Isaya 51 - Baibo Busansulushi Bwa Libuku Ili

Maswi akalika moyo kundabala ya Jelusalemu

¹ Mwaami Lesa waamba ayi, “Amukutike nsheshi ŋambe mwebo nomusuni kupulushikwa, ee, mwebo nomwisa kuli ndime ayi mucaafwe. Amuyeeye mwaandami ulya ngomwakaswaako, muyeeye cikaanda ca mabwe akuyakisha nkondakamukaba.

² Ncakwiila amuyeeye Abulaamu mushali wanu mukulukulu, muyeeye Saala uyo ngomwakashalwaako. Abulaamu ndindakamwiita ayi ansebensele taakalinga kucitewo mwaana nabi womwi. Sombi ndakamupa coolwe cakuba abaana. Lyalo ndakalengesha bamulunyungu lwakwe kufula abuumbi.

³ “Ndaakunyumfwila nkumbu ndabala ya Jelusalemu abaabo boonse bekala mumatongo a njiyo. Nakubi kwaamba ayi cishi ca njiyo nduyanga, ndaakucilengesha kuba anga muEdeni. Ncakwiila cilaakusandulwa kuba anga ngumuunda wa Mwaami Lesa. Bantu uko balaakunoosangalala akukondwa. Balaakunoolumba alimwi balaakunokwiimba.

⁴ “Amukutike nobantu bangu, ee, amuteye matwi kuli ndime nomushobo wa bantu bangu. Milawo ilaakuswa kuli ndime. Lyalo bululami bwangu bulaakumunikila bantu boonse.

⁵ Nebo ntoosa cakufwambaana ciindi cangu cakubapulusha cili pafwaafwi. Nebo nemwiine ndime eshi nkabe mwaami wa mishobo ya bantu boonse. Bantu bekala mushishi shakulaale batoolangila kwisa kwangu. Ndushinisho batoolindila ndime ayi mbapulushe.

⁶ Ono amulange kwiculu, mulange apacishi ca panshi. Liculu lilaakushiminganabo anga mbwiishi. Cishi ca panshi cilaakusansookabo anga ncakufwala abalo abo bekalaamo, balaakumana kufwabo anga mbaloonshi. Sombi lupulusho lwangu ndwalyoonse alyoonse alimwi kufuna kwanu teshi kukeelebo waawo peenka, sobwe.

⁷ “Ono Amukutike mwebo nomwishi shiluleme, mukutike mwebo nomweenda amilawo yangu mumyoyo yanu. Mutanooloonda na bantu banoomupensha akumucobola.

⁸ Balaakunyonyookabo anga ncakufwala calikwa muswa. Sombi lupulusho lwangu ndwalyoonse alyoonse alimwi kufuna kwangu teshi kukeelebo waawo peenka, sobwe.”

⁹ NoBaami baLesa, amunyamuke, amunyamuke! Amunyamuke mutupulushe alyaansa lyanu. Amunyamuke bweenka mbomwakalinga kucita kunshiku shakeenda, ee, bweenka mbomwakalinga kucita kuciindi ca mashalane akulukulu. Sa te ndimwe mwakatimboola Laabu shinshimwe ulya mutupanshapansha?

¹⁰ Sa te ndimwe mwakayumya lweenge lulaamfu, ee, kuyumya maanshi alaamfu alya? Anu balya bakapanga nshila mulweenge lulaamfu kwaamba ayi balya bakalubulwa basubukile kwitala lya ndulo mbaani?

¹¹ Ncakwiila abo mbomwakafuna balaakuboola. Balaakushika kuSiyoni kabeemba. Lyalo balaakunokweenda kabasangalete kwalyoonse alyoonse. Ndushinisho kusangalala teshi kukamaneewo alimwi buumba bwabo amatongooshi shilaakumana.

¹² Mwaami Lesa waamba ayi, “Nebo ee, nebo neenka ndime muumbulushi. Ceebonshi mutooloonda bantubo abo balibo anga mbwiisu,

¹³ cakwaamba ayi mulube ndime neMwaami Lesa, uyo wakamulenga? Nebo neMwaami Lesa ndime ndakafungulula liculu akuyaka lwiimbi lwa cishi ca panshi. Ceebonshi mutookala aboowa lyoonse kuloonda bukali bwa baabo bamulyatilila alimwi balibambite kumunyonyoola? Bukali bwabo bulya tabukoonshi kushika pali ndimwe.

¹⁴ Ncakwiila abo bali muntolongo balaakwaangululwa coonoonobo. Balaakwikala buumi bulaamfu alimwi teshi bakabulewo shakulya shiyandika.

¹⁵ “Nebo ndime Mwaami Lesa wanu. Ndafundoola lweenge akulengesha ayi pali ndulo pabe maaba ayoosha. Nebo ndime Mwaami Lesa Shinkusu shoonse!

¹⁶ Ndakafungulula liculu akuyaka lwiimbi lwa cishi ca panshi. Bene Jelusalemu ndabaambila ayi, ‘Mwebo muli bantu bangu! Ndakamupa milawo yangu alimwi ndamutabilila alyaansa lyangu.’ ”

Meelelesho apamapensho a bene Jelusalemu

¹⁷ Amubuke, Amubuke! Ee, amunyamuke mwebo nobene Jelusalemu! Mwebo mwakanwa munkomeshi ya bukali bwa Mwaami Lesa cakutabushiyaamo. Mwakanwa munkomeshi yabukali bwakwe iyo ilengesha bantu kutalantanta.

¹⁸ Ono kwabula nabi womwi pabana banu wakumutanjilila. Ncakwiila pabaana boonse mbomwakalela tekwakalinga nabi womwi wakamucatililaako palyaansa.

¹⁹ Mapensho aya esa camambili pali ndimwe. Anu ngani weenga wamuumbulushaako? Kunyonyooka kwamupolela, ncakwiila nsala ankoondo shenjila. Anu ngani weenga wamuumbulushaako?

²⁰ Bana banu basankwa bamana kuwisooka mupetookila mikwakwa. Balibo kampa kampa anga ninsefu shacatwa mposhakateyekwa. Bukali bwa Mwaami Lesa bwabakola. Ncakwiila bacinyumfwa cilemeneshi ca bukali bwakwe.

²¹ Ono anu amukutike mwebo nomutoopenshekwa, ee, mwebo nomukoletwe, sombi kuteshi kuwaini.

²² Mwaami Lesa wanu Shinkusu shoonse, Lesa uyo umufuninina mwebo nobantu bakwe waamba ayi, “Amubone, nkomeshi ya bukali bwangu iyo yakamulengesha kutalantanta ndeebwesa. Ncakwiila munkomeshi ya bukali bwangu iyo teshi mukanweemo tobilo.

²³ Nkomeshi iyo ndaakwiipa baabo balinga kumupensha. Ee, abo bakalinga kumwaambila ayi, ‘Amoone akutandabala apa kwaamba ayi tunooya cilyata peculu.’ Ncakwiila misana yanu njeyakaba nje nshi, ee, yakaba anga ngomukwakwa wakwiindaawo.”