Jelemiya 11 - Baibo Busansulushi Bwa Libuku Ili

Jelemiya acipangano cakwe Lesa

¹ Mwaami Lesa wakandwiita ayi,

² “Jelemiya, nyumfwa makani a cipangano ici. Kuswawaawo ulwiite bene Juda abaabo bekala kuJelusalemu.

³ Ubaambile ayi nebo neMwaami Lesa, Lesa wa bene Isilaeli waamba ayi, ‘Ulishingenwe uyo utakonkeli maswi a mucipangano cangu.

⁴ Nkokwaamba ayi cipangano ico ncendakapanga abamashali banu bakulukulu ndindakabakusha muIjipiti. Cishi ico cakalinga anga mumunyumbi mutoonyaka mulilo kuli mbabo.’ Ndakabaambila ayi, ‘Amunyumfwile akucita shoonse nshendamwaambila, ingaawo mukabe bantu bangu anebo ndyeshi nkabe Lesa wanu.

⁵ Lyalo ndaakucita kweelana ambondakashomesha cakulumbila kubamashali banu bakulukulu. Ncakwiila ndaakubapa cishi muli bubile abulongo bubotu, cishi ico ncemushiiteemo bulya.’ ” Mpomunyaawo ndakakumbula ayi, “Akube boobo, Nkambo.”

⁶ Mpeeke Mwaami wakaŋambila ayi, “Koya waambilishe maswi aya oonse mumandabala a kuJuda amumikwakwa ya muJelusalemu ayi, ‘Amunyumfwe makani acipangano ici alimwi mwaakonkele.

⁷ Kuswa ciindi ndindakakusha bamashali banu bakulukulu muIjipiti kushika sunu, ndakabacenjesha mankanda aanji ayi, Kamunyumfwila.

⁸ Sombi balo tabakwe kunyumfwila nabi kubikako maano. Bakakonkela bushicimpamya bwa myoyo yabo ibiibi. Nebo ndakabaambila ayi bakonkele cipangano cangu, sombi bakaalilwa kucikonkela. Paceebo ceeco ndakabaletela mashingo oonse a mucipangano ico.’ ”

⁹ Mpeeke Mwaami Lesa wakaŋambila ayi, “Bene Juda abene Jelusalemu batoopinga kungashukila.

¹⁰ Bakapilukila kushibiibi sha bamashali babo bakulukulu abo bakalinga kukaka kunyumfwila maswi angu. Bakakonkela akusebensela balesa bamwi. Bene Isilaeli abene Juda boonse bakakaka kukonkela cipangano ncendakapanga abamashali babo bakulukulu.

¹¹ Paceebo ceeco nebo neMwaami Lesa ndaamba ayi, ‘Ndaakubaletela mapensho ayo ngweshi bakaalilwe akwaacica. Nabi bakandilile, teshi nkabakumbuleewo, sobwe.

¹² Lyalo bantu ba mumandabala a muJuda abene Jelusalemu balaakuya mukulilila balesa abo mbobatentela tununkila kabotu. Sombi balesa aba teshi bakabapulushewo mapensho aakubapolela.

¹³ Mwebo nobene Juda mulicite balesa banu baanji bweenka bubete mandabalaanu. Shipaililo nshemwakayaka shakutentelawo tununkila kabotu kuli Baali, lesa uyo ulensha bunya, nshiinji bweenka mbuli mikwakwa ya muJelusalemu.’

¹⁴ “Ono Jelemiya utapaililiiko bantu aba. Utabasengeliiko nabi kubakombelelako ayi mbafwite nkumbu ceebo paciindi baakuba mumapensho teshi nkabanyumfwewo baakunjita.”

¹⁵ Mwaami Lesa waamba ayi, “Bantu mboonsuni batoocita shintu shibiibi. Balicite nkusunshi shakwinjila muŊanda yangu? Sa batooyeeya ayi inga baciba kupekwa mapensho kwiinda mukushomesha shintu akubenga milambu yakutenta? Sa ico cilaakubalengesha kusangalala?

¹⁶ Nebo neMwaami Lesa ndakalinga kubeeta ayi cisamu cibotu abuumbi ca maolifi cicite shisepo shiboneka kabotu. Ono cisamu ico ndaakucitenta kukuyooma kuli anga nkululuma kwa mfula ayalo misampi ya ncico ndaakwiiponsoola.

¹⁷ “Nebo neMwaami Lesa Shinkusu shoonse uyo wakamushanga ndaamba ayi mukapolelwe mapensho. Ndacita boobo ceebo mwebo nobene Isilaeli anobene Juda mwakacita shibiibi akusonkomona bukali bwangu kwiinda mukutentela Baali tununkila kabotu.”

Jelemiya mbwaakapingwa kucaikwa

¹⁸ Mwaami Lesa wakanjubulwita balwani bangu nshebakalinga kupinga kucita kuli ndime.

¹⁹ Ndakalingabo anga ngumwanaambelele mubombu utootolwa mukucaikwa. Nshindakalinga kwishiiwo ayi batoopinga kuncaya. Bakalinga kwaamba ayi, “Atunyonyoole cisamu ashisepo sha ncico. Atumukushe mucishi ca bantu boomi kwaamba ayi liina lyakwe litakayeeyekwiwo tubili.”

²⁰ Lyalo ndakapaila ayi, “NoBaami baLesa beShinkusu shoonse, mwebo nomoombolosha cabululami akweelesha myoyo amiyeeyo ya bantu. Cikani cangu ndacitula mumaansaanu. Ono ntooyanda kumubona kamuboosha cishole pabantu aba.”

²¹ Lyalo Mwaami Lesa wakaamba ayi, “Basankwa bamwi ba kuAnatoti batooyandoola buumi bwako akunokwaamba ayi, ‘Utanoolalukila muliina lya Mwaami Lesa, sombibo na koosuni kufwita mumaanseesu.’ ”

²² Aboobo Mwaami Lesa Shinkusu shoonse wakaamba ayi, “Ndaakubapa mulandu. Bacikula bwangu balaakucaikwa kunkondo. Bana babo basankwa abanakashi ndaakubacaya kunsala.

²³ Taakuuwo nabi womwi weshi akacaale pabantu ba kuAnatoti. Ndaakuleta mapensho pali mbabo mumwaaka ngondakasala kubapa mulandu.”