Isaya 62 - Baibo Busansulushi Bwa Libuku Ili

¹ Ceebobo cakusuna Siyoni teshi ncale mulomo. Ee, ceebobo cakusuna Jelusalemu teshi ngumuneewo, kushikila bululami bukabale anga ncitubilishi cakumuyamaca, alimwi alwalo lupulusho lukamunike anga ncimunimweenge.

² Mishobo imwi yoonse ilaakubona bululami bwako. Bamaami boonse balaakubona bulemu bwako. Balaakunookwiita liina lipya ilyo Mwaami Lesa mwiine ndyeshi akakupe.

³ Ulaakuba anga ngumushini wabulemu mulyaansa lya Mwaami Lesa, ncakwiila anga ngumushini wa bwaami mulyaansa lya Lesa wako.

⁴ Teshi ukanoociitwa ayi, “Cishaale” nabi kwiita cishi cako ayi, “Matongo.” Sombi ulaakunokwiitwa ayi, “Efisiba,” nkokwaamba ayi usunikwi wangu uli muli nguwe. Acalo cishi cako cilaakunokwiitwa ayi, “Beula,” nkokwaamba ayi weebetwe, ceebo Mwaami Lesa ulaakunookusuni alimwi ngweshi akakweebe.

⁵ Bweenka musankwa cikula bwangu mbwaaeba mwanakashi mooye, mbweeke ubo alakwe Mwaami Lesa mbweshi akakweebe. Bweenka shibwiinga mbwaasangalala pali nabwiinga wakwe, mbweeke ubo alakwe Mwaami Lesa mbweshi akanoosangalala pali ndiwe.

⁶ Webo Jelusalemu, pamumbu shako ndabikaawo beshikulindilila. Teshi bakoomuneewo mashiku amalumwi. Mwebo nomwiibalusha Lesa pasheesho nshaakashomesha, amutolelele cakutookesha.

⁷ Ee, amutolelele kushikila akalengeshe ndabala ya Jelusalemu kuba mboyakalinga akwiilengesha ayi ibe ndabala inene iyo bantu boonse njeshi bakanoolumbaisha.

⁸ Mwaami Lesa wakashomesha cakulumbila kucita cintu cimwi. Ulaakucicita kwiinda mulyaansa lyakwe lya nkusu. Wakashomesha ayi, “Teshi nkapewo tubili shili anga ngamaila shako kubalwani bako ayi shibe shakulya shabo. Alimwi teshi nkasuminishewo baswamashi kunwa waini upya uyo webo omwiine ngowakayuwila.

⁹ Sombi womwi awomwi ulaakulya nshaatebula mwiine akulumbaisha Mwaami Lesa. Ncakwiila abo beshi bakatebule minyansa beene mbweshi bakanwe waini weshi ukatyanweeko mulubansa lwa Ŋanda yangu isalalite.”

¹⁰ Nobene Jelusalemu, amuswe mundabala muye mukabambe mukwakwa wa bene mishaanu batoopiluka. Amubambe mukwakwa unene akukushaamo mabwe. Mishobo imwi amwiinyamwite mbembela kwaamba ayi banooibona.

¹¹ Mwaami Lesa waambilisha kucishi coonse ca panshi ayi, “Lwiita bamundabala ya Siyoni ayi, ‘Amubone mupulushi wanu waashika! Ncakwiila ulicite acilambu ee, utoosa amalipilo akupa bantu.’ ”

¹² Bantu bakwe balaakunokwiitwa ayi, “Bantu basalalite, Bakalubulwa ba Mwaami Lesa.” Lyalo webo Jelusalemu ulaakunokwiitwa ayi, “Uyo Wakayandoolwa.” Teshi ukeetwewo tubili ayi, “Ndabala yakacaala cisuukila.”