Isaya 58 - Baibo Busansulushi Bwa Libuku Ili

Kulikasha kulya kwalushinisho

¹ Mwaami Lesa waamba ayi, “Olobesha cankusu alimwi cakutacileka. Amba muliswi lya peculu anga ndupeenga. Ambila bantu bangu shabwaashu bwabo ee, waambile bamulunyungu lwakwe Jakobo shibiibi shabo.

² Balanambila mashiku amalumwi, balaboneka anga balisunishi kwishiba nshila shangu. Balalibonesha anga ngumushobo ucita shiluleme uyo utana kufutatilaawo milawo yangu neLesa wabo. Ee, balalibonesha anga balisuminite kukonkela milawo yangu. Balaamba ayi balisuni koombolosha kululeme alimwi ayi balisunishi kwaamba ayi nsene pafwaafwi ambabo.

³ “Baleepusha ayi, ‘Ceebonshi twakalikasha, kulya sombi mwebo nobaLesa cakutabona ncetwakalinga kucita? Ceebonshi twakalibombya pameenso anu, sombi mwebo cakutabikaako amaano?’ ” Mwaami Lesa wakumbula ayi, “Mwebo paciindi ndimulikasha kulya mulacita shimusangalasha akulita masuku basebenshi banu pamitwi.

⁴ Peculu lya waawo, kulikasha kulya kwanu kuleela mukwaambana. Muloomana makoofi mukusebensesha maansaanu ayo atasalalite. Mulalyatilila bantu bamusebensela. Ono sa mutooyeeya ayi kulikasha kulya kwanu kwa mushobo uyu inga kwalengesha ayi nebo nyumfwe kusenga kwanu kwiculu?

⁵ Sa uku nkokulikasha kulya nkondakasuminisha? Sa muntu ulyeelete kuliceyeshabo ca bushiku bomwi? Sa nkwakucita kukontyamika mitwi anga nditete lityokete akoona pamasaka ayalitwe pamilota? Sa anu kucita boobo nkomwaamba ayi mwalikasha kulya uko kweenga kwasangalasha neMwaami Lesa?

⁶ “Sa nshikwe kusuminisha kulikasha kulya kwakusutoola ncetani shakasalulushi akusowa bweendeleshi bwanu bwakulyatililana? Sa tamweelete kwaangulula baabo batoolyatililwa akucileka nshila shanu shoonse shalunkutwe?

⁷ Sa teshi kwakwaabila beshinsala shakulya shanu akupa maanda bantu baya ciingookabo ceebo cakwaabula? Sa teshi kwakucita na mwaboona uli mubusakula mwamupa shakufwala alimwi akutakaka kucafwa bene mishaanu?

⁸ “Ncakwiila mwaakucita boobo coolwe canu cilaakubalabo anga nkumuyamaca. Kushilikwa kwanu kulaakufwambaana kuba. Mpeeke bululami bulaakunoomutanjilila akwalo kwisule lyanu kulaakunoobabo bulemu bwangu nebo neMwaami Lesa.

⁹ Lyalo mwaakupaila, nebo neMwaami Lesa ndaakumukumbula. Mwaakusenga lucafwo nebo ndaakumucafwa. “Ndushinisho mwaakumanisha shakulyatililana, shakutondekana minwe amyaambo ya mfundilishi,

¹⁰ alimwi na beshinsala mwebo mukabapengele akucita shoonse shilila baabo balyatililwa. Lyalo mumuni wanu ulaakuboneka mumunshinshe. Awalo munshinshe wanu ulaakutubabo anga ngamalumwi lisuba ndyeliba pakati ka mutwi.

¹¹ Nebo neMwaami Lesa ndaakunoomutanjilila lyoonse. Ndaakunoomupa shoonse shiyandika mubuumi bwanu mucishi ici cibalilwabo lumwi. Ndaakunoomupa nkusu abuumi bubotu. Mulaakubabo anga ngumuunda utililwa kabotu, nabi kantupu katamani maanshi.

¹² Bantu banu balaakuyakulula shoonse shikulukulu shakalinga kupwayookite. Ncakwiila kuyakulula matongo palwiimbi lweenka lukulukulu. Mulaakunokwiitwa ayi beshikuyakulula mumbu shakakulooka, mikwakwa alimwi amaanda shakanyonyoolwa.”

Cilambu cakulama bushiku bwakookesha bwa Cibelu

¹³ Mwaami Lesa waamba ayi, “Na mwakasha myeendo yanu kupwaya mulawo wa bushiku bwakookesha bwa Cibelu, na mwalikasha kucita shisangalasha myoyo yanu pabushiku bwangu busalalite alimwi bulemekwa, na mwabupa bulemu mukuteenda munshila shanu nobeene alimwi akutacita shisangalasha myoyo yanu nabi mukwaamba caambaambe,

¹⁴ ingayi mulaakucana kusangalala muli ndime neMwaami Lesa. Ndaakumulengesha kweendelesha cishi coonse. Mulaakulya bubotu bwa cishi ico ncendakapa bamulunyungu lwakwe Jakobo. Nebo neMwaami Lesa ndaamba.”