Jelemiya 16 - Baibo Busansulushi Bwa Libuku Ili

Kuyanda kwa Mwaami Lesa pabuumi bwakwe Jelemiya

¹ Mpomunyaawo Mwaami Lesa wakaŋambila alimwi ayi,

² “Utakeebi akuba abaana basankwa nabi banakashi mumusena uno.

³ Ntookulwiita mbweshi cikacitike pabaana basankwa abanakashi abo bashalilwa mumusena uno apabamashali babo.

⁴ Balaakufwa kumalwashi ayoosha. Teshi bakalilweewo nabi kubikwa. Sombi mibili yabo ilaakubabo anga ngamatombe apantantaala peculu lya nshi. Balaakuloba kunkondo akunsala. Lyalo mituntu yabo ilaakuba cakulya ca bayuni abanyama bamuluundu.

⁵ “Kuteelesha kwinjila muŋanda umo mubete shakulya sha pamalilo. Tooelete kuyaamo mukulila nabi kuungumana ambabo ceebo ndacileka kupa coolwe bantu aba, kubatondesha lusuno nabi kubafwita nkumbu. Nebo neMwaami Lesa ndaamba.

⁶ Babile abakandu boonse balaakufwitabo pantu pomwi mucishi ici. Teshi bakabikwewo nabi kulilwa, alimwi taakuuwo nabi womwi weshi akalinengoole nabi kulikulula mumutwi ceebo ca malilo.

⁷ Teshi kukabeewo muntu shikupa shakulya bantu abo batoolila. Teshi kukabeewo shikuumusha nabi muntu wafwitwa baishi nabi banyina. Ncakwiila taaku weshi akabapewo shakunwa mukuboombulushaako.

⁸ “Kutenjila muŋanda umo muli kusekelela ayi ulye akunwaabo.

⁹ Nebo neMwaami Lesa Shinkusu shoonse, Lesa wa bene Isilaeli ndaamba ayi, ‘Ulaakulibonena ameenso ako. Koocili muumi ndaakumanisha ciyobeyobe cakusangalala akukondwa kwabo aciyobeyobe cakusangalalila bwiinga mumusena uyu.’

¹⁰ “Bantu aba waakubaambila maswi aya oonse, abalo baakukwiipusha ayi, ‘Ino ceebonshi Mwaami Lesa waamba ayi swebo tupolelwe mapensho a mushobo wooyu? Ino swebo twakabishanshi? Anu ncibiibinshi ncetwakacitila Mwaami Lesa, Lesa wesu?’

¹¹ Lyalo ukabakumbule ayi, ‘Nceebo ca bamashali banu bakulukulu bakansuula akukonkela balesa bamwi, bakabasebensela akubalambila. Bakamfutatila alimwi tabakwe kunyumfwila kwiisha kwangu.

¹² Sombi mwebo mwabiisha kwiinda bamashali banu bakulukulu. Tamubwene kwaamba ayi mwebo noonse womwi awomwi utookonkela bushicimpamya bwa moyo wakwe ubiibi mumusena wakunyumfwila ndime.

¹³ Aboobo ndaakumutandaanya mucishi ici akumutandila mucishi ico mwebo nabi bamashali banu bakulukulu ncebatakwe kwishiba. Uko nkweshi mukasebensele balesa bamwi malumwi amashiku ceebo teshi nkamufwitewo nkumbu.’ ”

Kupiluka kuswa mushishi sha busha

¹⁴ Lyalo Mwaami Lesa waamba ayi, “Nakubi boobo nshiku shilaakushikila bantu ndyeshi bakacileeke kulumbila ayi, ‘Bweenka mbocibete lushinisho ayi Mwaami Lesa, uyo wakakusha bene Isilaeli muIjipiti ngumuumi.’

¹⁵ Sombi balaakunoolumbila ayi, ‘Bweenka mbocibete lushinisho ayi Mwaami Lesa, uyo wakakusha bene Isilaeli kuswa kucishi cakumatwa amushishi shimwi shoonse nshaakabatandilaamo.’ Balaakunoocita boobo ceebo ndaakubapilusha mucishi ico ncendakapa bamashali babo bakulukulu. Nebo neMwaami Lesa ndaamba.”

Mapensho atoosa

¹⁶ Mwaami Lesa waamba ayi, “Sombi bulya ntootuma beshikucaya nswi baanji kuya mukubacata. Kuswawaawo ndaakutuma bapalu baanji abo beshi bakese mukubafwima mumalundu oonse, mutulundu toonse alimwi amushimfwengo shili mumyaandami.

¹⁷ Nshila shabo shoonse ndishibwene. Shilibo patuba kuli ndime alimwi taaku shibiibi shabo shiyubite pameenso angu.

¹⁸ Ndaakubalengesha kupekwa milandu yobilo ceebo ca shibiibi abubi bwabo. Balengesha cishi cangu kutanoosalalite ashibumbwabumbwa shabo shitayooyi anga njimituntu. Ncakwiila bacisusha balesa bakubeca.”

Jelemiya mbwaakapaila cakushoma muMwaami Lesa

¹⁹ Nobaami baLesa mwebo nomumpa nkusu alimwi nolilinga lyangu, mwebo ndimwe ciyubilo cangu muciindi ca mapensho. Kuli ndimwe mishobo yoonse ya bantu nkweshi ikese kuswa kweela cishi akwaamba ayi, “Bamashali besu bakulukulu taaku ncebakalinga kucite, sombibo balesa bakubeca. Ncakwiila bakalinga kucitebo shibumbwabumbwa shitaaku mboshibete shatakalinga kubacafwaawo.

²⁰ Sa bantu balakonsha kulipangila balesa babo? Ee, sombi teshi balesa bancinencine!”

²¹ Mpomunyaawo Mwaami Lesa wakaamba ayi, “Paceebo ceeco ntoobeeisha, ee, bulya ntooyanda kubeeisha nkusu abulemu bwangu. Ingaawo ndyeshi bakeshibe ayi Mwaami Lesa ndyeliina lyangu.”