Isaya 50 - Baibo Busansulushi Bwa Libuku Ili

¹ Mwaami Lesa waamba ayi, “Sa mutooyeeya ayi bantu bangu ndakabatanda ayi batolwe busha? Sa mutooyeeya ayi ndakabatanda anga ngumuntu waleka mukaakwe? Ono na mbondakacita ubo ino mapepa eemikanina kulekana ali kuli? Sa mutooyeeya ayi ndakamuulisha busha bweenka muntu mbwaaulisha bana bakwe ayi babe basha? Sobwe, mwebo mwakatolwa busha ceebo ca shibiibi shanu. Ncakwiila nceebo ca milandu yanu ncemwakalekelwa ayi muye mubusha.

² “Anu ndindakesa kwakabulilanshi nabi womwi wakalingaako? Ceebonshi taaku nabi womwi wakakumbula ndindakeeta? Sa nceebo cakwaamba ayi lyaansa lyangu lyalela uko kwaamba ayi mupulushe? Sa nceebo cakwaamba ayi nshicite nkusu shakumupulusha? Amubone, nebo ndaambabo liswi, lweenge lwamana kuyuma. Ndaambabo liswi milonga ilamana kuyuma cakubabo anga nduyanga. Inswi shilamana kufwa akuboolabo nununu ceebo cakubula maanshi.

³ Ndalengesha liculu kushiya cakubabo anga litoolila wafwa.”

Kunyumfwila kwa musebenshi wa Mwaami Lesa

⁴ Mwaami Lesa wanjiisha bwakwaamba kwaamba ayi nooyumyayumya balefukite. Kulila bwaca ulansengusha kumoyo kwaamba ayi nsunishe kunyumfwila nsheshi anjiishe.

⁵ Mwaami Lesa wakampa busongo bwakunyumfwishisha shintu. Nshikwe kumwaashukilaawo nabi kumufutatilaawo.

⁶ Ndakaaba musana wangu kubaabo bakalinga kunguma. Macili angu ndakaalansha kubaabo bakalinga kuncelebula akunshipila mate.

⁷ Ceebo cakwaamba Mwaami Lesa Shinkusu shoonse ngooncafwa, teshi nkalenshekweewo nsoni. Paceebo ceeco ndayuumya moyo kwaamba ayi ntatentuki. Ndishi cakushinisha kwaamba ayi teshi nkalenshekweewo nsoni.

⁸ Ono uyo utondesha ayi nshicite mulandu mbwaali pafwaafwi anebo, ino ono ngani aumwi weshi ampe mulandu? Ee, atulangane, ngani utoompa mulandu? Keesa tubone anshinine!

⁹ Mwaami Lesa Shinkusu shoonse ngooncafwa. Ono umwi weenga wancanina mulandu ngani? Anu boonse banteya milandu balaakumana kusansooka anga ninsalu. Balaakumana kulobabo anga ncakufwala calikwa muswa.

¹⁰ Ono ngani pakati kanu ulemeka Mwaami Lesa akunyumfwila shaamba musebenshi wakwe? Uyo woonse weendela mumunshinshe, ee, uyo utacite mumuni, aacinke manungo muMwaami Lesa akushomabo Lesa wakwe.

¹¹ Sombi mwebo noonse nomukunka mililo akulinyanshila shimunimweenge kamweenda mumumuni wa mililo yanu awa shimunimweenge nshemwakalinyanshila. Mwaami Lesa ulaakulengesha mapensho kumucitikila, ncakwiila mulaakuba mumapensho ayoosha.