Jelemiya 14 - Baibo Busansulushi Bwa Libuku Ili

Cilanga ciyoosha

¹ Mwaami Lesa wakaŋambila pacilanga ayi,

² “Cishi ca Juda citoolila mandabala a mumo afwa. Bantu bekalaamo boona panshi kunsoni ayalo ndabala ya Jelusalemu itoolila lucafwo.

³ Bacinenenene balatumaako basebenshi babo mukuteka maanshi, sombi mumikalo tabacaniimo maanshi, sobwe. Balaboolamobo anongo shabo shitacite maanshi. Lyalo balalifweka pameenso ceebo ca nsoni akutyongola.

⁴ Bulongo bwamana kupasooka myaansha ceebo cakubula mfula mucishi. Balimi baciswa mumyoyo akulitintilila kumitwi.

⁵ Alakwe nakasha muluundu washiya kaana kaswa mukushalikwa ceebo cakubula bwiisu.

⁶ Mbongolo sha muluundu ashalo shiliimfwi peculu lya tulundu tutacite bwiisu akunoofoomashikabo anga mbaumpe. Caala akulasha kabotu ceebo cakubula shakulya.

⁷ “Bantu bangu batoondilila ayi ‘NoBaami baLesa, nabi shibiibi shesu shitootushinina, amutucafweeko ceebo ca liina lyanu. Twakamufutatila mankanda aanji, ncakwiila twakamubishisha abuumbi.

⁸ Mwebo Nokulangila kwa bene Isilaeli, noBapulushi babo muciindi ca mapensho, ceebonshi mwaba anga ngumweensu mucishi cino, ncakwiila anga ngushikweenda uyo woonabo bushiku bomwi?

⁹ Mwabetanshi anga ngumuntu wapolomokelwabo cintu, nabi anga ngushilumamba wabula nkusu shakufuna? NoBaami baLesa muli pakati kesu alimwi tuli bantu banu. Mutatufutatili twamusenga.’ ”

¹⁰ Mwaami Lesa waamba makani aya pabantu aba ayi, “Balisuni bunene kwiingaila. Tabalitibukiiwo napaceyi. Aboobo nebo neMwaami Lesa ndabakaka. Ono ntokwiibaluka bubi bwabo akubapa mulandu ceebo ca shibiibi shabo.”

¹¹ Mpomunyaawo Mwaami Lesa wakaŋambila ayi, “Utapailili bantu abo ayi shintu shibeendele kabotu.

¹² Nabi bakalikashe kulya, kulila kwabo teshi nkakunyumfweewo. Nabi bakabenge milambu yabo yakutenta akupa shipo sha fulaulo teshi nkashitambulewo, sobwe. Sombi ndaakubanyonyoola kunkondo, nsala alimwi akumwaalu.”

¹³ Lyalo nebo ndakaamba ayi, “Nobaami baLesa beShinkusu shoonse, balaluki balabaambila ayi, ‘Teshi mukabonewo nkondo nabi kufwa kunsala. Ncakwiila mulaakupekwabo luumuno mucishi canu.’ ”

¹⁴ Mpeeke Mwaami Lesa wakakumbula ayi, “Balaluki batoolaluka shabubeshi muliina lyangu. Nshikwe kubatuma, kubasala nabi kubandikaabo. Batoomulalukilabo shili anga nshiloto shabubeshi, kusonda kwabo takucite ncito alimwi ashintu nshebaliyeeyela mumitwi yabo beene.

¹⁵ Paceebo ceeco Nebo neMwaami Lesa, pabalaluki abo balalukila muliina lyangu, ntokwaamba ayi, ‘Nshikwe kubatumaawo nabi batokwaamba ayi taaku nkondo nabi nsala yeshi ikashike mucishi cino.’ Balaluki mbomunya abo balaakuloba munkondo ansala.

¹⁶ Lyalo abantu abo mbobatoolalukilaako balaakuwaalwa mumikwakwa ya muJelusalemu ceebo ca nsala ankoondo. Teshi kukabeewo shikubabika nabi shikubika bamakaabo, bana babo basankwa nabi banakashi. Ndaakubapoomweta mapensho ayo abeelete.”

¹⁷ Kuswawaawo Mwaami Lesa wakaamba ayi, “Amba kubantu ayi, ‘Minsonshi aikunke mumeenso angu mashiku amalumwi cakutacilekaawo ceebo bantu bene misheesu bapenga kucilonda cinene. Ncakwiila bacisikwa cilensha bunyengele.

¹⁸ Na ndaya muluundu ndabona bakacaikwa munkondo. Na ndaya mundabala, ndabona batoofwa kunsala. Balo balaluki abapailishi balacita ncito yabo cakuteshiba ancebatoocita.’ ”

Bantu mbobakakombelela Mwaami Lesa

¹⁹ NoBaami baLesa, sa cishi ca Juda mwacikakilabo limwi? Sa bene Siyoni mulibapatite? Ceebonshi mwatucisa cakwaamba ayi tatukoonshi kushilikwa? Twakalinga kulangila luumuno, sombi taaku cibotu ncetwakabonawo. Twakalinga kulangila kushilikwa, sombi kwakesa kuloondesha.

²⁰ Nobaami baLesa, twalyaambilila shibiibi shesu ashibiibi sha bamashali besu bakulukulu. Ncakwiila twakamubishisha.

²¹ Ceebo ca liina lyanu mutatusuuli, mutalengeshi nsoni cuuna canu ca bulemu. Amwiibaluke cipangano ncemwakapanga andiswe, mutacileeki kucita kweelana a ncico.

²² Sa shibumbwabumbwa shilicite nkusu shakuleta mfula? Sa liculu lyeenka inga lyakonsha kulosha mfula yatepetepe? Sobwe, ndimwebo, Nobaami baLesa, baLesa besu. Aboobo kulangila kwesu kulibo kuli ndimwe ceebo ndimwebo nweenka nomucita shoonse ishi.