Isaya 60 - Baibo Busansulushi Bwa Libuku Ili

Bulemu bweshi bukapekwe Jelusalemu kunembo

¹ Buka webo Jelusalemu ubale anga ndisuba. Ceebo bulemu bwa Mwaami Lesa buli pali ndiwe!

² Munshinshe ulaakufwekelesha cishi ca panshi. Munshinshe ushiya mbi ulaakwikala pabantu ba mishobo imwi, sombi pali ndiwe palaakunoomwekabo bulemu bwa Mwaami Lesa. Ncakwiila citubilishi ca bulemu bwa Mwaami Lesa cilaakunooli awebo.

³ Mishobo iinji ilaakukwelwa kwisa kumumuni wako, bamaami balaakwisa kucitubilishi ca kuca kwa bushiku bwako bupya.

⁴ Cebooka koonse koonse webo Jelusalemu ubone citoocitika. Bantu bako boonse batooyoboloka kwisa mumishaabo. Bana bako basankwa balaakwisa kuswa kulaale. Bana bako banakashi balaakwisa kabayumwitwe mumaansa anga mbakateta.

⁵ Cikani ici ulaakucibona kacicitika. Lyalo moyo wako ulaakutunooka ceebo ca kusangalala. Buboni bwa baabo bekala kwitala lya lweenge bulaakuletwa kuli ndiwe. Ncakwiila bubile bwa mishobo imwi bulaakwisa kuli ndiwe.

⁶ Matanga angamela alaakususha cishi canu, ngamela shiniininiini sha kuMidyani akuEfa. Boonse ba kuSheba balaakwisa, balaakunoosa agolodi alimwi atununkila kabotu pakutenta. Nebo neMwaami Lesa, bantu abo balaakunumba amaswi apeculu.

⁷ Mbelele shoonse sha Keda alimwi aNebaiyoti shilaakuletwa kuli ndiwe ayi njimilambu pacipaililo cangu. Lyalo ndaakubotesha Ŋanda yangu ya bulemu.

⁸ Anu nshiinshi ishi shitoosa cipepuluka anga ngamakumbi, nabi anga nimpolobe shitoboola kucicinka?

⁹ Shintu isho ngamaato atooswa kushishi sha kulaale. Ali kunembo ngamaato aswa kuTashishi atooboosha bantu bangu neLesa. Aliyumwite silifa alimwi agolodi mukumpa bulemu neMwaami Lesa, Lesa usalalite wa bene Isilaeli uyo walengesha mishobo imwi yoonse kulemeka bantu bangu.

¹⁰ Baswamashi mbweshi bakayakulule imumbu shako, ncakwiila bamaami babo balaakutalika kukusebensela. Nabi ndakakuuma ceebo ca bukali sombi mukusangalala ndaakukunyumfwila nkumbu.

¹¹ Minjililo yako ilaakunookalabo keecalukite. Teshi ikanoocalwaawo malumwi amashiku kwaamba ayi bantu bakakuletele buboni bwa bamumishobo imwi. Bamaami babo balaakunooli pamulongo wa beshi bakanoosekelela kukoma.

¹² Ceebo bamucishi nabi mubulelo beshi bakabule kukusebensela, balaakuloba. Balaakunyonyoolwa cakumaninina.

¹³ “Bulemu bwa musaansa wa kuLebanoni ee, shisamu shoololokete sha mapaini ashimwi shoonse shilaakuletwa kwaamba ayi baboteshe musena usalalite. Lyalo ndaakulengesha Ŋanda yangu kuba abulemu.

¹⁴ Ncakwiila baana basankwa ba baabo bakalinga kukulyatilila balaakunoosa mukufukama kunembo lyako. Boonse abo bakusebaanya balaakwisa mukufukama muliimfwa lyako alimwi balaakunookwiita ayi, ‘Ndabala inene ya Mwaami Lesa Siyoni, ndabala ya Usalalite wa bene Isilaeli.’

¹⁵ “Ndushinisho nakubi kwaamba ayi walinga wasuulwa akupatwa cakubula awiinda muli ndiwe, ndaakukulengesha kuba musena upa bulemu kwalyoonse alyoonse uyo weshi ukanoosangalasha bantu bamumashalane oonse.

¹⁶ Mishobo imwi abamaami balaakunookulama bweenka mushali mwanakashi bwaalama mwanaakwe. Lyalo ulaakwishiba kwaamba ayi Nebo, neMwaami Lesa, ndime Mupulushi wako. Ulaakwishiba ayi ndime nkufuna alimwi ayi ndi Lesa Shinkusu shoonse wa bamulunyungu lwakwe Jakobo.

¹⁷ “Mumusena wa bulonse nebo ndaakukuletela golodi alimwi ndaakukuletela silifa mumusena wa nshimbi. Ndaakulengesha luumuno kuba anga ngomweendeleshi wako, abwalo bululami anga ngomuleli wako.

¹⁸ Mucishi cako teshi mukanyumfwikewo tubili shankondo abucayi. Cishi cako teshi cikanyonyoolwewo tubili. Ndaakunookufunabo anga ndilinga liyumu, paceebo ceeco ulaakunumbaisha ceebo ndakupulusha.

¹⁹ “Lisuba lilaakucileka kuba ngomumuni wako malumwi, nabi mweenshi kukupa mumuni mashiku, ceebo nebo neMwaami Lesa ndimeshi nkabe mumuni wako kwalyoonse alyoonse. Nebo neLesa wako neenka ndaakuba bulemu bwako.

²⁰ Anu lisuba lyako teshi likapilewo tubili, awalo mweenshi wako teshi ukapileewo. Nebo neMwaami Lesa ndaakuba mumuni wako kwalyoonse alyoonse. Buumba bwako boonse bulaakumana.

²¹ Lyalo bantu bako boonse balaakutalika kucita shiluleme. Acalo cishi cilaakuba cabo kwalyoonse alyoonse. Bantu bako nshishango shangu. Ncakwiila nebo nemwiine ndime ndakabalenga kwaamba ayi batondeshe bulemu bwangu.

²² Ŋanda ya bantu baniini pakati kanu balaakufula cakushika kucuulu. Ncakwiila balaakufula cakubabo cishi abalo beenka. Nebo ndime Mwaami Lesa! Ici ndaakucilengesha kucitika cakufwambaana paciindi ceelete.”