Jelemiya 15 - Baibo Busansulushi Bwa Libuku Ili

Mapensho pabene Juda

¹ Mpeeke Mwaami Lesa wakaŋambila ayi, “Nabi Mose aSamwelo besa beemikana kunembo lyangu akunkombelela, inga nshibooshiimo moyo pabantu aba napaceyi. Amubatandaanye, baswe pameenso angu! Kabayabo!

² Ono na bakwiipushe ayi, ‘Ino tuye kuli?’ ubalwiite ayi, ‘Mwaami Lesa waamba ayi, abo beelete kufwa lufu ŋanda, balaakufwa. Abo beelete kufwa kunkondo, balaakufwa munkondo. Abo beelete kufwa kunsala, balaakufwa kunsala. Abo beelete kutolwa mubusha, balaakuya mubusha.’

³ “Nebo neMwaami Lesa ndaakubatumina shintu shiyoosha shone. Ndaakubatumina nkondo ayi bacaikwe, bakabwa ayi babakweelaanye, bayuni ayi batalike kubalya alimwi abanyama bamuluundu ayi balye sheshi shikacaaleeko.

⁴ Lyalo ndaakulengesha bamaami boonse ba pacishi ca panshi kubacimwa ceebo ca ceeco Manase mwanaakwe Esekiya mwaami wa bene Juda ncaakacita muJelusalemu.”

⁵ Mwaami Lesa waamba ayi, “Mwebo nobene Jelusalemu, anu ngani weshi akamufwite nkumbu? Anu ngani weshi akamulilileeko? Anu ngani weshi akeemikanewo ciindi cilaamfu cakwiipusha mbomutoobuka?

⁶ Mwebo mwakankaka, ncakwiila mulicitekobo kuboola pesule. Aboobo ndaakumucata akumunyonyoola. Teshi nkamufwitewo nkumbu tubili.

⁷ Ndaakumuululusha kucakuululushishako paminjililo ya mandabala oonse a mucishi. Ndaakumulengesha kufwitwa akunyonyooka mwebo nobantu bangu ceebo tamutoocilekaawo nshila shanu shibiibi.

⁸ Ndaakulengesha bamukalubinje banu kufula kwiinda museese wa muloombe lwa lweenge. Lisuba kalili pakati ka mutwi, ndaakucaya bacikula bwangu basankwa akulengesha bamanyinawabo kupenga. Cakuteengashila ndaakubaletela buumba aboowa.

⁹ Lyalo mushali mwanakashi wa baana bosanwe abobilo ulaakulefuka akufwa. Lakwe lisuba lilaakumupilila kaliciliiko. Ndushinisho ulaakunyumfwa nsoni akusebaana. Kuswawaawo, abo boonse beshi bakacaaleewo ndaakubacaisha kubalwani babo. Nebo neMwaami Lesa ndaamba.”

Jelemiya mbwaakatongookila Mwaami Lesa

¹⁰ Maawe mbondapengaako nebo! Anu bama bakanshalilanshi? Nebo ndishikwaambana akupikishikwabo abantu boonse bamucishi! Nshina kukweleteshawo kale nabi kukweletaawo kumuntu, nakubi boobo muntu womwi awomwi ulanshingana.

¹¹ Anu noBaami baLesa mashingo aacitike na nshikwe kumukombelelaawo ayi mubanyumfwile nkumbu. Ncakwiila aacitike na nshikwe kusengelaako balwani bangu kuli ndimwe muciindi ca mapensho amuciindi ca buumba.

¹² Sa kuliwo muntu ukonsha kutyola nshimbi? Sa kuliwo muntu ukonsha kutyola nshimbi isenkene abulonse iswa kumatwa?

¹³ Ono Mwaami waŋambila ayi, “Ndaakulengesha buboni abubile bwanu kusaalwa kubalwani babo ceebo ca shibiibi shabo nshebakacita mucishi coonse.

¹⁴ Ndaakumulengesha kuba basha kubalwani banu mucishi ico ncemuteshi ceebo bukali bwangu bulaakunyansha mulilo uyo weshi ukamuteente.”

¹⁵ Lyalo ndakaamba ayi, “NoBaami baLesa mwebo mulanyumfwishisha shintu. Kamunjibaluka akundama. Amumbooshesheeko cishole kubaabo bampensha. Mwebo tamukalali bwaangu, ono mutabaleeki ayi bancaaye. Amuyeeye mbooncobolwa ceebo ca ndimwe.

¹⁶ Ndindakanyumfwa maswi anu, ndakaatambula camoyo woonse. Akansangalasha akulengesha moyo wangu kukondwa ceebo ndi muntu wanu, mwebo Nobaami baLesa, baLesa beShinkusu shoonse.

¹⁷ Nebo nshindakalinga kulitiba mulikoto lya beshikusekelela nabi kunoolisangalasha pantu pomwi ambabo. Nebo ndakalinga kwikalabo neenka ceebo lyaansa lyanu lyakalinga pali ndime. Ncakwiila lyaansa lyanu lyakansusha bukali.

¹⁸ Ceebonshi shitoocisa tashitoomana? Ceebonshi cilonda cangu tacitooshilikika? Ceebonshi tashitokooshaawo? Sa mulisuni kunengesha kutyongola anga nkalonga kayuma cilimo?”

¹⁹ Paceebo ceeco Mwaami Lesa wakaamba ayi, “Na upilukile kuli ndime, ndaakukutambula ayi ube musebenshi wangu alimwi. Na ucileeke kwaamba shitaaku mboshibete akutalika kwaamba sheelete, ulaakuba mulaluki wangu alimwi. Bantu aba balyeelete kupilukila kuli ndiwe, sombi webo tooelete kupilukila kuli mbabo.

²⁰ Ndaakukulengesha kuba lubumbu kubantu aba, ee, lilinga lya bulonse kuli mbabo. Balaakukulwana, sombi teshi bakakukomeewo ceebo ndi awebo kwaamba ayi nookufuna akukupulusha.

²¹ Ndaakukufuna kuswa munkusu sha bamucita shibi akukulubula kuswa mumaansa a beshilunkutwe. Nebo neMwaami Lesa ndaamba.”