yakulambililaako ya patulundu ceebo ca shibiibi shanu shakacitwa mucishi canu coonse.

⁴ Kubisha kulaakumulengesha kunyaikwa cishi ico ncendakamupa. Ndaakumulengesha kuba basha kubalwani banu mucishi ico ncemuteshi ceebo cakwaamba ayi mwanyansha mulilo wa bukali bwangu alimwi ulaakunoonyakabo kwalyoonse alyoonse.”

Makani apusenepusene

⁵ Mwaami Lesa utokwaamba ayi, “Ulishingenwe uyo ucinka manungo mumuntunyina, ee, uyo ushoma mumuntubo ayi inga wamucafwa ncakwiila uyo ufutatila Mwaami Lesa.

⁶ Ulaakubabo anga ncikupu muluyanga. Lakwe teshi akaboneewo cibotu nabi comwi. Ulaakwikala muluyanga luyumu nta, kwikala mucishi ico cicite bulongo bwa mwiinyo umo mutekaali muntu nabi womwi.

⁷ “Sombi ulicite coolwe muntu uyo ucinka manungo muMwaami Lesa, ndushinisho uyo ushoma muli nguwe.

⁸ Lakwe ulaakubabo anga ncisamu cishangitwe kufwaafwi amaanshi, cisamu citola miyanda mukalonga. Taciyumiwo nabi cilimo. Matewu a ncico alatontola ciindi coonse. Mumwaaka wa cilanga calo tacipengiiwo alimwi calo cilacatabo lyoonse shisepo.

⁹ “Moyo wa muntu ngubeshi abuumbi kwiinda pashintu shimwi shoonse alimwi ulicite bulwashi butashilikiki. Anu ngani weenga wakonsha kuushiba?

¹⁰ Nebo neMwaami Lesa ndalanga mumoyo wa muntu akweelesha miyeeyo yakwe kwaamba ayi nambule muntu kweelana amicito yakwe, ee, abweelete milimo yakwe.”

¹¹ Muntu uyo ubilila munshila italuleme ulibo anga ngukwale ufukamina mayi ngaatana kushala. Buboni bulaakumumanina pakati ka nshiku sha buumi bwakwe. Lyalo kumamanino ulaakubonekabo bukaluyaluya.

¹² Ŋanda yakwe Lesa wesu ili anga ncuuna ca bulemu cakasumpulwa kuswa kumatalikilo.

¹³ Nobaami baLesa mwebo muli lulangilo lwa bene Isilaeli. Boonse abo bamusuula, balaakulenshekwa nsoni. Boonse abo balaakushiminganabo anga ngameena alembwa mubulongo ceebo bakamufutatila mwebo nokantupu ka buumi.

Jelemiya mbwaakasenga lucafwo kuMwaami Lesa

¹⁴ Nobaami baLesa, amunshilike, ingaawo nshilikwe cancinencine. Amumpulushe, ingaawo mpuluke cancinencine ceebo mwebo nweenkabo ndimwe numbaisha.

¹⁵ Lyoonse bantu balaŋambila ayi, “Ino cakaamba Mwaami Lesa cili kuli? Aciciite bulya tubone!”

¹⁶ Nshikwe kukaka mulimo wa bweembeshi ngomwakampa alimwi nshindakalinga kusuni ayi bakenjile mumapensho. Nceentokwaamba amwebo mulicishi kale.

¹⁷ NoBaami baLesa, mutanoondeshi mukwiinga muli ndimwe moonjuba muciindi ca mapensho.

¹⁸ Boonse bampensha, abalenshekwe nsoni. Sombi nebo amumfuune ayi ntalenshekwi nsoni. Balo abaloonde, sombi nebo amumfuune ayi ntaloondi. Amubanyonyoole, ee, kubanyonyweetabo limwi.

Shakulama bushiku bwakookesha bwa Cibelu

¹⁹ Mpomunyaawo Mwaami Lesa wakandwiita ayi, “Koya ukeemikane pamwinjililo wa bantu, uyo bamaami ba bene Juda mpobenjilila akuswita. Kuswawaawo uye wiimikane paminjililo imwi ya ndabala ya Jelusalemu.

²⁰ Lyalo ukabaambile ayi, ‘Amunyumfwe maswi a Mwaami Lesa, mwebo nobamaami ba bene Juda, bene Juda boonse alimwi abamwi boonse bekala muJelusalemu abo beenda paminjililo iyi.

²¹ Mwaami Lesa waamba ayi tamweelete kunyamuna mukuli pabushiku bwakookesha bwa Cibelu nabi kucinjisha paminjililo ya ndabala ya Jelusalemu.

²² Tamweelete kukusha mukuli mumaandaanu nabi kusebensa ncito ili yoonse pabushiku bwakookesha bwa Cibelu. Sombi bushiku ubo mulyeelete kubusalasha kweelana ambondakaambila bamashali banu bakulukulu.

²³ Nakubi boobo balo tabakwe kunyumfwila nabi kubikako maano. Bakalinga beshicimpamya alimwi tebakalinga kunyumfwila nabi kusumina kululikwa kuli ndime.

²⁴ Ono na mwebo munoobika maano kukunyumfwila ndime akutanjisha mikuli paminjililo ya ndabala ino pabushiku bwakookesha bwa Cibelu nkokwaamba ayi na munoobusalasha mukutasebensa mulimo uli woonse,

²⁵ bamaami bamulunyungu lwakwe Defedi balaakwinjila paminjililo ya ndabala ino pantu pomwi abacinenenene babo. Boonse balaakwisa kabatantite shikoci amaaki akushindikilwa kubene Juda abaabo bekala muJelusalemu. Kuswawaawo ndabala iyi ilaakunoocite bantu bekalaamo lyoonsebo.

²⁶ Mpeeke bantu balaakuswa mumandabala a kuJuda amishi ishingulukite Jelusalemu, mucishi cakwe Benjameni, tulundu tuniini twa kumbo akucishi ca tulundu ca Negefu. Balaakuleta milambu yakutenta, shipo sha fulaulo, tununkila kabotu alimwi amilambu yakulumba kuŊanda yangu neMwaami Lesa.

²⁷ Sombi na mukabule kunyumfwila akusalasha bushiku bwakookesha bwa Cibelu mukutanoonyamuna mikuli ili yoonse pakwiinda paminjililo ya ndabala ya Jelusalemu pabushiku ubo, ndaakunyansha mulilo utashimiki paminjililo ya ndabala iyo, uyo weshi ukateente shiyubilo sha njiyo.’ ”