Isaya 59 - Baibo Busansulushi Bwa Libuku Ili

Mulaluki mbwaakatongooka shibiibi sha bantu

¹ Mutayeeyi kwaamba ayi Mwaami Lesa taacite nkusu shakumupulusha, alimwi ayi matwi akwe alishinkite, inga taanyumfwi, sobwe.

² Sombi shilubo shanu nsheshamupansaanya aLesa wanu. Shibiibi shanu nsheshalengesha Lesa kutanookutika kusenga kwanu.

³ Maansaanu alibo pyu kubulowa bwa bantu mbomwakacaya. Ee, mulicite milandu ipusenepusene. Milomo yanu ilaamba makani abubeshi alimwi ilaamba shintu shibiibi.

⁴ Taaku nabi womwi ulilila koombolosha kululeme alimwi taaku waamba mulandu wakwe kunkuta mulushinisho. Boonse balacinka manungo mukwaamba uko kutaaku mbokubete, kwaamba kwabubeshi. Balamita makatasho akutumbuka bubi.

⁵ Balayungoola bantu amiyeeyo yabo ibiibi anga ngamayi a mpili akuyubabo mutandafube wa shimutangatanga. Muntu uli woonse weenga walya mayi a mpili, ulafwa alimwi na liyi lyomwi lyapwaika, mulaswa mpili.

⁶ Ono tandafube wa shimutangatanga teshi uyumu cakwaamba ayi muntu inga wafwala. Ncakwiila tabakoonshi kulifwekelesha micito yabo ibiibi alimwi ilibo patuba. Bantu aba balacita shintu shibiibi alimwi bucayi mbobuswitebo mumaansaabo.

⁷ Myeendo yabo njuubu abuumbi kweendela kucita bubi. Balicabeene abuumbi kuya mukucaya bantu batacite milandu. Miyeeyo yabo njibiibi cilensha boowa. Kunyonyoola abucayi nkokeshibilo ka nshila shabo.

⁸ Nshila shaluumuno tabashishiiwo napaceyi, abwalo bululami mubuumi bwabo ndwiica lwa mbwa. Ncakwiila nshila shabo nshabumwanamanumpa alimwi woonse wiindaamo teshi akacanewo luumuno.

Bantu mbobakalyaambilila shibiibi shabo

⁹ Bantu bakaamba ayi, “Anu nceceeco koombolosha kululame ncekwatutalamukila! Anu nceceeco kweenda cakubula kampenda ncekutabetele pafwaafwi aswebo! Tulacita ayi tulangoolewo mumuni, sombi tulacanabo munshinshe. Tuleelesha kulangila ayi mpashi kulatuba, sombi ndikwiindaawo akushiya.

¹⁰ Ono twababo anga mboofu kuya caashaasha muya lubumbu, ee, anga mbantu batalashi kuya cipampanshila motweelete kwiinda. Lumwi lubala tulalisuntula anga ndimashiku. Tuli anga mbantu bali kumusena wa bafu kumunshinshe.

¹¹ Ono soonse tutoobulumabo anga ngamabeya. Tutoolila cilensha nkumbu anga nimpolobe. Tulalangoola koombolosha kululeme, sombi tatukubooni. Tulalangila kupulushikwa kuswa mubusha, sombi kuli kulaale aswebo.

¹² “NoBaami baLesa, ncakwiila milandu yesu njiinji pameenso anu. Shibiibi shesu shitootushinina shiine. Shilubo shesu ncakwiila tashitushiili musena, alimwi kusotoka milawo kwesu koonse twakusumina.

¹³ Twasumina kwaamba ayi tuli baashu alimwi tatushomeki kuli ndimwe noBaami baLesa. Tulamufutatila nobaLesa besu, tulalyatililana alimwi akumubukila. Kwaamba bubeshi ncintu myoyo yesu nceyakalinga kulama kabotu.

¹⁴ Ee, anu nceceeco koombolosha kululeme ncekwatutalamukila. Nceceeco kweenda cakubula kampenda ncekwabeta kulaale aswebo. Lushinisho talunyumfwikiiwo mumikwakwa, akwalo kushomeka kuleelabo kulaale.

¹⁵ Ncakwiila lushinisho taaku nkolucibeteewo alimwi uyo woonse weenga wafutatila bubi, ingayi waliletelela.” Mwaami wakalangilisha panshi akubona ayi taapu koombolosha kululeme.

Mwaami Lesa mbwaakalibambila kupulusha bantu bakwe

¹⁶ Wakabona kwaamba ayi tepakalinga nabi womwi wakalinga kukonsha kucitaawo cimwi cintu pacikani ico. Aboobo wakayeeyabo ayi abapulushe lakwe mwiine ankusu shakwe. Mukucita boobo wakatanjisha bululami bwakwe.

¹⁷ Mpeeke wakafwala bululami anga ncakufwala ca pacaamba ca nkondo Kumutwi wakafwalaako lupulusho anga ncimpoompo. Kuyanda kuboosha cishole kubalwani bakwe akwalo wakakufwala akufwala moyo mpwampwa anga ncakufwala cakwe ca peculu.

¹⁸ Ono balwani bakwe abo ulaakubalambula kweelana asheesho nshebakacita. Ulaakunyumfwisha balwani abo cilemeneshi ca bukali bwakwe, ee, ulaakubooshela cishole abo bamupatite. Ulaakupa bantu beenka abo bekala kulaale, isho nshebeelete.

¹⁹ Lyalo kuswa kumbo kushikila kwicwe, bantu boonse balaakunoolemeka Mwaami Lesa ceebo ulaakwisa cankusu anga ngumulonga wasefuka alimwi utooshindikwa acipuupu ca Mwaami Lesa.

²⁰ Mwaami Lesa waamba ayi, “Mupulushi ulaakwisa kuSiyoni, ee, kubamulunyungu lwakwe Jakobo basanduka kuswa kushibiibi shabo.

²¹ “Ndaapanga cipangano ambabo cakwaamba ayi, ‘Mushimu wangu uli muli ndimwe, maswi angu ngondamupa teshi mukaalubeewo sobwe, nabi bana banu nabibo bamulunyungu lwabo kuswa sunu kushikila muyayaya.’ ”