Jelemiya 10 - Baibo Busansulushi Bwa Libuku Ili

Kulambila Lesa alimwi akulambila shibumbwabumbwa

¹ Amunyumfwe shitoomwaambila Mwaami Lesa, mwebo nobene Isilaeli.

² Lakwe utokwaamba ayi, “Muteeyi nshila sha mishobo imwi. Mutaloondi ceebo ca shitondesho shiboneka mwiculu. Ee, kutaloonda nabi mishobo imwi yatutuma kuboowa.

³ Kwishibila kwa bantu aba taaku mbokubete. Balatema cisamu muluundu ico shikubesa ncaabesa ambeso yakwe.

⁴ Mpeeke cisamu ici balacibotesha asilifa alimwi agolodi. Kuswawaawo balacipopa amisomaali kwaamba ayi ciimikane cakutawa.

⁵ Shibumbwabumbwa isho shilibo anga ncakukongeshaako mumuunda wa banamunwa. Tashaambi alimwi shilanyamunwabo ceebo tasheendi. Mutashiloondi, sobwe. Teshi shikamupenshewo nabi kumucitilawo shintu shibotu.”

⁶ Taakuuwo muntu nabi womwi weelene andimwe noBaami baLesa. Mwebo mulicite nkusu. Ncakwiila liina lyanu lilicite nkusu shiindaawo.

⁷ Anu ngani uteelete kumulemeka, mwebo noBaami ba mishobo yoonse? Ndushinisho bulemu bulyeelete ndimwe. Pabasongo boonse bamumishobo amumalelo abo oonse, taaku ngomweelenaakwe.

⁸ Boonse tabacite maano alimwi mbaluya. Anu inga beeyanshi kushibumbwabumbwa isho shakapangwabo kushisamu?

⁹ Shibumbwabumbwa shabo balashinanika silifa uswa kuTashishi agolodi uswa kuUfasi. Camana kupangwa kubaabo bacibwene kubesa akufula, balacifwalika shisani shiboneka anga ndiculu alimwi ashifubelafubela. Shisani isho shoonse shilatungwa kubacibwene kutunga.

¹⁰ Sombi mwebo noBaami baLesa ndimwe baLesa balushinisho. Muli baLesa boomi, muli Baami balyoonse alyoonse. Na mwakalala, acishi cilatenkaana alimwi taaku mushobo weenga weemikana kunembo lya bukali bwanu.

¹¹ Balwiite makani aya akwaamba ayi, “Balesa abo batakwe kulengako liculu acishi ca panshi, balaakunyonyoolwa. Teshi bakabonweewo tubili mucishi ca panshi coonse.”

Lwiimbo lwakulumbaisha Lesa

¹² Mwaami Lesa wakalenga cishi ca panshi kwiinda munkusu shakwe. Wakalenga cishi mubusongo bwakwe akufungulula liculu kwiinda mumaano akwe akunyumfwisha shintu.

¹³ Na waluluma, maanshi a mwiculu alayooma. Ulalengesha makumbi kunyamuka kuswa mweela cishi ca panshi. Lyalo ulalengesha kubeka mumfula akuleta muuwo kuswa mumisena yakwe yakusungilamo shintu.

¹⁴ Boonse mbaluya alimwi tabacite lushibo. Beshikufula golodi boonse balicite nsoni ceebo ca shibumbwabumbwa shabo. Balesa babo mbabubeshi alimwi tabayooyi.

¹⁵ Taakuuwo mbobabete, balyeelete kusuulwa. Ciindi cakoomboloshekwa kwabo caakushikila, balaakumana kuloba.

¹⁶ Lesa wa bamulunyungu lwakwe Jakobo taaeleneewo ambabo ceebo lakwe ngowakalenga shintu shoonse. Wakasala bene Isilaeli ayi babe bantu bakwe. Mwaami Lesa Shinkusu shoonse ndyeliina lyakwe.

Bantu mbweshi bakatolwe busha

¹⁷ Amulongele buboni bwanu kwaamba ayi muswe mucishi canu mwebo nomushiite mundabala ishingulukitwe.

¹⁸ Mwaami Lesa waamba ayi, “Paciindi ico ndaakusowa bekala mucishi ici. Ndaakubaletela mapensho kwaamba ayi bakacatwe.”

¹⁹ Bene Jelusalemu bakumbula ayi, “Mapensho kuli ndiswe ceebo ca shilonda shesu. Ncakwiila ceebo ca shilonda shesu shitatoomanaawo. Twakalinga kuyeeya ayi inga twakonsha kuliyuminisha.

²⁰ Matente esu anyonyoolwa antaambo sha ngawo shoonse shasutoolwa. Bana besu boonse batupalangana teshi tukababonewo tubili. Taaku awacaala weenga watupopelako matente alimwi nabi weenga watuyakilako shimpaka.”

²¹ Nebo ndaamba ayi, “Beembeshi tabacite maano. Tabasengi kuMwaami Lesa ayi abatanjilile. Aboobo tabaswitilili ashalo mbelele shabo shakapalangana.

²² Amunyumfwe, kwesa nkombe ayi kutoosa shimfulunganya shinene abuumbi kuswa kucishi ca kumatwa. Likoto lya bashilumamba lya cishi ico lilaakulengesha mandabala a kuJuda kuba matongo umo mwikalabo bamwaaba.”

²³ NoBaami baLesa, ndishi kwaamba ayi buumi buli mumuntu teshi bwaakwe, sobwe. Muntu taacite nkusu shakweendelesha buumi bwakwe.

²⁴ NoBaami baLesa, amundulike, mubululami bwanu, kuteshi mubukali bwanu ceebo inga mwanyonyoola cakumaninina.

²⁵ Amutile bukali bwanu pamishobo iyi itamulambili alimwi apabantu abo bakaka ndimwe. Ceebo bakanyonyoola bamulunyungu lwakwe Jakobo. Bantu abo bakabanyonweetabo limwi akunyonyoola cishi cabo.