Jelemiya 13 - Baibo Busansulushi Bwa Libuku Ili

Laamba wa nsalu iteshimite

¹ Mpomunyaawo Mwaami Lesa wakaŋambila ayi, “Koya uule laamba wa nsalu iteshimite ufwale mubukome, sombi utakoosumpi mumaanshi.”

² Mpeeke ndakoola laamba kweelana abwakaamba Mwaami Lesa akuufwala mubukome.

³ Lyalo Mwaami Lesa wakaamba kuli ndime lwabili ayi,

⁴ “Bwesa laamba ngowakoola uyo ngoofwete mubukome uye uushiise pamwaansha wa mwaandami kuMulonga wa Yufuletisi.”

⁵ Aboobo ndakaya ndooshisa kuMulonga wa Yufuletisi kweelana abwakandwiita Mwaami Lesa.

⁶ Ndikwakeenda nshiku Mwaami Lesa wakaŋambila ayi, “Ono koya ulete laamba ngowakashisa kumulonga.”

⁷ Aboobo ndakaya kuMulonga wa Yufuletisi mukuyubulula laamba nkondakooshisa. Sombi ndakacana wanyonyooka cakwaamba ayi taaku ambweenga wafwalwa.

⁸ Mpomunyaawo Mwaami Lesa wakaŋambila ayi,

⁹ “Nebo neMwaami Lesa ndaamba ayi, ‘Munshila njemunya iyi mbweshi nkanyonyoole kulisumpula kunene kwa bene Juda akwa bene Jelusalemu.

¹⁰ Bamucita shibi abo bakakaka kunyumfwila maswi angu. Bakakonkela bushicimpamya bwa myoyo yabo akuya mukusebensela akulambila balesa bamwi. Paceebo ceeco balaakuba bweenka mbuli laamba uyu utacite ncito napaceyuubo.

¹¹ Bweenka laamba mboocata mubukome bwa muntu, mbweeke ubo anebo mbondakalinga kusuni ayi bene Isilaeli abene Juda banoocatite kuli ndime. Munshila iyo nkwaamba ayi babe bantu bangu akulengesha liina lyangu kulumbaishikwa akulemekwa. Sombi balo tabakwe kunyumfwila.’ ”

Nongo ya waini

¹² Kuswawaawo Mwaami Lesa wakaamba ayi, “Ambila bantu ayi nebo neMwaami Lesa, Lesa wa bene Isilaeli ndaamba ayi, ‘Nongo shoonse sha waini shilyeelete kusushikwa waini.’ Ono baakukwiipusha ayi, ‘Sa tatwishi ayi nongo ya waini yoonse ilyeelete kusushikwa waini?’

¹³ Lyalo ubaambile ayi, ‘Nebo neMwaami Lesa ndaakukolesha bantu boonse bekala mucishi cino kubikaawo abamaami bamulunyungu lwakwe Defedi, bapailishi, balaluki abantu boonse bekala muJelusalemu.

¹⁴ Kuswawaawo ndaakumana kubapwayoola anga ninongo mukuboomanya, bamanene abanike bweenka. Teshi nkabafwitewo nkumbu nabi paniini shakunkasha kubanyonyoola. Nebo neMwaami Lesa ndaamba.’ ”

Jelemiya mbwaakacenjesha beshikulisumpula

¹⁵ Nobene Isilaeli, amukutike akubikako maano ceebo Mwaami Lesa waamba.

¹⁶ Amulemeke Mwaami Lesa, Lesa wanu ndyaatana kuleta munshinshe ee, kamutana kutalika kulisuntula patulundu pataapu mumuni. Mwebo mutoolangila mumuni, sombi lakwe ulaakumuletela munshinshe ushiya mbi.

¹⁷ Ono na mubule kunyumfwa, ndaakulila mubushishi ceebo cakulisumpula kwanu. Ndaakulila abuumbi cakwaamba ayi meenso angu alaakunookunkabo minsonshi ceebo likoto lya bantu ba Mwaami Lesa lilaakutolwa mubusha.

¹⁸ Mwaami Lesa wakaŋambila ayi, “Ambila mwaami abanyina ayi, ‘Amuseluke pashuuna shanu sha bwaami ceebo mishini yanu yabulemu ilaakuloka kumitwi yanu.’

¹⁹ Mandabala a kuNegefu alaakucalwa cakwaamba ayi kulaakubula awacalula. Bene Juda boonse balaakutolwa mubusha, ncakwiila boonse balaakutolwa cakumaninina.”

²⁰ Ansha amwiinamuke mubone balwani banu batooswa kumatwa. Ino litanga ndyemwakapekwa ayi kamweembela lili kuli? Ee, shili kuli mbelele isho nshemwakalinga kutwangila?

²¹ Ino mulaakwaamba ayinshi Mwaami Lesa aakulengesha baabo mbomwakalinga kuyeeya ayi mbabyaanu kumweendelesha? Sa te mulaakunyonwabo anga ngumwanakashi uli pankata?

²² Na mwaliipusha mumyoyo yanu ayi, “Ceebonshi shintu sha mushobo uyu shatucitikila?” Shintu ishi shamucitikila ceebo cakufula kwa shibiibi shanu. Ncecalengesha ayi shifunga shanu shikwamunwe akukumanishikwa cakukakatishikwa.

²³ Sa muntu mushiya inga walisandula cikanda cakwe? Sa shiluwe inga wakonsha kulisandula mabala? Cilyeelenebo andimwe, tamukoonshi kucita shintu shibotu ceebo mulishibite kucita shintu shibiibi.

²⁴ Mwaami Lesa waamba ayi, “Ndaakumupalanganyabo anga mbuungu boolulushikwa kumuuwo wa muluyanga.

²⁵ Ici nceshi cikacitike kuli ndimwe. Cilaakuba ncecipansha nceshi nkamupe mukwiinga mwebo mwakanduba akucinka manungo mubalesa babubeshi.

²⁶ Ndaakunyamununa shifunga shanu akumufwekaasho kumeenso. Lyalo ndaakumushiyabo matakosha.

²⁷ Micito yanu ifundoosha kumoyo njemucita patulundu amumyuunda ndiibwene. Nkokwaamba ayi mulacita bulale alunkumbwa lwa pabamuka babyaanu. Mapensho kuli ndimwe nobene Jelusalemu! Citooba ciindi cilaamfu buyani kamutasalalite?”