Isaya 55 - Baibo Busansulushi Bwa Libuku Ili

Nkumbu sha Mwaami Lesa pabantu bakwe

¹ Mwaami Lesa waamba ayi, “Woonse uyo unyumfwite nyotwa eese kuno kuli maanshi. Amwebo nomutacite maali amwise muule shakulya mulye! Kamwisa muule waini amukupa, sombi tashicite mweelo nauceyi.

² Ceebonshi mulasebensesha maali pashintu shiteshi cakulya? Ceebonshi mulasebensela cintu ceenga tacimukutishiiwo? Amukutike, ee, amukutike kuli ndime mulye shibotu. Ncakwiila amukutike mulisangalashe ashakulya shibotu.

³ “Amuteye matwi kuli ndime akupilukila kuli ndime. Amunkutike kwaamba ayi mube abuumi. Lyalo ndaakupangana amwebo cipangano calyoonse alyoonse. Ndaakumutondesha lusuno lwangu lutamaani kweelana ambondakashomesha Defedi.

⁴ Amubone, lakwe ndakamusala kuba kamboni kubantu boonse. Ndakamulengesha kuba mutanjilili wa mishobo imwi yoonse.

⁵ Ndushinisho mulaakwiita mishobo ya bantu mbomuteshiiwo napaceyi. Mishobo ya bantu abo batamwishiiwo balaakwisa kuli ndimwe cakufwambaana ceebo ca Mwaami Lesa, Lesa wanu Usalalite wa bene Isilaeli uyo wakamufwalika bulemu.”

⁶ Amulangoole Mwaami Lesa kaacicanika. Amupaile kuli nguwe cino ciindi kaacili pafwaafwi.

⁷ Mucita shibi ashiye nshila shakwe, ee, shikubisha aleke miyeeyo yakwe ibiibi. Aapilulukile kuMwaami Lesa, alakwe utoomunyumfwila nkumbu. Aapilulukile kuli Lesa mukwiinga ulalekelela cakutalipilaawo nakaceyi.

⁸ Mwaami Lesa waamba ayi, “Miyeeyo yangu teebete mbuli yaanu. Ashalo nshila shangu shilipusene ashaanu.

⁹ Bweenka liculu mbolili kulaale acishi ca panshi, mbweeke ubo miyeeyo yangu mbweebete kulaale ayaanu. Ashalo nshila shangu mboshibete kulaale ashaanu.

¹⁰ “Mfuula acaandwa shilaloka kuswa kwiculu. Ncakwiila tashibooli kwiculu kashitana kutontosha cishi ca panshi. Ee, kashitana kucilengesha kusapuka maluba akunefuma kwaamba ayi cikushe mbuto sha wooyo shikushanga akukusha cakulya ca wooyo shikulya.

¹¹ Mbweeke ubo amaswi aswa mumulomo wangu mbwaabete ubo. Teshi akaboole kuli ndime kaatana kucita mulimo wa ngawo. Sombi alaakumanisha mulimo uyo ngoonsuni ayi acite akuswitilila mumuyeeyo ngondakaatumina.

¹² “Aboobo mulaakuswa muBabiloni kamusangalete. Mulaakutanjililwa akuswaamo caluumuno. Tulundu tunene atuniini tulaakutalika kwiimba. Ashalo shisamu shilaakoolobesha cakusangalala.

¹³ Apo pali myuumfwa palaakumena shisamu sha mapaini, apalo pali shisonsoonya palaakumena mishikili. Ici cilaakuba citondesho ceshi cikanoolikobo kwalyoonse alyoonse, cakwiibalukilaawo shintu isho Mwaami Lesa nshaakacita.”