Isaya 63 - Baibo Busansulushi Bwa Libuku Ili

Mwaami Lesa mbweshi akakome mishobo imwi

¹ Anu ngani uyu utooswa kuEdomu ee, utooswa muBosila ashakufwala shisalala? Anu ngani uyu ufwete shakufwala shabulemu utoosa citankaila munkusu shakwe shinene? “Ndime nentokwaamba mubululami ee, nebo neencite nkusu shakupulusha.”

² Ceebonshi shakufwala shako shilibo pyu anga ngumuntu utootyana minyansa?

³ “Ndakalyatoola mishobo imwi anga njiminyansa kwakubula awakancafwaako. Ndakabalyatoola paciindi ncendakalinga kukalalite. Ncakwiila ndakabalyatoola paciindi ndindakalinga kufundilite. Malowa abo akasamfookila kushakufwala shangu, alimwi ndakasombesha shakufwala shangu shoonse.

⁴ Ceebo cakalinga mumoyo wangu nkuboosha cishole. Mwaaka wakupulusha kwangu awalo wakashika.

⁵ Ndakalangalanga, sombi taaku ngondakabona weenga wancafwaako. Ndakankamana kubona kwaamba ayi taaku shikuncafwa nabi womwi. Paceebo ceeco ndakakoma kwiinda mulyaansa lyangu lya nkusu. Bukali bwangu bwakampa nkusu.

⁶ Ndakabalyatoola paciindi ndindakalinga kukalalite. Ceebo cakufundililwa kwangu ndakabalengesha kukolwa akutila bulowa bwabo panshi.”

Shintu shibotu Mwaami Lesa nshaakacitila bene Isilaeli

⁷ Ndaakushimika shankumbu sha Mwaami Lesa, ee micito iyo njaaelete kulumbaishilwaawo. Tulyeelete kumulumbaisha kweelana ashintu shoonse nshaakatucitila. Ee, shintu shibotu shiinji nshaakacitila bene Isilaeli ceebo ca nkumbu shakwe shitamaami.

⁸ Mwaami Lesa wakaamba ayi, “Aba mbantu bangu, bana bangu abo batakoonshi kumbeca.” Nceceeco ncaakabeta Mupulushi wabo.

⁹ Mapensho abo oonse alakwe wakapengaako. Ono munjelo uswa kuli nguwe nguwakabapulusha. Wakabapulusha ceebo ca lusuno lwakwe lutamaani. Wakabanyamuna akubayumuna mwiine kwa nshiku shoonse shikulukulu.

¹⁰ Nakubi boobo bakamwaashukila akukalasha Mushimu wakwe Usalashi. Aboobo wakabaalookila akuba mulwani wabo ncakwiila wakabalwana mwiine.

¹¹ Pesule bantu bakwe bakeebaluka nshiku shikulukulu, ee, nshiku shakwe Mose abantu bakwe akwiipusha ayi, “Anu uli kuli ulya wakabaleta akubeensha mulweenge kwiinda muli Mose mutanjilili wa likoto lyakwe? Uli kuli ulya wakabika Mushimu Usalashi pakati kabo?

¹² Uli kuli Mwaami Lesa ulya wakacita shaankamiko kwiinda munkusu shakwe, ee, nkusu shakwe shikankamanisha kwiinda muli Mose? Wakapansaanya maanshi mulweenge bantu bakwe kababweneeko kwaamba ayi akanoolemekwa kwalyoonse alyoonse.

¹³ Uli kuli wakabatanjilila panshi lya lweenge payumu?” Bakeendawobo anga ndiaki litokwiinda muliwesa. Ncakwiila bakeenda cakutalisuntulaawo napaceyuubo.

¹⁴ Mushimu Usalashi wakabalengesha kookesha bweenka ŋombe mboshookesha na shatolwa kumweemfu mucinyika. Mbweeke ubo mwebo noBaami baLesa mbweshi mukatanjilile bantu banu akulengesha liina lyanu kupekwa bulemu.

Mupailo wakusenga kunyumfwilwa nkumbu akucafwikwa

¹⁵ NoBaami baLesa, amutulangilishe kwiculu uko, ee, kumusena wanu usalalite alimwi kwabulemu uko. Ino ono kulama kwanu pali ndiswe kuli kuli? Ashalo nkusu shanu shili kuli? Lusuno lwanu ankuumbu mwashitalamusha kuswa kuli ndiswe.

¹⁶ Ono Mwebo ndimwe beeshiwesu, nakubi kwaamba ayi Abulaamu taatwishi, ee, nabi Isilaeli taakoonshi kutukumbula mwebo noBaami baLesa ndimwe beeshiwesu. Ndimwe Bapulushi besu alimwi ili ndyeliina lyanu kuswabo kale kale.

¹⁷ Anu nceebonshi noBaami baLesa ncemutulengeshesha kuswa munshila shanu? Ceebonshi mulatuyumya myoyo cakwaamba ayi tunoobula kumulemeka? Amupiluke kuli ndiswe ceebo ca baabo bamusebensela ee, ceebo ca baabo bali mumaansaanu lyoonse.

¹⁸ Kwaciindi ciniini musena wanu usalalite wakalinga mumaansaanu sombi bulya balwani banu balyatoola musena wanu uyo.

¹⁹ Swebo tuli bantu banu kuswabo kale kale sombi balo tamuna kubawo kale baleli babo, ncakwiila tabakwe kwiitwawo kale muliina lyanu.