Isaya 66 - Baibo Busansulushi Bwa Libuku Ili

Koomboloshekwa akulangila

¹ Mwaami Lesa waamba ayi, “Liculu ncecuuna cangu ca bwaami, acalo cishi ca panshi mpopakulyata myeendo. Ono ŋanda njeshi munjakile ili buyani? Ee, musena ngweshi nkanokookeshelamo ulaakubeta pali?

² Sa teshi ndime ndakalenga shintu shoonse ishi? Ncakwiila ndime ndakalengesha ayi shibeeko.” Mwaami Lesa waamba. “Ono muntu unkonda ngooyu: muntu ulibombya, ulisenda na walubisha alimwi uloonda maswi angu.

³ Sombi bantu batola nshila shabo. Kuli mbabo tacipuseneewo kubenga mucende akubenga muntu ayi ngumulambu. Tacipuseneewo balo kubenga mwanaambelele akubenga kabwa ayi ngumulambu. Tacipuseneewo kupa cipo ca shili anga ngamaila akubenga bulowa bwa nkumba. Tacipuseneewo kupa cipo ca tununkila kabotu twaciibalusho alimwi akupaila kushibumbwabumbwa.

⁴ Paceebo ceeco ndaakubaletela mapensho Ndaakubaletela shintu sheenka nshebaloonda mukwiinga ndindakeeta, taaku wakakumbula. Ndindakamwaambila tamukwe kukutika. Bakacita bubi pameenso angu. Ee, bakasala kucita shintu shitankoondi.”

⁵ Ono amukutike maswi a Mwaami Lesa mwebo nomulemeka maswi akwe ayo. Waamba ayi, “Bamakwabanu abo bamupatite ceebo cakushomeka kuli ndime, baamba ayi, ‘Mwaami Lesa wabo aatondeshe nkusu shakwe kwaamba ayi tumuboone kamusangalala.’ Ono balo beenka abo balaakulenshekwa nsoni.

⁶ Amunyumfwe ciyobeyobe ico cili mundabala inene, amunyumfwe coongo citooswa muŊanda yangu. Ico ncoongo cangu nebo neMwaami Lesa ntooboosha shishole kubalwani bangu boonse kweelana ambobeelete.

⁷ “Ndabala yangu ili anga ngumwanakashi watumbuka mwaana cakutabukaawo lifumo. Ee, anga ngwalutundu wapulukaamo mwaana musankwa cakutanyonwaawo lifumo.

⁸ Ngani wakanyumfwaawo kale cikani ca mushobo uyo? Ee, ngani wakacibonaawo kale ca mushobo uyo? Sa bantu balakonsha kupanga cishi mubushiku bomwi. Sa mushobo wa bantu ulakonsha kushalwa bushiku bomwi? Sombi ndabala ya Siyoni ilaakubona mushobo wa njiyo kwakuteendaawo mumapensho a mushobo uli woonse.”

⁹ Ono Mwaami Lesa waamba ayi, “Sa nebo inga ndalengesha lifumo kubuka, sombi ndabula kumulengesha kutumbuka?

¹⁰ “Amusangalale akukondwa pantu pomwi aJelusalemu mwebo noonse nomusuni ndabala iyi. Amusangalale cankusu mwebo nomwiilililaako mumapensho a njiyo.

¹¹ Mulaakusangalala mububoni bwa njiyo anga ngumwaana kulukolo lwa banyina!”

¹² Mwaami Lesa wakaamba ayi, “Ndaakumulengesha kuba ashintu shiinji anga ngumulonga wa maanshi uteeli. Buboni bwa mishobo imwi bulaakunoomushikila anga ngamaanshi a mumulonga wasefuka. Mulaakuba anga ngukateta uyamwa uyo ufukatwa abanyina alimwi utondeshekwa lusuno.

¹³ Bweenka mwanakashi mbwaaumbulusha mwanaakwe mbweeke ubo anebo mbweshi nkamuumbulushe. Minsonshi yanu pandabala ya Jelusalemu ndaakwiimana.

¹⁴ Ici mwaakucibona, myoyo yanu ilaakusangalala. Lyalo mulaakunoonemfumabo anga ngumweemfu mukuswitilila. Nkusu shangu nebo neMwaami Lesa, shilaakuboneka kubasebenshi bangu. Sombi balwani bangu ndaakubatondesha bukali bwangu.”

¹⁵ Amubone Mwaami Lesa waashika amulilo! Cikoci cakwe ca nkondo cilibo anga nkapupuulwa. Utoosa calunteente mukutondesha bukali bwakwe ee, kukalooka kwakwe kulaakuba anga nkwa mulilo.

¹⁶ Mwaami Lesa ulaakoombolosha bantu boonse amulilo alimwi amupeeni. Ncakwiila Mwaami Lesa baanji ulaakubacaya.

¹⁷ Mwaami Lesa waamba ayi, “Ali pafwaafwi meelelesho a baabo balisalashisha kulambila balesa ba baswamashi, ee, abo baya mumulongo kumyuunda yabo isalalite akulya nkumba, mbeba ashintu shimwi shitasalalite kweelana aMilawo.

¹⁸ Miyeeyo yabo alimwi amicito yabo ndiishi. Ono ntoosa mukubunganya bantu ba mumishobo yoonse. Lyalo baakubungana, balaakubona shikonsha kucita nkusu shangu

¹⁹ alimwi balaakwishiba kwaamba ayi ndime mbapa milandu. “Sombi bamwi ndaakubashiyaawo akubatuma kumishobo imwi akumisena yakulaale uko nkobatana kunyumfwaawo kale mpuwo yangu nabi kubonawo kale nkusu shangu shinene. Nkokwaamba ayi kuTashishi, kuLibya, Lidiya cishi ico cicite basankwa bacibwene kulwana amata, kuTubali alimwi akuGilisi.

²⁰ “Balaakuleta bene mishaanu boonse bali mushishi shoonse kukalundu kangu kasalalite muJelusalemu ayi ncipo kuli ndime neMwaami Lesa. Balaakwisa kabatantite pamaaki, shifubwa shili anga nimbongolo, ngamela, mushikoci alimwi amumaŋoola. Bweenka bene Isilaeli mbobaleta shipo sha shili anga ngamaila kuŊanda yangu mushakunyamwitaamo shisalalite kweelana aMilawo, mbweeke ubo abalo mbweshi bakaletwe.

²¹ Ndaakusaloolaamo bamwi kuba bapailishi abamwi kucita mulimo wa bene Lefi.” Mwaami Lesa waamba.

²² “Ono bweenka liculu lipya acishi ca panshi cipya isho nsheshi nkalenge mbweshi shikabe shamuyayaya, mbweeke ubo bamulunyungu lwanu aliina lyanu mbweshi shikabule kuloba.

²³ Lyalo bantu bamumishobo yoonse balaakunoosa kuJelusalemu mukulambila lyoonse panshiku sha kusekelela myeenshi ipya alimwi apanshiku shakookesha sha Cibelu.” Mwaami Lesa waamba.

²⁴ “Balaakunyamuka akuya mukubona mituntu ya baabo bakaashukila ndime neMwaami Lesa. Ncakwiila mapila eshi akanoolya mituntu yabo teshi akafweewo awalo mulilo weshi ukabateente teshi ukashimishikweewo. Balaakunoolensha bunya kubantu boonse beenga babalanga.”