Isaya 52 - Baibo Busansulushi Bwa Libuku Ili

Lesa ulaakufuna Jelusalemu

¹ Amubuke, Amubuke! Amubuke nobamundabala inene ya Siyoni! Amube ankusu mbuli kataanshi. Amufwale shakufwala shanu sha bulemu, nobamundabala ya Jelusalemu, ndabala inene isalalite. Balya bakunsengwe batapalwitwe teshi bakenjilewo tubili mundabala yanu.

² Amulipaampe lusuko nobene Jelusalemu, munyamuke akuya mukwikala pacuuna ca bwaami! Amwaangulule ncetani nshemwaangitwe nobene Siyoni nomuli mubusha!

³ Mwaami Lesa Shinkusu shoonse waamba ayi, “Taaku mweelo wa maali wakalipilwa ndyemwakatolwa busha. Paceebo ceeco apakwaangululwa taaku mweelo wa maali weshi ukalipilwe.

⁴ Ndimwakaya mukwikala kuIjipiti, mwakayabo mukusuna kwanu nobeene. Pesule bene Asilya bakamutola busha cakumukakatisha, sombi kwakubula kuloshawo lipepe.”

⁵ Ono Mwaami Lesa waamba ayi, “Ino caangu apa nciinshi? Bantu bangu batolwa busha kwakubula amalipilo, abalo abo batoobalela, balabacelebula kulilabo bwaca. Peculu lya waawo balacobola liina lyangu cakutacilekaawo.

⁶ Muciindi citoosa bantu bangu balaakwishiba ayi ndime Lesa. Ncakwiila pabushiku ubo balaakwishiba kwaamba ayi ndime ndakaambila limwi ayi ici cilaakucitika. Ee, ndime ndakacaamba, taaku aumwi.”

⁷ Cilabotelesha abuumbi kubona shinkombe keesa kucilingana tulundu, ee, shinkombe utooleta makani abotu, makani a luumuno. Ulaambilisha kukoma akwaambila bene Siyoni ayi, “Lesa wanu ncakwiila ngomwaami!”

⁸ Amukutike, beshikulindilila banu bayobela. Boonse batokoolobesha cakusangalala. Mwaami Lesa akuboola muSiyoni boonse balaakulibonena ameenso abo.

⁹ Amusangalale akwiimba nyimbo noonse pantu pomwi nomatongo a ndabala ya Jelusalemu. Mwaami Lesa woombulusha bantu bakwe kwiinda mukufuna ndabala ya Jelusalemu.

¹⁰ Mwaami Lesa ulaakusebensesha nkusu shakwe shisalalite pakupulusha bantu bakwe. Bantu boonse pacishi ca panshi balaakushibona.

¹¹ Amusweemo, amusweemo muBabiloni! Mutacati cintu citasalalite kweelana aMilawo Amusweemo muBabiloni kamusalalite mwebo nomunyamuna shisebensesho sha Mwaami Lesa.

¹² Sombi teshi mukasweemo cakwiingana nabi cakunoonyumfwite boowa ceebo Mwaami Lesa ngweshi akanooli kunembo lyanu. Mwaami Lesa eenka ngweshi akanoomutabilila kwisule.

Musebenshi upenshekwa

¹³ Mwaami Lesa waamba ayi, “Amubone, musebenshi wangu ulaakuswitilila mumulimo wakwe. Ulaakusumpulwa, kubikwa peculu alimwi akulumbaishikwa.

¹⁴ Bantu baanji bakalinga kukankamana ndibakamubona. Ciwa cakwe cakalinga caswa mubuntu, cakwaamba ayi cakalinga ciyumu kwishiba ayi ngumuntu.

¹⁵ Sombi bulya bantu baanji balaakucatabo pamilomo baakumubona. Bamaami balaakubula amaswi akwaambaawo ceebo cakukankamana. Ncakwiila balaakubona akunyumfwa cintu ncebatana kunyumfwaawo kale.”