Jelemiya 12 - Baibo Busansulushi Bwa Libuku Ili

Jelemiya mbwaakeepusha Mwaami Lesa

¹ Nobaami baLesa, mwebo muliluleme ciindi coonse na ndaleta mulandu pameenso anu. Sombi nacibi boobo ntoobandikaanu pacikani cakoombolosha kwanu kwakutanyengelela. Ino ceebonshi nshila sha bamucita shibi shilaswitilila? Ceebonshi bantu batashomeki boonse balekala cakuliiba?

² Mwakabashanga abalo bakamena, balakomena akucata shisepo. Ciindi coonse balaamba shibotu pali ndimwe, sombi myoyo yabo ili kulaale amwebo.

³ Sombi noBaami baLesa nebo mulinshi, mulambona alimwi akweelesha miyeeyo yangu pali ndimwe. Basankwa abo babiibi, amubakwelaanye anga nimbelele itooya mukucaikwa! Mubabiike lubasu kushikila bushiku mbweshi bakacaikwe!

⁴ Citooba ciindi cilaamfu buyani cishi ndyeshi cinooshiite kaciyumite abwiisu kabunyanite mumyuunda yoonse? Ceebo ca bubi bwa bantu abo baliimo banyama abayuni bakamana kuloba. Nakubi boobo, bantu aba balaamba ayi, “Lesa taashiboniiwo isho nshetucita.”

⁵ Lyalo Mwaami Lesa wakakumbula ayi, “Jelemiya na wakacica abantu beshimyeendo, bamana bakushiya, ino inga wacica buyani amaaki? Na wakalisuntula patubabo tu, ino inga wacikonsha buyani kweenda mumasaka a kuJoodani?

⁶ Bakwanu, ee, mboolyaabo mbale yomwi, bakwaaba. Balapaankana abantu bamwi ayi bakulwaane Utanoobashoma nabi kabaamba shibotu pali ndiwe.”

Buumba bwa Mwaami Lesa pabantu bakwe

⁷ Mwaami Lesa waamba ayi, “Ndafutatila bene Isilaeli. Ndakaaka bantu mbondakasala. Ncakwiila ndaaba bantu aba mboonsuni munkusu sha balwani babo.

⁸ Bantu mbondakasala bambukilabo anga ninkalamu muluundu. Bambulumina, paceebo ceeco ndibapatite.

⁹ Bantu mbondakasala baba anga nkayuni kashingulukwa abacikupwi ayi bakalye. Koya ukabunganye banyama bamuluundu boonse ayi abalo bese balye.

¹⁰ Bamatanjilili baanji bakanyonyoola muunda wangu wa minyansa. Bakalyatoola mumuunda wangu ubotu akuulengesha kuba luundu lutacite ncito.

¹¹ Ncakwiila ulaakuba luundu lutacite ncito, luundu luyumu nta anga ncikula kunembo lyangu. Cishi coonse cilaakuba luyanga ceebo taaku wakucibikila maano.

¹² Mutulundu toonse tutacite bwiisu muluyanga beshikunyonyoola balaakuwuumuka. Balaakucita boobo ceebo mupeeni wa Mwaami Lesa ulaakucaya kuswa kweela cishi kuya mukushika ankoceela, cakwaamba ayi taakuuwo aweshi akanooli muluumuno.

¹³ Balaakushanga witi, sombi balaakutebula myuumfwa. Balaakuyuwaana, sombi taaku anceshi bakacaneemo. Ono ceebo ca bukali bwangu buyoosha nebo neMwaami Lesa, shishango shabo shilaakufwa.”

Mwaami Lesa mbwaakashomesha bamushishi shakalinga kushingulukite cishi ca Isilaeli

¹⁴ Mwaami Lesa waamba ayi, “Ndicite makani akwaamba kubaabo bashingulukite cishi ca Isilaeli abo bakanyonyoola cishi ncendakapa bantu bangu. Ndaakubatupula kuswa mushishi shabo akutupulawo bene Juda pakati kabo.

¹⁵ Sombi pesule lyakumana kubatupoola ndaakubanyumfwila nkumbu akuboosha mushobo womwi awomwi mucishi ca nguwo.

¹⁶ Na bakeshibe kabotu nshila sha bantu bangu akushomesha cakulumbila muliina lyangu ayi, ‘Bweenka mbocibete lushinisho ayi Mwaami Lesa ngumuumi,’ ee, bweenka mbobakalinga beeisha bantu bangu kushomesha cakulumbila muliina lyakwe Baali, ingayi balaakwikala pantu pomwi abantu bangu.

¹⁷ Ono na mushobo umwi ukabule kunyumfwila, ndaakuutupula akuunyonyoola cakumaninina. Nebo neMwaami Lesa ndaamba.”