Isaya 65 - Baibo Busansulushi Bwa Libuku Ili

Lesa mbweshi akape mulandu bantu bamwaalookila

¹ Mwaami Lesa waamba ayi, “Ndakaliyubulula kubantu abo batakalinga kumpaila. Ndakalibika patuba kubaabo batakalinga kunyandoola. Ncakwiila kumushobo watakalinga kunambila, ndakaamba ayi, ‘Mpoondi, ndaakumucafwa.’

² Ciindi coonse ndalinga kulibambite kucafwa bantu beshicimpamya. Ee, bantu beenda munshila shibiibi. Mbantu bakonkelabo shamiyeeyo yabo.

³ Balatolelela kunkalasha cakutalisendaawo mukuya mukubenga milambu mumyuunda yakapekwa kubalesa babo akutenta tununkila kabotu pashipaililo sha bakunsengwe.

⁴ Mashiku balaya kushimfwengo akushuumbwe mukucebusha kubafu. Balalya nyama ya nkumba akunwa musushi wa nyama itasalalite.

⁵ Kuswawaawo balaambila bamwi ayi, ‘Kamusoonoka, mutaseni pafwaafwi anebo mukwiinga ndisalalite abuumbi cakwaamba ayi mwebo tamukonshi kuncata!’ Bantu bamushobo uyo bancimabo anga mbwiishi bwenjila mumashono. Bukali bwangu pali mbabo bulibo anga ngumulilo utashimiki.

⁶ “Amubone mulandu wabo ulilembetwe kale, ncakwiila teshi nkoomunebo, sombi ndaakuboosha cishole cikwene, ee, cishole pabubi ubo mbobakacita.

⁷ Ndaakuboosha cishole pabubi bwabo abwakacita bamashali babo bakulukulu. Mukwiinga bakalinga kubenga milambu pamisena yakulambililaawo ya patulundu akubisha liina lyangu patulundu uto, ndaakubapa mulandu, ee, mulandu weelete pashintu shoonse nshebakacita kale kale.” Mwaami Lesa waamba.

⁸ Mwaami Lesa wakaamba ayi, “Kulilabo maanshi kaaciliimo muminyansa bantu balaamba ayi, ‘Muteenyonyooli, mise moicili.’ Mbweeke ubo anebo mbweshi nkacite ceebo ca basebenshi bangu. Ncakwiila teshi nkanyonyoole bantu bangu boonse.

⁹ Ndaakuleta bamulunyungu lwakwe Jakobo, ndaakuleta bamumukowa wakwe Juda abo beshi bakese mukwikala mutulundu twangu. Tulundu twangu uto tulaakuba twa bantu bangu bakasalwa. Ncakwiila basebenshi bangu nkweshi bakekaale uko.

¹⁰ Cinyika ca Shaloni cilaakuba mafulo a mbelele, acalo cinyika ca Akoli cilaakuba mulela wa ŋombe, ee, kuba misena ya shifubwa sha bantu bangu abo banambila.

¹¹ “Sombi mwebo nomufutatila ndime neMwaami Lesa akusuula kalundu kangu kasalalite, ee, mwebo nomulambila Gadi aMeni balesa baleta coolwe amalwesa,

¹² malwesa anu nkufwa lufu lubiibi. Ncakwiila mulaakumana kufwa kunkondo mukwiinga ndindakeeta tamukwe kukumbula, alimwi ndakaamba, sombi tamukwe kunkutika. Mwakacita bubi mumeenso angu mukusala kucita shitasangalashi ndime.”

¹³ Paceebo ceeco Mwaami Lesa waamba ayi, “Basebenshi bangu balaakunoolya, sombi mwebo mulaakunoofwabo nsala. Basebenshi bangu balaakunoonwa, sombi mwebo mulaakunoofwabo nyotwa. Basebenshi bangu balaakunoosangalala, sombi mwebo mulaakulenshekwa nsoni.

¹⁴ Basebenshi bangu balaakunoosangalala ceebo cakukondwa kweshi kukanooli mumyoyo yabo. Mwebo mulaakunoolila cakooloma ceebo cabuumba bweshi bukanooli mumyoyo yanu. Ncakwiila mulaakunoolila mibila ceebo ca kutyongooka kwa muuya wanu.

¹⁵ Bantu bangu mbondakasala balaakunosebensesha liina lyanu pakushingana. Nebo neMwaami Lesa Shinkusu shoonse ndaakubanyonyoola. Sombi basebenshi bangu balo ndaakubapa liina limwi.

¹⁶ Lyalo woonse weshi akasenge coolwe mucishi ico, ulaakucita boobo muliina lyangu, nebo neLesa utabeci. Alakwe uyo weshi akashomeshe cakulumbila mucishi ico, ulaakulumbila muliina lyangu, nebo neLesa utabeci. Ceebo mapensho oonse akulukulu alaakulubwa alimwi teshi akabonekeewo tubili mumeenso angu.”

Liculu lipya acishi cipya

¹⁷ Mwaami Lesa waamba ayi, “Ntoolenga liculu lipya acishi ca panshi cipya. Shintu shikulukulu shilaakulubwa alimwi teshi shikeebalukweewo napaceyi.

¹⁸ Amukondwe akusangalala kwalyoonse alyoonse pasheesho nsheshi nkaleenge, mukwiinga Jelusalemu ngweshi nkaleenge mulaakunoolibo kusangalala. Abalo bantu beshi bakanookalaamo balaakunooli bantu bakondetwe.

¹⁹ Ndabala ya Jelusalemu ilaakunoonsangalasha alimwi bantu bangu ndaakubasuna abuumbi. Mundabala iyo teshi mukanyumfwikeewo utoolila buumpute nabi mubila.

²⁰ “Muli njiyo teshi mukabeewo tubili kateta weshi akekalebo nshiku shiniini akufwa, nabi mucembele weshi akafwe kaatana kumana myaaka ya buumi bwakwe. Uyo weshi akafwe kaacitebo myaaka mwaanda, ulaakunoyeeyelwa ayi walinga kucilibo cikula bwangu. Alakwe uyo weshi akafwe kaatana kushika myaaka ili mwaanda, ulaakunooyeeyelwa ayi wakashinganwa.

²¹ Bantu bangu balaakuyaka maanda akwikalaamo beene. Balaakushanga shisamu sha minyansa akulyaako minyansa beene.

²² Cilaakumana cakwaamba ayi bayaka ŋanda, sombi besa mukwikalaamo mbambi, nabi cakwaamba ayi balo bashanga, sombi besa mukulya mbambi. Bantu bangu balaakunookala buumi bulaamfu anga ncisamu. Ncakwiila bantu mbondakasala balaakunoolya nkasaalo yabo cakwiishishaawo.

²³ Teshi bakanoosebenselawo citacite mpindu, nabi kushala baana beshi bakanoopengabo. Balaakuba bantu abo nebo neMwaami Lesa mbweshi nkape coolwe, nkokwaamba ayi balo abamulunyungu lwabo boonse.

²⁴ Ndaakunoobakumbula kabatana kutalika kunjita, ncakwiila kabacaambabo, nebo ndaakunyumfwa.

²⁵ Muciindi ico baumpe balaakunoolyabo pantu pomwi ambelele. Inkalamu shilaakunoolya bwiisu anga niŋombe sombi yalo nsoka ilaakunoolya bulongo ono teshi shikanoolumaawo. Ncakwiila pakalundu kangu kasalalite teshi pakabewo ciluma nabi cinyonyoola.” Mwaami Lesa waamba.