Isaya 64 - Baibo Busansulushi Bwa Libuku Ili

¹ Ncakwiila inga cabota abuumbi na mwapasula liculu akwisa panshi. Tulundu inga twatenkaana kuboowa kunembo lyanu.

² Bweenka mulilo mboutenta tusaala akubilisha maanshi, mbweeke ubo amwebo amwise akulengesha liina lyanu kupuka kubalwani banu. Munshila iyo amulengeshe bamumishobo imwi kututuma kunembo lyanu.

³ Kale kale mwakalinga kucita shintu shikankamika isho nshetwatakalinga kulangila. Mwakaseluka panshi alimwi tulundu twakamubona akutenkaana pameenso anu.

⁴ Ncakwiila kuswabo kale kale taaku wakanyumfwaawo nabi kubonaawo Lesa uli mbuli ndimwe, Lesa uyo ucitila baabo balangila muli nguwe.

⁵ Mulacafwa bantu abo basuni kucita shiluleme ee, kucafwa baabo beebaluka nshila shanu shibotu. Twakamukalasha sombi twakatolelela kubisha. Ndushinisho nakubi kwaamba ayi mwakakalala pali ndiswe kuswabo kale kale tatuna kucilekaawo kubisha.

⁶ Soonse twalinga kubisha kuswabo kale kale. Nabi micito yesu ibotu ilibo anga ncakufwala cishipite citoonunka. Twanyana kushibiibi shesu cakuba anga nditewu alimwi shibiibi shesu nshemunya shitootuululusha anga ncipuupu.

⁷ Taaku nabi womwi umupaila nabi ulwanisha kwaamba ayi mumucaafwe. Mwalishisa kuswa kuli ndiswe akutusuula ceebo ca shibiibi shesu.

⁸ Sombi mwebo noBaami baLesa ndimwe beeshiwesu. Swebo tulibo anga mbulongo, sombi mwebo ndimwe babumbi. Ndimwe mwakatulenga soonse amaansaanu.

⁹ NoBaami baLesa mutakalalilibo limwi pali ndiswe cakutabooshamo myoyo. Muteebaluki shibiibi shesu kwamuyayaya mukwiinga soonse tuli bantu banu.

¹⁰ Mandabalaanu anene ali anga nduyanga, ncakwiila ndabala ya Siyoni yaba luyanga. Ndabala ya Jelusalemu ilibo mumatongo.

¹¹ Ŋanda yanu isalalite alimwi yabulemu umo bamashali besu mobakalinga kumulumbaishila, yapya kumulilo. Misena yoonse njetwakalinga kusuni yanyonyoolwa.

¹² NoBaami baLesa, sa ishi shoonse taaku mboshaamba kuli ndimwe? Sa taaku nceshi muciteewo pacikani ici alimwi akutuleka ayi tupenge kwiinda mpontukonsha kuliyuminisha?